¹ Aku nyerah Febe ngau kitak, menyadik kito te ngelayan jemaat di Kengkrea. ² Terimok neh didalam Tuhan sepatutneh ura-ura kudus, serto tulo em neh enta semuo utan te di perluneh re kitak ute neh kedirik udah nulo ngau bangat ura piyok gok ngau dirik aku. ³ padah em salam aku ngau Priskila tamai Akwila, balo kaban samo ngelayan dalam Kristus Yesus, ⁴ te sidok ampir mati demi idup aku. enta sidok, bukan aku genno te ngucap terimok kasih tapi, semuo jemaat bukan Yahudi. ⁵ Padah gok salam aku ngau jemaat di dangau sidok. padah gok salam ngau Epenetus te aku kasih, neh yok te pertamo di Asia te nerimok Kristus. ⁶ Salam ngau Maria te udah mantin bekerjo ngau kitak. ⁷ Salam ngau Andronikus tamai Yunias, balo menyanak sebanso aku te suah samo di tahan dalam penyaro piyok gok te di kenal di tengah balo rasul, te udah berado didalam Kristus gok seapan aku. ⁸ Salam ngau Ampliatus, te aku kasih didalam Tuhan. ⁹ Salam ngau Urbanus, kaban sutik ngelayan kito di dalam Kristus, tamai ngau Stakhis te aku kasih. ¹⁰ Salam ngau Apeles, te bisi'k bukti udah tan uji dalam Kristus. Padah gok salam aku ngau balo anggota keluargo Aristobulus. ¹¹ Padah salam aku ngau Herodion, menyanak sebanso aku. salam ngau balo anggota keluargo Narkisus, te ado dalam Tuhan. ¹² Padah gok salam aku ngau Trifena tamai Trifosa, te bekerjo mantin tula didalam Tuhan. serto ngau Persis te aku kasih, piyok gok te udah mantin tula bekerjo didalam Tuhan. ¹³ Salam gok ngau Rufus, ura te dipilih didalam Tuhan, serto ngau inai neh te jadi inai bagi aku gok. ¹⁴ Salam ngau Asinkritus, Flegon, Hermes, Patrobas, Hermas serto balo menyanak te besamo ngau sidok. ¹⁵ Salam ngau Filologus tamai Yulia, Nereus tamai menyadikneh, serto ngau Olimpas, tamai semuo ura kudus te besamo ngau sidok. ¹⁶ Berik salam sikuk samo ngau te lain ngau cium kudus. semuo jemaat Kristus nyampai salam sidok ngau kitak. ¹⁷ Pituk aku merik nasihat ngau kitak, balo menyanak, bejago-jago ngau sidok te kok nimul masalah te nyuruh pecah tamai nyesat, serto te betenta ngau te di ajar ute udah kitak terimok; nang nyemak sidok yok. ¹⁸ Ute, ura-ura upo yok endo ngelayan Tuhan kito Yesus Kristus, tapi ngelayan kemau'k sidok kedirik; serto ngau pemadah te alus tamai and'nai te mintok puji, sidok nipu ati ura-ura te endo naruh curigo ¹⁹ Kebok, ute kitak taat udah di ketauk semuo ura, utan yok aku gago ulih kitak. tapi, aku mau'k isok kitak numut ngau apo te baek tamai bersih re utan te jai'i. ²⁰ Allah sumer damai sejahtero Neh sekelin ngeremuk iblis di baruh kaki kitak. kasih karunio serto anugerah Tuhan kito Yesus Kristud nyerto kitak. ²¹ Timotius, kaban sutik ngelayan ngau aku, nyampai salam ngau kitak, serto gok re Lukius, Yason, tamai Sosipater, balo menyanak sebanso ngau aku. ²² Aku Tertius, te nulis surat tuk, nyampai salam aku ngau kitak dalam Tuhan. ²³ Gayus, te nyuruh beranau ngau aku tamai ngau semuo jemaat, madah salam ngau kitak. Erastus, bendahro kuto, serto Kwartus menyanak kito, nyampai salam ngau kitak. ²⁴ (Kasih karunio Yesus Kristus, Tuhan kito, nyerto kitak semuo! Amin.) ²⁵ Bagi Neh te sangup nguat kitak sesuai Injil te aku bai'k serto berito re aku tenta Yesus Kristus, te sesuai ngau te di nyato ulih Neh secaro resio ute udah di tapukneh selamah berabad-abad, ²⁶ Tapi pituk udah di nyato ngelalu kitab-kitab balo Nabi, sesuai ngau perintah Allah te kekal te udah di padah ngau semuo banso ngau ngunan sidok te nuju ke taat iman, ²⁷ Bagi Neh, sikuk-sikuk nyok Allah ute bangat hikmat ngelalu Kristus Yesus; semuo temulio sampai selamah-lamahneh! Amin.