¹ Kamaudian, saincek dari tujuh malaikat na mamaccik tujuh cawan tu mandakkek jongon mangeccek kapado ambo, kecceknyo, "Kasikkolah, ambo akan manunjukkan kapado kau hukuman untuk palacur gadang tu, na duduk di ate banyak a'i ² na jongonnyo rajo-rajo dibumi bazino dan sidak na tingga di bumi ala mabuk samo anggur pazinoannyo." ³ Malaikat tu mambaok ambo dalam Roh ka padang belantaro, jongon ambo maliek saurang padusi duduk di ate saikku binatang bawarno merah na panuh jongon namo-namo hujek, na mampunyoi tujuh kapalo jongon sappulu tanduk. ⁴ Padusi tu mamakke pakkean bawarno ungu jongon merah na bahiaskan ame, batu-batu permato, jongon mutiaro. Inyo mamaccik saincek cawan ame na panuh jongon kakejian jongon kanajisan pazinoannyo. ⁵ Pado dahinyo, tatulis suatu namo, suatu rahasio: "BABEL NA GADANG, UMAK PALACUR JONGON SAGALO KAKEJIAN DI BUMI." ⁶ Ambo maliek wanita tu mabuk samo darah urang-urang kudus jongon samo darah saksi-saksi Yesus. Saat ambo malieknyo, ambo maraso heran bana. ⁷ Lalu, malaikat mangeccek kapado ambo, "Mangapo kau heran? Ambo akan mangatokan kapadokau rahasio padusi tu jongon rahasio binatang na dinaikinyo, na bakapalo tujuh jongon batanduk sappulu tu. ⁸ Binatang na kau liek tu panah ado, tatapi kini ala indak ado, jongon akan lalke kalua dari jurang maut manuju kabinasoan. Jongon, sidak na tingga di bumi, na namonyo indak tacatat dalam kitab kahidupan sajak dunio diciptokan, akan heran katiko maliek binatang tu, na panah ado, tatapi kini ala indak ado, dan akan muncu lai. ⁹ Hal ko mambutuhkan akal jongon hikmat. Tujuh kapalo tu iyolah tujuh gunung na di atenyo padusi tu duduk. ¹⁰ Tujuh kapalo tu pulo iyolah tujuh rajo, limo diantaronyo ala jatuh, saincek rajo masih ado, jongon saincek rajo lai balum datang, tatapi katiko inyo datang, inyo harus tingga sabanta sajo. ¹¹ Binatang na dulu panah ado, tatapi kini indak ado lai itu, iyolah rajo kadalapan tatapi inyo tamasuk dalam tujuh rajo tadi, jongon inyo manuju kabinasoan. ¹² Kasappulu tanduk na kau liek iyolah sappulu rajo na balum manarimo pamarintohan, tatapi sidak manarimo kuaso sabage rajo salamo satu jam basamo binatang tu. ¹³ Sidak mampunyoi tujuan na samo, jongon sidak mangagikan kuaso jongon wewenang sidak kapado biantang tu. ¹⁴ Sidak akan baperang malawan Anak Domba, tatapi Anak Domba, akan mangalahkan sidak karano Inyo iyolah Tuhan ate sagalo tuhan jongon Rajo ate sagalo rajo jongon sidak na basamo-Nyo iyolah na di imbo, dipilih, jongon na satio." ¹⁵ Kamudian, malaikat tu mangeccek kapado ambo, "A'i na kau liek, na di atenyo pelacur tu duduk, iyolah masyarakat, urang banyak, bangsa, jongon bahaso. ¹⁶ Kasappulu tanduk na kau liek jongon binatang tu akan mambanci si palacur. Sidak akan mambueknyo talantar jongon telanjang, sarto malahap dagingnyo jongon mambakkarinyo jongon api. ¹⁷ Sabab, Allah ala malatak tu dalam hati sidak untuk mancape tujuan-Nyo jongon satuju untuk mangagikan kakuasoan sidak kapado binatang tu hinggo firman Allah diganapi. ¹⁸ Padusi na kau liek tu iyolah kota gadang na mamarintah ate rajo-rajo di bumi."