¹ Lalu, ambo mandanga sabuah suaro na kare dari dalam Bait Allah na mangeccek kapado katujuh malaikat, "Pailah jongon tunggangkanlah katujuh cawan murko Allah tu ka bumi." ² Malaikat partamo pai jongon manunggangkan cawannyo ka bumi, mako muncullah bisul na manjijikkan jongon manyakkitkan pado urang-urang na mamakke tando binatang tu jongon na manyambah patungnyo. ³ Malaikat kaduo manunggangkan cawannyo ka laut, mako laut barubah manjadi darah, sakiro darang urang mati; jongon sadonyo na hidup di dalamnyo pun mati. ⁴ Malaikat katigo manunggangkan cawannyo ka sunge-sunge jongon mato-mato a'i, jongon sadonyo manjadi darah. ⁵ Lalu, ambo mandanga na bakuaso ate a'i mangeccek, "Kau adil, ya Na Suci, na ado jongon ala ado karano Kau manghakimi sadonyo ikko. ⁶ Sabab, sidak ala manunggangkan darah umat-Kau na kudus jongon darah nabi-nabi-Kau, tatapi Kau mangagi sidak darah untuk diminum. Sidak pantas manarimonyo." ⁷ Jongon, ambo mandanga altar mangeccek, 'Ya Tuhan, Allah Na Mahakuaso, benar dan adillah panghakiman-Kau." ⁸ Malaikat kaampek manunggangkan cawannyo ka ate matohari, mako matohari diagi kuaso untuk manghanguskan manusio jongon api. ⁹ Manusio dihanguskan samo hangek na luar biaso, tatapi sidak manghujek namo Allah na mampunyoi kuaso ate sadonyo bancano ko. Sidak indak mau batobat jongon mamuliokan Allah. ¹⁰ Malaikat kalimo manunggangkan cawannyo ka ate tahta binatang tu, mako karajoannyo manjadi kalam; jongon sidak manggigik lidah sidak karano kasakkitan, ¹¹ jongon manghujek Allah na di surga karano raso sakkik jongon bisul-bisul sidak; tatapi sidak indak batobat dari pabuekan-pabuekan sidak. ¹² Malaikat kaanam manunggangkan cawannyo ka sunge gadang, yaitu Efrat, mako a'inyo manjadi karing untuk mampasiapkan jalan bagi rajo-rajo Timur. ¹³ Lalu, ambo maliek dari mulut naga, dari mulut binatang tu, jongon dari mulut nabi palsu kalua tigo roh najis na tampak sakiro katak, ¹⁴ karano sidak iyolah roh-roh jahek, na mangadokan tando-tando ajaib, na pai kapado rajo-rajo di bumi untuk mangumpukan sidak untuk manghadapi paparangan pado hari gadang, yaitu hari Allah, Na Mahakuaso. ¹⁵ {"Lieklah! Ambo datang sakiro pancilok. Dibarkatilah urang na tetap tajado jongon mamaliharo pakeannyo sahinggo inyo indak akan bajalan jongon talanjang jongon urang-urang indak maliek kamaluannyo."} ¹⁶ Kamudian, roh-roh jahek tu mangumpukan sidak di tampek, na dalam bahaso Ibrani disabut Harmagedon. ¹⁷ Malaikat katujuh manunggangkan cawannyo ka udaro, mako tadangalah suaro na kare dari dalam Bait Allah, dari tahta tu, mangeccek, "Ala salase." ¹⁸ Jongon, tampaklah kilek na manyambar-nyambar, suaro jongon gamuruh guntur, jongon gampo bumi na hebat, sakiro na balum panah tajadi sajak manusio ado dia te bumi, dahsyat bana gampo tu. ¹⁹ Kota gadang tu tabala manjadi tigo bagian, jongon kota-kota bangsa-bangsa runtuh; jongon Babel na gadang tu indak dilupokan Allah untuk diagikan kapadonyo cawan anggur murko-Nyo na maluap-luap. ²⁰ Satiok pulo lenyap jongon gunung-gunung indak ditamukan. ²¹ Hujan es na gadang, kiro-kiro sabarek 1 talenta, jatuh dari langit manimpo manusio; tatapi manusio manghujek Allah karano bancano hujan es tu. Sabab, bancano tu baiti mangerikan.