¹ Kamudian, ambo maliek Anak Domba tagak di Bukkit Sion, jongon basamo-Nyo ado 144 ribu urang, na mampunyoi namo Ayah-Nyo pado dahi sidak. ² Ambo mandanga suaro dari surga sakiro gemuruh a'i na banyak jongon sakiro bunyi guntur na kare, tatapi suaro na ambo danga tu sakiro bunyi paro pamain kacapi na mamainkan kacapi sidak. ³ Sidak malagukan saincek lagu baru di mukko tahta jongon di mukko kaampek makhluk, sarto dimukko tuo-tuo. Dak saurang pun dapek mampelajari lagu tu salain kasaratus ampek puluh ribu urang na ala ditabus dari bumi. ⁴ Sidak iyolah urang-urang na indak manajiskan diri jongon padusi-padusi karano sidak perjaka. Sidak iyolah urang-urang na mangikkuti Anak Domba ka mano pun Inyo pai. Sidak ala ditabus dari antaro manusio sabage buah-buah Anak Domba. ⁵ Indak ado dusto dalam mulut sidak; sidak indak basalah. Pesan dari Tigo Malaikat ⁶ Ambo maliek malaikat lain tabang di tanga-tanga langit, mambaok Injil kekal untuk dibaritokan kapado sidak na tingga di bumi jongon kapado sadonyo bangsa, suku, bahaso, jongon kaum ⁷ dan inyo mangeccek jongon suaro kare, "Takkutlah akan Allah jongon agikanlah kamulioan kapado-Nyo karano waktu panghakiman-Nyo ala tibo; sembahlah Inyo na manciptokan langit, bumi, laut, jongon sadonyo mato a'i." ⁸ Lalu, malaikat na lain, na kaduo, manyusul jongon mangeccek, "Runtuh, ala runtuh Babel na gadang tu karano inyo ala mambuek sadonyo bangsa maminum anggur nafsu seksualnyo na bejat." ⁹ Kamudian, malaikat na lain, na katigo, manyusul kaduo malaikat sabalumnyo, dan mangeccek jongon suaro kare, "Jiko siapo sajo manyambah binatang tu jongon patungnyo, dan manarimo saincek tando pado dahi ato tangannyo, ¹⁰ Urang tu akan minum anggur murko Allah, na ditunggangkan jongon kakuatan panuh ka dalam cawan murko-Nyo, dan inyo akan di sikso jongon api dan balerang di mukko malaikat-malikat kudus dan di mukko Anak Domba. ¹¹ Dan, asok siksoan sidak naik salamo-lamonyo. sidak indak punyo waktu untuk istirahat, elok siang ato malam, yaitu sidak na manyambah binatang tu jongon patungnyo, ato siapo pun na manarimo tando namonyo." ¹² Ikkolah katekunan urang-urang kudus na mamaliharo parintoh Allah jongon iman sidak di dalam Yesus. ¹³ Lalu, ambo mandanga suaro dari surga mangeccek, "Tuliskanlah ikko: Mule kini, diberkatilah urang mati, na mati di dalam Tuhan." Roh mangeccek. "Benar, supayo sidak dapek baristirahat dari jerih lelah sidak karano pabuekan-pabuekan sidak mangikkuti sidak." Bumi Dipanen ¹⁴ Lalu, Ambo maliek suatu awan putih jongon duduk di ate awan tu saurang sakiro Anak Manusio,mamakke mahkota ame di kapalo-Nyo jongon sabit na tajam di tangan-Nya. ¹⁵ Lalu, malaikat lain kalua dari Bait Allah, dan baseru jongon suaro kare kapado Inyo na duduk di ate awan, "Ayunkan sabit-Kau jongon panenlah karano waktu untuk mamanen ala tibo jongon panenan di numi ala masak." ¹⁶ Mako, Inyo na duduk di ate awan mangayunkan sabit-Nyo ka ate bumi, jongon bumi pun dipanen. ¹⁷ Kamudian, malaikat lain kalua dari Bait Allah na di surga, jongon inyo pulo mampunyoi sabit na tajam. ¹⁸ Jongon, malaikat lain lai, na bakuaso ate api, kalua dari altar. Inyo baseru jongon suaro kare kapado malaikat na mamaccik sabit tajam tu, "Ayunkan sabitkau na tajam tu jongon kumpukanlah gugusan buah anggur dari batang anggur di bumi." ¹⁹ Mako, malaikat tu mangayunkan sabitnyo ka bumi jongon mangumukan gugusan buah anggur dari batang anggur di bumi jongon malantingkannyo ka dalam batu kilangan gadang murko Allah. ²⁰ Pamarasan buah anggur tu dilakukan di lua kota, jongon darah mangalir dari alat pamaras anggur tu kiro-kiro satinggi kekang kudo jongon sapanjang saribu anam ratus stadia.