(Kita Idak Dapat Malayani Dua Tuan) ¹ Yesus bakata kapada murid-murid-Nyeh, "Ada saurang kaya nan mamunyai kapala palayan. Dan kapada urang kaya otou dilapoen bahwa kapala palayannyeh tolah mamborosen haretanyeh. ² Kaena otou, urang kaya otou manghimbau kapala palayannyeh dan bakata, 'Apa nan aku donge tentangmu ikok? Bagienlah partanggungjawaban atas tugasmu kaena kamu idak bisa lagi manjadi bandaharaku.' ³ kapala palayan otou pun bapike, 'Apa nan nak kulakuen kaena sakarang tuanku sudah mamecat aku dai pakejaenku? Aku idak cukup kuat untu mancangkul dan malu untu mamintak-mintak. ⁴ Aku tontu apa nan haus kupabuat supaya katika aku dipecat sabagei bandahara, urang-urang nak manarimaku di rumah mareka.' ⁵ Kamudien, dia pun manghimbau satiap urang nan bautang kapada tuannyeh. Kapada urang patama dia bakata, 'Barapa utangmu kapaa tuanku?' ⁶ Urang otou manjawab, 'Seratus bat minyak zaitun.' Lalu, kapala palayan otou bakata kapadanyeh, 'Ambiklah surat utangmu, sageralah duduk dan tulislah 50 bat. ' ⁷ kamudien kapala palayan otou batanya kapada urang lain, 'Barapa banyak utangmu?' Urang otou manjawabnyeh, 'Saratus kor gandum.' Lalu bandahara bakata kapadanyeh, 'Ambiklah surat utangmu dan tulislah utangmu 80 pikul.' ⁸ Kamudien, urang kaya otou mamuji kapala palayan nan idak jujur otou kaena dia batindak dengan cerdik. Sebab budak-budak dunia ikok lobih cerdik dalam barurusan dengan sasamanyeh daipada budak-budak torang. ⁹ Aku bakata kapadamu, buatlah pasahabaten dengan mamon nan idak bone supaya katika mamon otou habis, kamu nak disambut di rumah abadi. ¹⁰ Siapa pun nan satia dalam hal-hal nan kocik, dia uga satia dalam hal-hal nan bose. Dan, siapa pun nan idak jujur dalam hal-hal nan kocik, dia uga idak jujur dalam hal-hal nan bose. ¹¹ Jadi, bila kamu idak dapat dipacaya untu mangelola hareta duniawi, siapa nan nak mamacayakan hareta nan sasungguhnyeh kapadamu? ¹² Dan, bila kamu idak dapat dipacaya dalam manggunaen milik urang lain, siapa nan nak mambagien apa nan sahausnyeh manjadi punyamu? ¹³ Idak ada palayan nan dapat malayani dua manjiak kaena dia nak mambenci majikan nan satu dan manyukai majikan nan lain. Atou, dia nak patuh kapada majikan nan satu dan mangabeien nan lainnyeh. Kamu idak dapat malayani Allah dan mamon." (Paingaten Untu Urang Farisi) ¹⁴ Urang-urang farisi, nan adalah pacinta duit, mandonge hal ikok dan mangejek Yesus. ¹⁵ Yesus bakata kapada mareka, "Kamu adalah urang-urang nan mamboneen dirimu dewek di hadapen manusia, topi Allah tontu isi hatimu nan saboneennyeh kaena nan diagung-agungen di hantara manusia adalah sasuatu nan manjijien di hadapen Allah. ¹⁶ Hukum taurat dan kitab para nabi diajeen sampei masa Yohanes; Sejak masa Yohanes, kabe baik tentang Karajaen Allah sudah dibaitaen dan samua urang mamaksa untu masuk ka dalamnyeh. ¹⁷ Namun sasungguhnyeh, lobih mudah bagi langit dan bumi untu lenyap daipada satu titik dalam Hukum Taurat dibatalen. (Tentang Pancoeien) ¹⁸ "Satiap urang nan mancoeien bininyeh dan mangawini batina lain, dia babuat jina. Dan, urang nan mangawini batina nan dicoeien lakinyeh, juga babuat jina." (Urang Kaya dan Lazarus) ¹⁹ "Ada saurang kaya nan salalu bapokeien ungu dan kain linen, dan basenang-senag satiap hai dalam kamewahen. ²⁰ Di pintu gerbang rumah urang kaya otou, babaringlah saurang miskin banama Lazarus, nan bodannyeh ponuh dengan borok. ²¹ Dia baharap dibagien makan apa pun nan jatuh dai meja makan urang kaya otou; bahkan anjing-anjing tiba dan manjilati boroknyeh. ²² Suatu katika, urang miskin otou mati dan dibawak oleh para malaikat ka pangkuen Abraham. Urang kaya otou juga maninggal lalu dikubuen. ²³ Di alam maut, saat disisa, urang kaya otou mamandang ka atas dan mandang Abraham di kajauhen basama Lazarus di pangkuannyeh. ²⁴ Dan, urang kaya otou basurak, 'Bopak Abraham, sayangilah aku dan suruhlah Lazarus mancelupen ujung jarinyeh ka ayek dan manyejuen lidahku sebab aku mananggung dalam nyala api ikok.' ²⁵ Topi, abraham bakata, 'Budak, ingatlah katika kamu masih hidup, kamu sudah manarima hal-hal nan baik, samantara Lazarus manarima hal-hal nan buruk; sakarang, di sikok Lazarus dihibu, samantara kamu disisa. ²⁶ Salain otou samua, ada jurang bose nan mamisahen kita sahingga urang nan mau manyeberang dai sikok ka tompatmu idak bisa manyeberang, dan urang nan dai tempatmu juga idak bisa manyeberang ka tompat kami.' ²⁷ Lalu, urang kaya otou bakata, 'kalu baitu, aku mohon kapada Bopak, suruhlah Lazarus ka rumah bopakku, ²⁸ kaena aku mamunyai lima dulo jantan. Biaklah Lazarus mampaingaten mareka supaya nanti mareka idak masuk ka tompat panyisaan ikok. ' ²⁹ Namun, Abraham bakata, 'Mareka mamunyai Hukum Musa dan kitab para nabi, biaklah mareka manontui dai samuanyeh otou.' ³⁰ Kata urang kaya otou lagi, 'Idak, Bopak Abraham. Bila sasaurang dai hantara urang mati tiba kapada mareka baulah mareka nak batobat.' ³¹ Jawab Abraham kapada urang kaya otou,' Bila dulo-dulomu idak mandongeen Hukum Musa dan Kitab para nabi, mareka idak nak bisa diyakinen, bahkan oleh sasaurang nan bangkit dai hantara urang mati.'" ²⁹ Namun, Abraham bakata, 'Mareka mamunyai Hukum Musa dan kitab para nabi, biaklah mareka manontui dai samuanyeh otou. ' ³⁰ Kata urang kaya otou lagi, 'Idak, Bopak Abraham. Bila sasaurang dai hantara urang mati tiba kapada mareka baulah mareka nak batobat.' ³¹ Jawab Abraham kapada urang kaya otou,' Bila dulo-dulomu idak mandongeen Hukum Musa dan Kitab para nabi, mareka idak nak bisa diyakinen, bahkan oleh sasaurang nan bangkit dai hantara urang mati.'"