¹ Kamudian, tampaklah saincek tando na gadang di langit: saurang padusi bapakkean matohari jongon bulan di bawah kakkinyo jongon mahkota dari duo bale bintang di kapalonyo. ² Padusi tu sadang bunting jongon dalam pandaritoannyo handak malahekan, inyo mamakkik kasakkitan. ³ Kamudian, tampaklah saincek tando lain di langit: saikku naga gadang bawarno merah na mampunyoi tujuh kapalo jongon sappulu tanduk sarto tujuh mahkota pado kapalonyo. ⁴ Ikku naga tu manarik sapartigo bintang di langit jongon malantingkannyo di mukko padusi na handak malahekan tu supayo katiko padusi tu ala malahekan, inyo bisa malulu Anaknyo. ⁵ Padusi tu malahekan saurang Anak lakki-lakki, na akan mamarinto bangsa-bangsa jongon tongkat basi; tatapi Anak tu dirabut jongon dibaok kapado Allah dan ka mukko tahta-Nyo. ⁶ Padusi tu balari manuju padang balantaro, ka tampek na disadiokan kadinyo supayo di sinun, inyo dipaliharo salamo saribu duo ratus anam puluh hari. ⁷ Dan, tajadilah paparangan di surga, Mikhael jongon paro malaikatnyo baparang malawan naga tu. Naga tu baparang basamo paro malaikatnyo, ⁸ tatapi sidak indak cukup kuek sahinggo indak ado lai tampek kadi sidak di surga. ⁹ Naga gadang tu dilantingkan ka bawah, si ula tuo na disabut Iblis ato Setan, na manyasekkan saluruh dunio, inyo dilantingkan ka bumi, jongon paro malaikatnyo dilantingkan ka bawah basamonyo. ¹⁰ Dan, ambo mandanga suaro na kare di surga mangeccek, "Kini, ala datang kasalamatan, kuaso, jongon karajaan Allah kito, sarto kakuasoan Kristus-Nyo karano si panuduh saudaro-saudaro kito, na manuduh sidak di mukko Allah siang jongon malam, ala dilantingkan ka bawah. ¹¹ Sidak mangalahkannyo jongon darah Anak Domba, dan jongon pangeccean kasaksian sidak; karano sidak indak manyayangkan nyawo sidak, bahkan saat manghadapi kamatian. ¹² Karano itu, basukkocitolah, hai surga jongon sadonyo na tingga di dalamnyo! Namun, celakalah bumi jongon laut karano Iblis ala turun kapadokau dalam amarahnyo na gadang karano inyo tau bahwa waktu na dipunyoinyo singkek." ¹³ Katiko naga tu maliek bahwo inyo ala dilantingkan ka bumi, inyo manganiayo padusi na la malahekan Anak lakki-lakki tadi. ¹⁴ Akan tatapi, padusi tu diagi duo sayap pipik rajowali na gadang supayo inyo dapek tabang ka padang balantaro, ka tampeknyo, di mano inyo dipaliharo salamo saincek maso, duo maso, dan satanga maso jauh dari mukko si ula. ¹⁵ Ula tu manyemburkan a'i na bagaikan sunge ka arah padusi tu, untuk manghanyutkan si padusi di dalamnyo. ¹⁶ Namun, bumi manolong padusi tu; bumi mambukka mulutnyo jongon malulu a'i na disemburkan naga tu. ¹⁷ Mako, naga manajdi berang bana kapado padusi tu jongon pai untuk mamberangi anak-anak na lain dari padusi tu, yaitu urang-urang na mamaliharo parintoh-parintoh Allah jongon bapaccik pado kasaksian Yesus. ¹⁸ Naga tu tagak di tapi laut.