¹ Pas Yesus turun re bukit yok, ura bsngat bekerumun mupuh-Neh. ² Te pantau seura te kenok penyakit kusta datai nguso-Neh, serto nyemah di muo-Neh, lalu becakap, "Tuan, bilo Nuan mauk, taukkah Nuan nyemuh penyakit aku tuk." ³ Lalu, Yesus ngulur jari-Neh serto megai neh, jekuk-Neh," Aku mauk, semuhlah." sekelin yok, penyakit kusta ura yok semuh. ⁴ Lalu, Yesus madah ngau neh, "Pantau serto peratilah, nusah kitak begisah ngau sapo pun ura, tapi angkatlah, suruh sidok imam mantau," ⁵ Watu Yesus tamok ke kampo Kapernaun, seura tentaro datai nguso-neh, mintok nyuruh Neh datai, ⁶ serto madah,"Tuan, pemantukaku lagik tengah pedih lumpuh tegurin genno di rumah, sangat menderito." ⁷ Lalu Yesus madah neh,"Aku pasti datai tauk nyemuh neh." ⁸ Tapi, tentaro yok nyaut serto madah," Tuan, aku endo patut ngau Nuan tamok ke dalam dangau aku, tapi padah genno sepatah kato tentu pemantuk aku tauk semuh. ⁹ Ute, aku kedirik seura bawahan gok, ngau balo prajurit di baruh aku, aku madah ngau seura, ' angkatkin,' neh pun angkat piyok gok ngau te lain,'Datailah,' lalu neh pun datai, piyok gok ngau pemantuk aku, ,'Kerjo tuk.' neh pun ngelaku apo te aku padah. ¹⁰ "Watu Yesus menind apo te di padah yok, Neh salut lalu jekuk Neh ngau ura-ura te nurut-Neh, Aku madah utan te sebenarneh ngau kitak, pan suah Aku nemu Iman sebesai tuk di tengah ura Israel. ¹¹ Aku madah ngau kitak ute bangat kok datai baek re timur atau re barat, serto duduk makai besamo Abraham, Ishak, tamai Yakub enta kerajaan surgo, ¹² tapi anak-anak kerajaan yok tentu di buai ke dalam enta tekeleman sajo palin peta. Din bisik tangis tamai gigi mengkerit" ¹³ seudah yok, Yesus becakap ngau tentaro yok, "Angkatkin, isok tejadi ngau nuan apo te nuan pecayok." lalu, saat yok gok pemantuk neh semuh. ¹⁴ Watu Yesus datai ke rumah Petrus, Neh mantau mentuo Petrus te betinok tengah gurin ute lagik demam. ¹⁵ Lalu, Yesus megai lengan ura tuo betinok yok sekelin yok demam neh ngayap. lalu neh angkat ngejamu ngelayan Yesus. ¹⁶ Pun malam ari, sidok ngemaik ura nguso-Neh bangat ura te kerasuk sitan, Neh pun ngusir sitan yok ngau sepatah kato genno, serto nyemuh ura te pedih, runguk. ¹⁷ Isok digenaplah apo te dipadah uleh nabi Yesaya: "Nehlah ute ngamik kelemah kito serto nango semuo balo penyakit kito." ¹⁸ Watu Yesus mantau ura bangat di sekelilin-Neh, Yesuspun merintah isok tauk nyebera ke sebera. ¹⁹ Datailah seura Ahli Taurat serto becakap ngau-Neh, "Guru, aku tamai Nuan entah kini Nuan angkat." ²⁰ Jekuk Yesus ngauneh "Balo serigalo bisik luba serto balo buro di langit bisik sara te ngau nugau. tapi anak mensio endo bisik aro ngau ngeletak kepalo-Neh." ²¹ Seura murid ngumung ngau-Neh, "Tuhan, aku mintok ijin dulu, kok ngubur apai Ku," ²² tapi Yesus becakap ngau neh "Tamai Aku, isok neh ura mati ngubur ura mati sidok kedirik." ²³ Yesus pun naek ke dalam pera'u balo murid tamai Neh. ²⁴ Lalu te pantau, angin ribut beguruh sangat besaibdi danau sampai pera'u te ditumpa tetutup ulih aik. tapi Yesus tengah tidur. ²⁵ Lalu murid datai nguso Yesus serto ngerak Neh re penidur, jekuk sidok, "Tuhan, angkat, tulo kami ! kito tuk kelok binaso!" ²⁶ Yesus ngumung ngau sidok, "Ngapo kitak takut, hui kitak ute kura iman?" Lalu, Neh bediri serto nyuruh angin ribut tamai danau yok jadi tenang. ²⁷ seudah yok, ura-ura pun sangat iran serto ngumung ngau pangan te lain "Ura macam apo Neh tuk, sampai angin ribut tamai danau pun nurut apo jekuk-Neh?" ²⁸ Pas watu Yesus datai di sebera danau, di daerah ura Gadara, ado duo ura te kerasuk sitan datai nguang-Neh. Sidok pansut re kubur sajo sangat ganas sampai endo bisik ura tauk mansok jalai yok. ²⁹ Te perati, sidok pun mangkas mukau, jekukneh, "Apo urus Nuan ngau kami, hai Anak Allah? Apo Nuan datai kok nyikso kami seapan waktuneh?." ³⁰ Endo jauh re sidok bisik balo babi tengah ngegok pemakai. ³¹ Sitan-sitan yok mintok ngau-Neh serto madah, "Bilo Nuan mauk ngusir kami, suruhlah kami tamok ke dalam babi yok." ³² Yesus pun ngumung ngau sidok, "Rarilah!" sidok lalu keluar serto tamok ke dalam balo babi yok. udah yok, semuo babi yok pun terjun re tebin tanah tamok ke dalam danau lalu mati dalam aik. ³³ Ura te ngunan pengkidup babi yok bebedap, lalu neh tamok ke tengah kuto, begisah semuo apo te di pantau neh, temasuk utan tejadi ngau ura-ura te dirasuk sitan. ³⁴ seluruh kuto keluar isok tauk betemu Yesus. watu sidok mantau Yesus, sidok mintok-Neh angkat re daerah sidok.