¹ Seudah Yesus lahir di Betlehem, diYudea, pas jaman Rajo Herodes, datai ura-ura Majus re timur ke Yerusalem. ² Sidok betanyok, "Dini Neh, Rajo ura Yahudi te baru lahir yok? ute kami udah mantau binta-Neh di timur, serto kami datai kok nyemah-Neh." ³ watu Rajo Herodes menin pekaro yok, sajo gelisah ati neh serto semuo Yerusalem te tamai neh. ⁴ Lalu, neh ngumpul semuo balo imam kepalo serto ahli taurat banso yok. Neh ngeritik asil penera re sidok, aro Kristus te diperanak. ⁵ Jekuk sidok ngusoneh, "Di Betlehem, aro tanah Yudea, upo tuk te ditulis uleh nabi: ⁶ Kebok, engkau Betlehem, aro tanah Yuhuda, samo sekalik bukan te palin renyai disentaro balo penguaso Yehuda,ute re kitak kok mansut se'ura pemimpin te mau'k ngemalo umat-Ku, Israel."' ⁷ Udah yok, Herodes secaro sunyik-sunyik ngumai ura majus, mintok kepesti re sidok utan te besinar upo binta de timur. ⁸ Lalu, neh nyuruh sidok ke Betlehem serto madah, "Angkatkin, selidek serto teliti utan tenta Nebiak yok. bilo, kitak udah nemu-Neh, padah ngau aku isok aku tau'k datai gok serto tau'k nyemah-Neh." ⁹ Setelah,menin'd apo jekuk rajo, sidok angkat. Lalu,mantau binta te sidok pantau de timur te nunyok jalai ngau sidok nyampai aro te di tuju serto betegok di darat aro Nebiak yok bisi'k. ¹⁰ Watu merati binta yok, sidok sajo gago, serto ngau ati te senang benar. ¹¹ seudah tamok ke dalam dangau, sidok betemu ngau Nebiak tamai Maria inai-neh. lalu sidok tesungkur besujud nyemah-Neh.udah yok, sidok pun mukok balo badah pema'ik serto merik pesemah ngau-Neh. balo utan emas, kemenyan, tamai mur. ¹² Ute sidok dipadah dalam mimpi nusah bekalih nguso Herodes, sidok pun pulai ke tanah aik dirik niti jalai lain. ¹³ Seudah ura Majus yok angkat pulai, Malaikat Tuhan ngenampak ngau Yusuf dalam mimpi serto madah neh upo tuk, Jagolah re penidur, bai'k Nebiak yok tamai umak-Neh kitak lari kin ke tanah Mesir. Nugau din sampai Aku madah ngau nuan(ikam) ute Herodes mau'k ngegok Nebiak yok serto kok munuh-Neh." ¹⁴ Yusuf pun tekejut serto te jago re penidurneh lalu ngemaik Nebiak yok tamai umak-Neh malam yok angkat ngunsi ke Mesir, ¹⁵ sampai Herodes mati sidok nugau di mesir ute dah digenap apo te difirman Tuhan ngelalu Nabi:" Re Mesir Aku ngumai Anak-ku." ¹⁶ Setelah, Herodes ketauk ute neh di kemelo uleh ura-ura Majus, neh sajo sangat luat serto merintah ngau munuh semuo nebiak lelaki di Betlehem serto seluruh Wilayah te semak neh, te umur duo taun ke baruh, sesuai ngau waktu te di ketauk re ura-ura Majus. ¹⁷ Semuo yok genap apo te dipadah uleh Nabi Yeremia: ¹⁸ "Te penin'd ingan di Rama, tangis sabak serto keluh te sangat piluk. Rahel nangis ke anak-anakneh, serto endo mau'k de ibur ute sidok udah nisik agik." ¹⁹ Seudah Herodes mati, Malaikat Tuhan ngenampak dirik ngau Yusuf dalam mimpi de Mesir, ²⁰ jekukneh: "Jagolah re penidur, amik Nebiak tamai umak-Neh angkat kitak ke tanah Israel, ute ura-ura te berusaho kok munuh Nebiak yok pituk udah mati." ²¹ Lalu, neh angkat serto ngemaik Anak tamai umak-Neh bekalih ke tanah Israel. ²² Tapi, watu neh menin'd ute Arkhelaus merintah Yudea nganti Herodes, apai neh, Yusuf takut ngua ke aro yok. ute neh diperingat dalam mimpi, Neh ngua ke aro Galilea. ²³ Yusuf datai serto nugau enta sebuah kuto te di berik damo Nazaret isok genaplah apo te udah disampai uleh balo nabi, "Neh tentu disebut 'Ura Nazaret."