¹ Inini,Bala samadikan, aku mamboritahuan ka kolai Injil, nya aku britaan akai kolai, nya jadi kolai trima, nya di dalam nya kolai badiri teguh. ² Obai Injil inyanam kolai di salamatan, asal kolai bapigap kuat agan firman nya jadi kukonyu ka kolai kacuali, kolai percaya ntah bonar-bonar. ³ Jadi ku sampaian ka kolai am, Pertama-tama nya terpenting, nya aku pan manarimanya bahawa Kristus mati akai dosa-dosa kita sasuai agan Kitab Suci, ⁴ Inya jadi dikuburam, Inya dibangkitan di hari ka tiga sasuai Kitab Suci, ⁵ dahan bahawa Inya jadi manampaan diriNya ka Kefas, jadi inyan ka nya dua bolas inyan. ⁶ Jadi inyan, Inya manampaan diriNya ka lobih dari lima ratus bala samadikan sakaligus. Sabagian bosar dari sia ija hidup sampai inini, tapi adanya matiam. ⁷ Lalu, Inya manampaan diriNya ka Yakobus, udahan ka samua rasul. ⁸ Tarahir, sama uba ka anak nya sabolum waktunya, Inya pan manampaan diri ka aku. ⁹ Sobab, aku niam nya paling takocit di antara bala rasuNya dahan ntah pantas disobut sabagai rasul obai aku maaniaya jemaat Allah. ¹⁰ Tapi, obai anugrah Allah, aku niam aku nya inini. Dahan, anugrahNya ka aku ntahnya sia-sia. Aku bakroja lobih rajin daripada sia samua, tapi bilanya aku, tapi anugrah Allah manyertaaiku. ¹¹ Sobab inyanam, baik obai aku atau pan siaan, uba inyanam kami mangajar dahan uba inyanam kolai jadi percaya. ¹² Amun Kristus dibritaan bangkit dari kamatian, maapa babaropa di antara kolai bakata bahawa ntah ada kabangkitan dari kamatian? ¹³ Kalau ntah ada kabangkitan dari kamatian, Kristus pan ntah kala dibangkitan. ¹⁴ Dahan, amun Kristus ntah dibangkitan, sia-siaam pambritaan kami dahan sia-siaam jam iman kolai nan. ¹⁵ Talobih lagi, kami pan dikatahuai sabagai saksi dusta Allah obai kami mambori kasaksian bahawa Allah jadi membangkitan Kristus, nya tidak akan dibangkitanNya, amun memang bonar urang mati ntah dibangkitan, Kristus pan ntah dibangkitan. ¹⁷ Dahan, amun Kristus ntah dibangkitan, sia-sia am iman kolai, dahan kolai ija totap dalam bala dosa kolai. ¹⁸ Uba inyan jam, sia nya jadi mati dalam Kristus pan jadi banasa jam. ¹⁹ Amun pengharapan kita di dalam Kristus baya pakai hidup ini ja, kita ni bala urang nya raja malang dari samua mansia. ²⁰ Tapi inini, Kristus jadi dibangkitan dari antara urang mati, sabagai buah nya kajulaan dari samua urang percaya nya jadi mati. ²¹ Sobab, sama uba kamatian bakajadian mamaluai siku urang jam kabangkitan dari antara urang mati bakajadian. ²² Obai dalam Adam samuanya mati, uba inyan jam dalam Kristus samuanya pacaan dihidupan. ²³ Tapi, tiap-tiap urang manurut urutannya: Kristus sdabagai buah kajulaan, jadi inyan sia nya inyanan umpu Kristus, di kadatakanNya babali, ²⁴ Jadi inya datang kasudahannya, inyaam waktu Inya manyorahan krajaan ka Allah Bapa, waktu Inya jadi mambinasaan samua pamarintahan, samua kakuasaan, dahan kakuatan. ²⁵ Sobab, Inya harus mamarintah sampai Allah malotaan samua musuhNya di babah kakiNya. ²⁶ Musuh tarahir nya pacaan dibanasaan inyaam kamatian. ²⁷ Sobab, Allah jadi malotaan sagala jolu di babah kakiNya. Tapi, waktu dikataan bahawa sagala jolu jadi dilotaan di baba kakaiNya, jolasan kalau ini ntah tamansu Allah siku, nya malotaan sagala jolu di babah Kristus, ²⁸ waktu sagal jolu di lotaan di babah kaki Kristus, jadi inyan Anak siku pan pacaan manunu'an diri agan Inya, nya manuanu'an samuanya di babah Kristus sampai Allah pacaan nyadi sagala-galanya di dalam samuanya. ²⁹ Amun ntah uba inyan, apa nya pacaan dilabuhan sia nya di babtis akai urang nya mati? Amun urang mati ntah di bangkitan sama sakali, lalu maapa bala urang mambaptis akai sia nan? ³⁰ Dahan, maapa kami dalam bahaya jaam satiap waktu? ³¹ Bala samadikan, satiap ari aku mahadapai kamatian, demi kabanggaanku dalam kolai, nya ada di aku dalam Yesus Kristus, Tuhan kita. ³² Sacara mansia, apa untungku bakalahi agan bala binatang buas Di Efesus nan? Jika urang mati ntah dibangkitan, "Ayuam kita makan minum obai hobu kita matiam." ³³ Jangan tatipu: "Pergaulan nya buruk mahancuran bala kabiasaan nya baik." ³⁴ Baik babalik sadar tam lagi dahan jangan bajawat dosa am." Sobab, babaopa urang nya ntah ada pangenalan agan Allah. Aku mangataan ini akai kolai malu. ³⁵ Tapi, siku urang pacaan batanya, "Uba apa urang nya mati dibangkitan nan?" ³⁶ Oy urang bodoh! Apa nya kolai tabur ntah pacaan tumuh hidup, kacuali inya mati daholu. ³⁷ Dahan, apa nya kolai tabur bukainya batang tanaman nya pacaan tunuh inyan, tapi bigi nya ntah bakulit uba bigi ganum atau uba bala-bigi bukainya nan. ³⁸ Tapi, Allah tapi Allah mangonyu batang ubanya Inya kahonaai dahan masing-masing bigi dikonyuai batang sikunya. ³⁹ Bilanya samua daging inyanan daging nya sama, tapi baya satu daging mansia, dahan daging nya bukainya daging bala binatang, dahan daging bala burung, dahan daging lauk ⁴⁰ Ada jam tubuh surgawi dahan tubuh duniawi, tapi kamuliaan nya surgawi inyan babeda dahan kamuliaan duniawi pan sama am babeda jam. ⁴¹ Kamuliaan matari babeda, kamuliaan bulan babeda, kamuliaan bala binatang pan babeda jam obai siku binatang babeda agan binatang nya bukai dalam kamuliaan. ⁴² Uba inyan jam agan kabangkitan urang mati. Ditaburan dalam kabinasaan, Dibangkitan dalam katidakbanasaan. ⁴³ Ditaburan dalam kahinaan, dibangkitan dalam kamuliaan. Ditaburan dalam kalomahan, dibangkitan dalam kakuatan. ⁴⁴ Ditaburan sabagai tubuh jasmani, dibangkitan sabagai tubuh rohani. Amun ada tubuh jasmani, ada jam tubuh rohani. ⁴⁵ Uba nya tatulis, "Mansia nya pertama,Adam, nyadi jiwa nya hidupm" Adam nya tarahir manyadi roh nya mangonyuai hidup. ⁴⁶ Biarpan uba inyan, nya rohani bukainya nya pertama. nya pertama inyanan jasmani, jadi inyan horu rohani. ⁴⁷ Mansia pertama baasal dari bumi, inyaam dari dobu tanah. Mansia kadua baasal dari surga. ⁴⁸ Sama uba nya baasal dari dobu tanah, uba inyan jam sia nya baasal dari dobu tanah. dahan, sama uba nya surgawi, uba inyan jam sia nya surgawi. ⁴⁹ Ubanya kita diciptaan dalam rupa mansia baasal dari dobu tanah, kita pan pacaan mamakai rupa nya surgawi. ⁵⁰ Aku mangataan ini ka kolai, Bala samadikan, kalau daging dahan darah ntah dapat mawarisai krajaan Allah. Uba inyan jam nya dapat banasa, ntah dapat mawarisai nya tidak dapat banasa. ⁵¹ Dingaam! Aku mangataan sabuah rahasia, tapi kita samua pacaan diubah, ⁵² Waktu inyan am dalam sakejap mata ja, pas trompet tarahir: obai trompet pacaan babunyi, dahan orang mati pacaan dibangkitan dahan ntah ada kabanasaan, dahan kita pacaan diubahan. ⁵³ Sobab, nya dapat banasa ini harus mangonaan nya ntah dapat banasa jam. Dahan, nya dapat mati ini, harus mangonaan nya ntah dapat mati jam. ⁵⁴ Waktu nya dapat banasa ini mangonaan nya ntah dapat banasa, dahan nya dapat mati ini mangonaan nya dapat mati, maka genap am firman nya jadi tatulis: "Kamatian jadi di tolan dalam kamonangan," ⁵⁵ "Oy kamatian, di muna nyam kamonangan kolai tai? Oy maut, di muna nyam singat kolai tai?" ⁵⁶ Singat maut inyanan dosa, dahan kuasa dosa inyanan Hukum Taurat. ⁵⁷ Tapi, kita basyukur agan Allah nya mangoyuai kita kamonangan malaluai Tuhan kita, Yesus kristus. 58Jadi, bala samadikanku saiman nya kakasihku, badiri kuat tam, jangan ragu, malimpah tam salalu dalam pakarojaan Tuhan. Sobab, kolai tahu bahawa jorih payah kolai ntah sia-sia dalam Tuhan.