¹ Anak hari kamudian, Yesus mangajak Petrus, Yakobus, sarto Yohanes sodaro Yakobus, dan mambaok sidak naik ka gunung na tinggi sacaro tasandiri. ² Lalu, Yesus barubah rupo di mukko sidak. Mukko-Nyo basinar sakiro matohari dan pakkaian-Nyo manjadi saputih cahayo. ³ Dan, liek, tampaklah kapado sidak Musa jongon Elia, sadang babincang jongon Yesus. ⁴ Petrus bacakkap kapado Yesus, "Tuhan, iyolah elok kadi kito untuk barado di sikko, ambo akan managakkan tigo kemah di sikko, saincek untuk-Kau, saincek untuk Musa, jongon saincek lai untuk Elia." ⁵ Katiko Petrus masih mangeccek, sabuah awan na tarang manaungi sidak, jongon liek, ado suaro dari dalam awan tu na bacakkap, "Ikkolah Anak-Ambo na Ambo kasihi, kapado-Nyo Ambo bakenan. Dangakanlah Inyo." ⁶ Katiko murid-murid mandanga ikko, sidak tasungku jongon mukko sampe ka tanah jongon katakkutab bana. ⁷ Namun, Yesus datang jongon mamaccik sidak, kato-Nyo, "Bangunlah dan jangan takkut." ⁸ Katiko sidak mangangkek mato sidak, sidak indak maliek siapo pun, kacuali Yesus surang. ⁹ Saat sidak turun dari gunung, Yesus mamarintokan sidak, kato-Nyo, "Jangan caritokan pangliekan tu kapado siapo pun sampe Anak Manusio dibangkikkan dari antaro urang mati." ¹⁰ Dan, murid-murid batanyo kapado-Nyo, "Lalu, mangapo ahli-ahli Taurek bacakkap bahwo Elia harus datang talabi dahulu?" ¹¹ Yesus manjawab, "Elia memang datang talabi dahulu dan akan mamulihkan sagala sasuatu. ¹² Namun, Ambo mangatokan kapadokau bahwa Elia ala datang, tatapi sidak indak manandonyo jongon mampalakukannyo manurut kamauan sidak. Damikian pulo Anak Manusio akan mandarito di tangan sidak." ¹³ Kamudian, paro murid mangarti bahwa Inyo mangeccek kapado sidak tantang Yohanes Pambabtis. SAURANG ANAK DIBEBASKAN DARI ROH JAHEK ¹⁴ Katiko Yesus jongon murid-murid kambali lapado urang banyak, saurang lakki-lakki datang kapado Yesus jongon balutut di hadapan-Nyo sambi bacakkap, ¹⁵ "Tuhan, kasihanilah anak ambo sabab inyo sakkik ayan jongon mandarito bana. Inyo accok jatu ka dalam api dan ka dalam ai. ¹⁶ Ambo ala mambaoknyo kapado murid-murid-Kau, tatapi sidak dapek mancegakkan inyo." ¹⁷ Yesus manjawab, "Hai, kau ganarasi na indak piccayo jongon sasek! Barapo lamo lai Ambo akan tingga basamokau? Barapo lamo lai Ambo harus basabar tahadok kau? Baoklah anak tu kapado-Ambo." ¹⁸ Mako Yesus manyonggak roh jahek tu sahinggo kalua dari anak lakki-lakki tu, dan anak tu cegak saat tu juo. ¹⁹ Kamudian paro murid datang kapado Yesus, katiko sidak sandirian jongon-Nyo dan batanyo, "Mangapo kami indak dapek mangusir roh jahek tu?" ²⁰ Kato-Nyo kapado sidak, "Karano iman kau na ketek. Ambo mangatokan na sabananyo kapado kau, kok kau mampunyoi iman sagadang incek sasawi sajo, mako kau dapek mangeccek kapado gunung ko, 'Pindalah dari tampek ko ka sinun!' dan gunung tu akan pinda. Indak ado na mustahil bagikau. ²¹ Akan tatapi, roh jahek maccam ikko hanyo dapek di usir jongon doa dan puaso. YESUS MANGECCEK TANTANG KAMATIAN-NYO ²² Katiko Yesus jongon murid-murid-Nyo sadang bakumpu di wilayoh Galilea, Inyo bacakkap kapado sidak, "Anak Manusio akan disarahkan ka dalam tangan manusio, ²³ dan sidak akan mambunu-Nyo, dan Inyo akan dibangkikkan pado hari katigo." Dan, paro murid-Nyo manjadi sedih bana. PANGAJARAN TANTANG MAMBAYAR PAJAK ²⁴ Katiko sidak tibo di Kapernaum, paro pangumpu pajak 2 dirham datang kapado Petrus jongon batanyo, "Apokah gurukau indak mambayar pajak 2 dirham?" ²⁵ Petrus manjawab, "Iyo." Katiko inyo masuk kadalam rumoh, Yesus talabi dahulu mangeccek kapadonyo, "Baapo pandapekkau, Simon? Dari siapokah rajo-rajo dunio ko managih bea jongon pajak? Dari anak-anaknyo ato dari urang lain?" ²⁶ Katiko Petrus manjawab, "Dari urang lain," Yesus bacakkap kapadonyo, "Kok baitu, anak-anaknyo bebas. ²⁷ Akan tatapi, supayo kito indak manyinggung sidak, pailah ka dano jongon lantingkan kai. Ambiklah lauk na duluan nampak jongon katiko kau mabukkak mulutnyo, kau akan manamukan sakeping stater. Ambiklah kepeng tu jongon agiksn kapado sidak, bagi-Ambo jongon bagikau."