¹ Yesus tamok lagik ke sinagoge, diok bisik seura te jari neh mati sepiak. ² Sidok mrati Yesus ngau mantau, apokah Yo ko'k nyemuh ura pado ari minggu, isok sidok tau nuduh Neh. ³ Lalu, Yesus madah ngau ura te mati jari sepiak yok,"Bediri di tengah-tengah." ⁴ Lalu bunge Yesus madah ke sidok," Tau ndo mulah pempulah baek atau ja'i pado ari minggu? Nyelamatkan nyawa atau munuh?" Tapi, sidok Nugau. ⁵ Yesus mantau sekelilin't sidok serto ngau peringat. Neh sangat sedih atas pengerampak ati sidok. Lalu, Yesus madah ngau ura te mati jari sepiak yok," Ulur ke jari nuan." Dan ura yok ngulur ke jari neh, dan jari neh nyadi semuh. ⁶ Padai yok, ura-ura Farisi lanso angkat, lalu mulai besekongkol ngau ura-ura Herodian te ngelawan Yesus, nggok caro keti munuh Neh. ⁷ Tapi, Yesus tamai murid-murid Neh nyauh kedirik ke danau, lalu bangat ura Galilea tamai Yudea nurut Neh, dari Yerusalem, Idumea, daerah sebera sungai Yordan ugok dari sekitar Tirus, ⁸ bangat ura watu ningo semuo te Yesus Pulah, datai ngau Neh. ⁹ Padai ura bangat yok, Yesus madah ngau murid-murid Neh nyuruh nyiap ke prau ngau Neh isok sidok ndo nesak Neh. ¹⁰ Padai Yesus udah nyemuh bangat ura, semuo ura te bisik pemedih terus nesak-nesak isok tau nyentuh Neh. ¹¹ Watu roh-roh najis mantau Yesus, sidok sujud di muo Neh lalu mangkas," Nuan tuk Anak Allah!" ¹² Tapi Yesus sajo ndo nyuruh becerito siapo Neh. ¹³ Lalu, Yesus nae'k ke bukit serto nguna ura te dekedeko yo berto Neh, sidok pun datai ngau Neh. ¹⁴ Neh nentu ke duabelas ura isok sidok tau berto Neh, serto Neh tau nuyok sidok berkotbah, ¹⁵ piok gok Yo merik kuaso ngau ngusir balo antu. ¹⁶ Yesus nentu ke duabelas ura yok: Simon (te Neh meri namo Petrus), ¹⁷ Yakobus, anak Zebedeus, lalu Yohanes, menyadik Yakobus (te Yesus merik namo sidok Boanerges, bereti "Anak-anak Guruh''), ¹⁸ Andreas, Filipus, Bartolomeus, Matius, Tomas, Yakobus, anak Alfeus, Tadeus, Simon ura Zelot, ¹⁹ serto Yudas Iskariot te hianat Neh. ²⁰ Pado watu Yesus tamo'k ke dangau, ura bekerumun diok lagik, padai yok Yesus tamai murid-murid Neh ndo tau makai rote. ²¹ Watu keluargo Neh menen't hal yok, sidok datai ma'i Yesus pulai padai sidok madah bahwa Neh udah ndo waras lagik. ²² Ahli-ahli Taurat te turun ari Yerusalaem madah," Neh kerasukan Beelzebul!" Lalu Neh nguser antu ngau kuaso pemimpin antu." ²³ Lalu, Yesus ngumai sidok datai ngau Neh lalu madah ngau perumpamo,"keti iblis tau ngusir iblis? ²⁴ Tik ado kerajaan tepecah-pecah ngelawan dirik neh kedirik, kerajaan yok ndo tau betahan. ²⁵ Lalu tik ado dangau tepecah-pecah ngelawan dirik neh kedirik, dangau yok ndo tau betahan. ²⁶ Tik iblis bangkit ngelawan dirik neh kedirik lalu tepecah-pecah, yo ndo tau betahan, tapi abis em riwayat neh. ²⁷ Ndo sik seura pun tau tamok ke dangau ura te kuat lalu ngerampok segalo reta neh, kecuali yo dulu ngikat ura kuat yok, baruk yo tau ngerampok dangau neh." ²⁸ "Aku madah te sebenar ngau kitak, semuo duso anak-anak mensio tau diampun, serto ujatan te diucap sidok. Tapi ²⁹ sapo te ngujat Roh Kudus yok ndo akan diampun kerno duso yok kekal." ³⁰ Padai, ahli-ahli Taurat yok madah,' Yo kerasukan roh najis." ³¹ Udah tok, umok serto menyadik-menyadik Yesus datai lalu bediri diluar dangau. Sidok nyuroh ura ngumai Neh. ³² Watu ura dudok bekerumun ngelilin't Yesus, sidok madah ke Neh," Pantau, umok serto menyadik-menyadik nuan diluar lagik ngegak nuan." ³³ Yesus nyaut sidok serto madah,"Sapo umok-Ku serto menyadik-menyadik-Ku?" ³⁴ Lalu neh mantau ura-ura te dudok ngelilin't Neh serto madah,"Pantau am, tuk umok-Ku serto menyadik-menyadik-Ku! ³⁵ Kerno, siapo te ngerjo kemau Allah yok menyadik lelaki-Ku, serto menyadik betino-Ku, lalu umok-Ku."