¹ Enam ari agik, Yesus ngemaik Petrus, Yakobus, serto Yohanes menyadik Yakobus, maik sidok naek ke gunung te tingik, ngau caro kedirik. ² Lalu, Yesus berubah rupo Neh di muo sidok. muo-Neh besinar upo matoari serto pakaian-Neh jadi putih becahyo. ³ Lalu te pantau ulih sidok nampak Musa tamai Elia, tengah becakap ngau Yesus. ⁴ Petrus pun ngumung ngau Yesus, "Tuhan, sajo baek bagi kito lagik nugau dituk, aku mauk niri tigo mentiro dituk, sutik ngau-Nuan, sutik ngau Musa, serto sutik lagik ngau Elia." ⁵ Watu Petrus lagik becakap, datai awan te tera nutup sidok, serto bisik ingan re dalam awan yok, "Tuk lah Anak-Ku te Aku kasih, nguso-Neh Aku bekenan. Penindlah Neh." ⁶ Watu balo murud-murid menind yok, sidok tesungkur mato muo sampai ke tanah serto sangat takut. ⁷ Tapi, Yesus datai lalu nyentuh sidok, jekuk-Neh, "Angkatlah serto nusah takut." ⁸ Watu sidok angkat nengkadah, sidok endo bisik merati sapo pun, selain Yesus kedirik. ⁹ Watu sidok turun re gunung, Yesus bepesan ngau sidok, jekuk-Neh, "Nusah ngisah ke ura apo te kitak pantau sampai Anak Mensio di bangkit re sentaro ura mat." ¹⁰ Balo murid pun betanyok ngau-Neh, "Lalu, ngapo ahli-ahli Taurat madah ute Elia arus datai lebih dulu?" ¹¹ Yesus nyaut, "Elia sajo udah datai lebih dulu tamai mauk mulih ke semuo utan. ¹² Tapi, Aku madah ngau kitak ute Elia udah datai, tapi sidok endo ngelaloneh serto nebiat neh nurut kemauk sidok. piyok gok Anak Mensio tentu menderito di tangan sidok." ¹³ Barulah balo murid ngerti ute Neh becakap ngau sidok tenta Yohanes pembaptis. ¹⁴ Watu Yesus tamai balo murid datai nguso ura bangat, seura lelaki datai nguso Yesus lalu besujud nyemah di muo-Neh samil madah, ¹⁵ "Tuhan, kasihlah anak aku neh kenok pemedih gilo babi sajo sangat menderito. neh rajin jatuk ke dalam api tamai tamok ke aik. ¹⁶ Aku udah ngemaikneh ngau balo murid-Nuan, tapi sidok endo tauk nyemuh neh." ¹⁷ Yesus nyaut, "Uoi, Kitak keturun ute endo pecayok tamai sesat! Pelamah lagik Aku tauk nugau besamo ngau kitak? Pelamah lagik Aku arus besabar teradap kitak? Bai'ik kituk nebiak yok nguso-Aku." ¹⁸ Lalu Yesus mentak roh jai'i yok sampai keluar re nebiak lelaki yok, nebiak yok pun semuh saat yok gok. ¹⁹ Udah yok balo murid datai nguso Yesus, watu sidok kedirik ngau-Neh serto betanyok, "Ngapo kami endo tauk ngusir ruh jai" i yok?" ²⁰ Jekuk-Neh ngau sidok, "Ute iman kitak te renyai. Aku madah te sebenarneh ngau kitak, bilo kitak ngempu iman sebesai igik ensabi genno, kitak tauk madah gunung tuk, 'Pinahlah re aro tuk, kin!' sekelin yok gunung yok tentu pinah. Endo bisik te iran bagi kitak. ²¹ [tapi ruh jai'i jenis tuk tauk diusir caro berdu'o tamai puaso."] ²² Watu Yesus tamai balo murid-Neh tengah bekumpul di wilayah, Neh ngumung ngau sidok, "Anak Mensio kok diserah ke dalam tangan mensio, ²³ sidok kok munuh-Neh, lalu Neh pun bangkit ari ke tigo." Udah menind yok, balo murid-Neh jadi sangat be sedih. ²⁴ Watu sidok datai di Kapernaum, balo pengumpul pajak nagih seura setaun. ngumung ngau Petrus, jekuk sidok "Apo guru kitak mayar pajak 2 dirham?" ²⁵ Petrus nyaut, "Aok". Watu tamok ke dalam dangau Yesus lebih dulu becakap ngau neh, " Upoketi penapat nuan Simon? Re sapokah rajo-rajo dunio tuk nagih bea tamai pajak? Re balo anak atau re ura lain?" ²⁶ Watu Petrus nyawab "Re ura lain," Yesus pun madah neh, "kalau piyok, bereti anak-anak neh te bibas. ²⁷ Tapi, isok kito endo nyingo sidok, angkat kin ke danau lalu ngail. Amik ikan te pertamo nangkap lalu nuan bukok mulutneh, nuan tentu nemu sekipin stater. amik duit nyok lalu berik ngau sidok, bagi-Aku tamai bagi nuan."