¹ Pitu'k, tenta balo pekar'o te kita'k tulis nguso aku: yo'k lah bae'k balo te laki ndo ko'k negu'k te betino'k. ² Tapi, ker'no bisi'k te bezina, tiap balo laki sebae'kneh mpu'k bini kediri'k tamai te betino'k mpu'k balo laki kediri'k. ³ Laki aru's ngemenuh kewajiban neh ngau bini diri'k , piyo'k go'k bini ngau laki diri'k neh. ⁴ Bini ndo bekuaso ter'adap tubuh neh kediri'k, tapi laki te bekuaso. Piyo'k go'k laki ndo bekuaso ter'adap tubuh neh kediri'k, tapi bini neh te bekuaso. ⁵ Nang kita'k bepera'ro'k kecuali kita'k samo ko'k ngau sementar'o watu bia'r kita'k leluaso meri'k watu ngau kita'k berdoa. Dah yo'k uduplah besamo agi'k bia'r Iblis ndo ncubo kita'k ker'no kelemah kita'k te ngendali diri'k. ⁶ Tapi aku madah kita'k tu'k te ketat, tapi ndo ngau per'intah. ⁷ Aku ngara'p semuo ur'a upo aku, tapi tiap ur'a mpu'k kar'unio kediri'k dar'i Allah, te seur'a enta pekar'o tu'k, tamai te lain enta pekar'o yo'k. ⁸ Nguso te ndo kawin tamai te balo jan'o, aku madah te bae'k ngau sido'k anti'k tetap upo aku. ⁹ Tapi anti'k sido'k ndo tau'k ngedali diri'k, lebi'h bae'k sido'k kawin. Sebab kawin dar'i pado angus padai hawo nafsu. ¹⁰ Nguso te kawin, aku meri'k balo per'intah (bukan dar'i aku tapi dar'i Tuhan), bini ndo tau'k nudi laki neh, ¹¹ ( tapi anti'k dah telanyu'r nudi ke laki, neh tetap ndo kawin, atau damai tamai laki neh agi'k), dah yo'k laki ndo tau'k nyer'ai ke bini neh. ¹² Selebi'h neh, aku madah (aku bukan Tuhan ) kalau bisi'k menyanak te mpu'k bini ndo pecayo'k tamai betino'k yo'k ko'k idup besamo neh, nanglah nyer'ai bini neh yo'k. ¹³ Piyo'k go'k anti'k bini mpu'k laki te ndo pecayo'k, tamai laki yo'k ko'k idup besamo neh, nang nudi ke laki neh yo'k. ¹⁴ Ker'no laki te ndo pecayo'k yo'k dikudus oli'h bini neh, dah yo'k bini te ndo pecayo'k dikudus oli'h laki neh. anti'k ndo piyo'k, balo anak bia'k najis, tapi piyu'k sido'k dah kudus. ¹⁵ Anti'k kita'k te ndo pecayo'k ko'k bepisah, bia'r em neh bepisah. Dalam pekar'o tu'k balo menyanak ndo ter'ikat agi'k. Tapi Allah dah ngumai kita'k ngau idup enta damai sejahtera. ¹⁶ Ker'no hai bini, upo ni ketau'k kalau kita'k em te nyelamat laki kita'k kediri'k? Atau, hai laki kita'k em te nyelamat bini kita'k kediri'k? ¹⁷ Tapi, upo te dah Tuhan tetep ke setiap ur'a, upo Allah udah ngumai ke sido'k kediri'k - kediri'k, tetap em idup dalam keadaan upo yo'k. Jadi upo yo'k go'k aku per'intah ke semuo jemaat. ¹⁸ Apokah bisi'k ur'a te dikumai watu neh dah disunat? Nang neh ngayap te balo tan'o sunat? Adokah te watu dikumai neh pan besunat? Nang neh besunat. ¹⁹ Sebab, te besunat tamai ndo besunat, ndolah penting. Tapi, te penting adolah taat ngau balo per'intah Allah. ²⁰ Tiap ur'a ar'us nugau te kadaan upo watu neh dikumai. ²¹ Apokah kita'k budak watu dikumai? Nanag kita'k kwati'r ke pekar'o tu'k. Tapi kalau kita'k tau'k jadi ur'a te merdeka, lebi'h bae'k guno em kesempatan tu'k. ²² Sebab, neh watu dikumai dalam Tuhan budak, neh yo'k adolah ur'a te nerdeka mpu'k Tuhan. Piyo'k go'k anti'k ur'a te merdeka dikumai, neh adolah budak Kristus. ²³ Kita'k dah ditebus ngau reg'o lunas, ker'no yo'k nanglah kita'k jadi budak mensio. ²⁴ Balo menyanak aru's lah tiap ur'a tetap nugau besamo Allah, dalam keadaan watu neh dikumai. ²⁵ Pitu'k, tenta balo ur'a et pan kawin, aku ndo isi'k per'intah dar'i Tuhan. Tapi, aku meri'k penapat sebagai ur'a, te oli'h belas kasih Tuhan tau'k dipecayo'k. ²⁶ Aku ngangap pekar'o tu'k bae'k enta keadaan te sulit watu tu'k, yo'k lebi'h bagi seseur'a ngau tetap nugau upo apo adoneh. ²⁷ Apokah kita'k ter'ikat ngau seur'a bini? Nang ko'k ber'usaha becerai. Apokah kita'k ter'ikat ngau bini? Nusah kita'k nggo'k bini. ²⁸ Tapi anti'k kita'k kawin, kita'k ndo bedosa, anti'k betino'k kawin, neh ndo bedosa. Tapi, sido'k te kawin ko'k ngaso balo pemedi'h idup duniowi, aku ko'k kita'k tehida'r dar'i balo pekar'o yu'k ²⁹ Balo menyanak, masud aku watu tu'k dah singkat. Jadi mulai pitu'k, bia'r em sido'k te mpu'k bini, idup macam sido'k te ndo mpu'k neh, ³⁰ sido'k te nangis macam upo ndo nangis, sido'k te gag'o macam upo te ndo gag'o, sido'k te meli upo te ndo mpu'k, ³¹ tamai sido'k te nguno balo pekar'o dunio tu'k, upo te ndo nguno ke neh. Sebab, dunio tu'k tengah lenyau. ³² Aku ko'k kita'k bebas dar'i te nyur'uh kwati'r. ur'a te ndo kawin miki'r balo pekar'o tenta Tuhan. ket'i neh tau'k nyenang ke Tuhan. ³³ Tapi, ur'a te kawin miki'r balo pekar'o dunio, ket'i neh tau'k nyenang ke bini, ³⁴ dah yo'k pemantau neh ndo suti'k. Betino'k te ndo kawin tamai balo dar'o kwati'r ngau balo pekar'o tenta Tuhan bia'r neh tau'k jadi kudus, bae'k tubuh atau rohneh. Tapi betino'k te kawin kwati'r ngau balo pekar'o dunio tu'k, ket'i neh tau'k nyur'uh laki gag'o. ³⁵ Aku madah pekar'o tu'k so'k kita'k unt'o, bukan ko'k ngau ngakal kita'k, tapi ngau pekar'o te bae'k bia'r pelayan kita'k nguso Tuhann ndo te ar'u. ³⁶ Anti'k bisi'k ur'a te ngangap diri'k neh dah mulah te ndo bae'k nguso te dar'o ker,no betino'k yo'k dah tuo tamai upo yo'k sear'usneh, bia'r em apo te ko'k dipulah neh, neh ndo bedosa; so'k sido'k kawin. ³⁷ Tapi, neh dah bae'k te enta ati, te ndo dipaksa, mpu'k kuaso te diko'k neh kediri'k, tamai enta ati neh ndo ko'k kawin ngau betino'k yo'k, justr'u neh betina'k ngau te bae'k. ³⁸ Anti'k neh kawin ngau betino'k yo'k neh mulah te bena'r, tapi anti'k neh ndo kawin ngau betino'k yo'k, pempulah neh yo'k pun bae'k. ³⁹ Bini ter'ikat selamo laki neh lagi'k idup, anti'k laki neh dah mati, neh tau'k kawin ngau sapo te dimau'k, asal ur'a yo'k dienta Tuhan. ⁴⁰ Tapi nur'ut aku, neh lebi'h bae;k enta keadaan yo'k,tamai nur'ut aku, aku go'k mpu'k Roh Allah.