¹ Kamudian, babarapo urang Farisi jongon ahli-ahli Taurek dari Yerusalem datang kapado Yesus dan bacakkap, ² "Mangapo murid-murid-Kau malangga tradisi nenek moyang? Sabab, sidak indak mambasuh tangan katiko makkan roti!" ³ Dan, Yesus manjawab dan bacakkap kapado sidak, "Dan, mangapo kau pulo malangga parinto Allah dami tradisikau? ⁴ Karano Allah bafirman, 'Hormatilah ayah jongon umakkau,' dan, 'Siapo na mangutuki ayah jongon umaknyo, harus dihukkum mati.' ⁵ Namun, kau bacakkap, "Siapo sajo na mangeccek kapado ayah jongon umaknyo, 'Apopun pambarian untukkau ala di pasembahkan kapado Allah,''' ⁶ inyo indak parlu manghormati ayah ato umaknyo. Jongon damikian, kau mambatalkan firman Allah dami tradisikau. ⁷ Kau, urang-urang munafik, memang benar nubuatan Yesaya tantang kau: ⁸ Bangsa ko manghormati Ambo jongon mulut sidak, tatapi hati sidak jauh dari pado-Ambo. ⁹ Jongon, sio-sio sidak manyambah-Ambo jongon mangajarkan parinto-parinto manusio.''' ¹⁰ Dan, Yesus mangimbo urang banyak dan bacakkap, "Danga dan pahamilah! ¹¹ Indak apo na masuk ka dalam mulut na manajiskan urang, tatapi apo na kalua dari mulutnyo, ikkolah na manajiskan urang." ¹² Kamudian, murid-murid Yesus datang jongon batanyo kapadonyo, "Taukah Kau bahwo urang-urang Farisi tasinggung katiko mandanga pannyatoan ko?" ¹³ Namun, Yesus manjawab jongon bacakkap, "Satiok tanaman na indak di tanam oleh Ayah-Ambo na di surga akan dicabut sampe ka urek-ureknyo. ¹⁴ Padiakanlah sidak. Sidak iyolah panuntun-panuntun buto dariurang-urang buto. Dan, jiko urang buto manuntun urang buto, kaduonyo akan jatuh ka dalam lubang." ¹⁵ Petrus bacakkap kapado-Nyo, "Jalekanlah parumpamoan tu kapado kami." ¹⁶ Yesus bacakkap, "Apokah kau indak mangarti juo? ¹⁷ Apokah kau indak mangarti bahwo sagala sasuatu na masuk ka dalam mulut akan turun ka parut jongon dicampakkan ka dalam jamban? ¹⁸ Akan tatapi, apo na kalua dari mulut muncu dari hati, dan itulah na manajiskan urang. ¹⁹ Karano dari hati muncu pikkiran-pikkiran jahek, pambunuhan, pazinoan, doso-doso seksual, pancilokan, kasaksian palsu, jongon fitnah. ²⁰ Hal-hal ikkolah na manajiskan urang, tatapi makkan tanpa mambasuh tangan indak manajiskan urang." YESUS MANOLONG PADUSI KANAAN ²¹ Kamudian, Yesus pai dari sinun dan manyingki ka daerah Tirus jongon Sidon. ²² Dan, saurang padusi Kanaan na barasal dari daerah tu datang jongon baseru, "Kasihanilah Ambo, Tuhan, Anak Daud! Anak padusiambo karasukan roh jahek parah bana." ²³ Akan tatapi, Yesus indak manjawab padusi tu, saincek kato pun. Dan, murid-murid-Nyo datang jongon manyasak-Nyo, kato sidak, "Surulah inyo pai karano inyo tarus manarus mamakkik di balakkang kito." ²⁴ Lalu, Inyo manjawab dan bacakkap, "Ambo hanyo di utus kapado domba-domba na hilang dari umat Israel." ²⁵ Kamudian, padusi tu mandatangi dan sujud di hadapan Yesus, katonyo, "Tuhan, tolonglah ambo!" ²⁶ Namun, Yesus manjawab jongon bacakkap, "Indak elok mangambik roti punyo anak-anak dan malantingkannyo kapado anjing-anjing." ²⁷ Padusi tu manjawab, "Benar, Tuhan, tatapi anjing-anjing tu makkan remah-remah na jatuh dari meja tuannyo." ²⁸ Kamudian, Yesus bacakkap kapadonyo, "Hei padusi, imankau gadang! Tajadilah kapadokau sakiro kainginankau." Pado saat tu pulo, anak padusinyo dicegakkan. YESUS MANCEGAKKAN BANYAK URANG ²⁹ Yesus pai dari sinun, manyusuri tapi dano Galilea. Dan, satala mandakki ka ate bukkik, Inyo duduk di sinun. ³⁰ Kamudian, karumunan gadang urang datang kapado-Nyo, mambaok urang-urang na lumpu, caccek, buto, bisu, jongon urang banyak lainnyo. Lalu, sidak manggolekkan urang-urang tu di kakki Yesus dan Inyo mancegakkan sidak, ³¹ sahinggo urang banyak tu tacangang-cangang katiko sidak maliek na bisu mangeccek, na caccek dipulihkan, na lumpu bajalan, dan na buto maliek. Dan, sidak mamuliokan Allah Israel. YESUS MANGAGI MAKKANAN KAPADO LABIH DARI AMPEK RIBU URANG ³² Lalu, Yesus mangimbo murid-murid-Nyo dan bacakkap, "Ambo babale kasihan tahadok urang-urang tu karano sidak ala basamo-Ambo salamo tigo hari jongon indak mampunyoi makkanan. Dan, Ambo indak mau manyuruh sidak pulang kalaparan supayo sidak indak pingsan dalam pajalanan." ³³ Kamudian, paro murid bacakkap kapado-Nyo, "Dari mano kito akan mandapekkan roti na banyak di tampek sunyi ko mangkanyangkan urang na banyak bana ko." ³⁴ Yesus batanyo kapado sidak, "Barapo banyak roti na kau punyo?" Sidak manjawab, "Tujuh, dan babarapo lauk ketek." ³⁵ Lalu, Yesus mamarintokan urang banyak tu duduk di tanah. ³⁶ Kamudian, Inyo mangambik katuju roti sarto lauk-lauk tu. Dan, sambi mangucap syukur, Inyo mamacca-maccakannyo, jongon mangagikannyo kapado murid-murid-Nyo, dan murid-murid-Nyo mangagikannyo kapado urang banyak tu. ³⁷ Sidak sadonyo makkan jongon dikanyangkan. Lalu, sidak mangambik kudungan-kudungan na siso, ado tuju karanjang panuh. ³⁸ Sidak na makkan ado ampek ribu urang lakki-lakki, indak tamasuk padusi jongon anak-anak. ³⁹ Satala manyuruh urang banyak tu pulang, Yesus masuk ka sampan jongon pai ka daerah Magadan.