¹ Ambo maliek tando lain di langit, na gadang jongon ajaib, tujuh malaikat na mambaok tujuh bancano, yaitu bancano na tarakhir, karano dalam katujuh bancano tula murko Allah diakhiri. ² Lalu, ambo maliek sasuatu sakiro lautan kacco bacampu api jongon sidak na ala mangalahkan binatang tu, patungnyo, jongon angko namonyo, tagak di tapi lautan kacco tu jongon mamaccik kecapi Allah. ³ Sidak malagukan lagu Musa, hamba Allah, jongon lagu Anak Domba: "Gadang jongon ajaib sadonyo pakarajoan-Kau, ya Tuhan, Allah Na Mahakuaso. Adil jongon benar sadonyo jalan-Kau, ya Rajo sagalo bangsa. ⁴ Siapokah na indak takkut kapado-Kau, ya Tuhan jongon indak mamuliokan namo-Kau? Sabab, hanyo Kaulah na kudus. Sadonyo bangsa akan datang jongon manyambah di mukko-Kau karano kaadilan-Kau ala dinyatokan." ⁵ Satala sadonyo hal ko, ambo maliek Bait Allah, kemah kasaksian Allah di surga, tabukkak. ⁶ Tujuh malaikat na mambaok tujuh bancano tu kalua dari Bait Allah, bapakkean linen na putih jongon bakilek, dan mamakke salempang ame di dado sidak. ⁷ Saincek dari kaampek makhluk mangagikan kapado katujuh malaikat tu tujuh cawan ame, panuh murko Allah, na hidup sampe salamo-lamonyo. ⁸ Bait Allah dipanuhi jongon asok dari kamulioan Allah; jongon dak saurang pun dapek mamasuki Bait Allah sabalum tujuh bancano dari katujuh malaikat tu barakhir.