¹ Kejar em kasi'h tamai nyan ngau te bena'r-bena'r balo karunio rohani, teru'tamo bia'r kita'k tau'k benubuat. ² Sebab, sapo te ngumong enta bahaso dilah, ndo ngumong ngau mensio, tapi nguso Allah; ker'no ndo si'k ur'a te nger'ti, tapi neh madah balo pekar'o te re'sio enta roh. ³ Tapi, ur'a te benubuat ngumong nguso mensio ngau membangun, negu'r, yamai ngibu'r. ⁴ Balo ur'a te ngumong enta bahaso dilah membangun diri'k neh kediri'k, tapi ur'a te benubuat membangun jemaat. ⁵ Aku ngara'p kita'k semuo ngumong enta balo bahaso dilah, tapi lebi'h agi'k bia'r kita'k benubuat. Ur'a te benubuat lebi'h besai dar'i pado ur'a te ngumong enta bahaso dilah, kecuali anti'k neh menejemah go'k sampai jemaat tau'k neri'mo'k peneguhan. ⁶ Balo menyanak, anti'k aku datai nguso kita'k tamai ngumong enta balo bahaso roh, apo unt'oneh ngau kita'k, kecuali anti'k aku ngumong nguso kita'k ngau penyato, pengetau'k, nubuat, atau te diaja'r? ⁷ Bahkan, balo bar'a te ndo benyawo, upo suling atau kecapi te ngelua'r ingan, Anti'k ndo ngelua'r ke te ndo samo enta ingan neh, macam ni ur'a tau'k ketau'k alat apo te lagi'k digura'u, suling atau kecapi? ⁸ Atau tru'mpit ngelua'r ingan te ndo jelas, sapokah te nyiap diri'k ngau beper'a? ⁹ Piyo'k go'k kita'k. Anti'k ngau dilah kita'k, ngucap balo kato te ndo tau'k dinger'ti, macam ni ur'a ketau'k apo te dipadah? Seula'h-ulah kita'k ngumong ngau udar'o. ¹⁰ Amang, ado piyo'k bangat jenis bahaso didunio tamai ndo isi'k suti'k pun dar'i padoneh te ndo bere'ti. ¹¹ Tapi, anti'k aku ndo ketau'k re'ti bahaso yo'k, aku ko'k jadi ur'a lua'r ngau neh te ngumong, tamai ur'a te ngumong yo'k jadi ur'a lua'r ngau aku. ¹² Anti'k piyo'k kita'k, ker'no kita'k bena'r-bena'r beru'saho ngau balo karu'nio, beru'saho em bia'r belebi'h ngau membangun jemaat. ¹³ Ker'no yo'k, aru's em ur'a te ngumong enta bahaso dilah bedoa bia'r neh tau'k menejemah nyo'k. ¹⁴ Sebab, anti'k aku bedoa enta bahaso dilah, roh aku bedoa, tapi pemiki'r aku ndo bebuah. ¹⁵ Jadi, apo te aru's aku pulah? Aku ko'k bedoa ngau roh aku tamai aku ko'k bedoa ngau pemiki'r aku. Aku ko'k nyanyi ngau roh aku tamai aku ko'k nyanyi ngau pemiki'r aku. ¹⁶ Anti'k kita'k cumo ngucap syuku'r ngau roh kita'k, macam ni ngau ur'a, te bisi'k senenta ndo mpu'k karu'nio yo'k, tau'k madah," Amin," atas pengucap syuku'r kita'k yo'k ker'no neh ndo nger'ti apo te kita'k padah? ¹⁷ Kalaupun kita'k ngucap syuku'r ngau bae'k, tapi ur'a lain ndo dibangun. ¹⁸ Aku besyuku'r ke Allah kalau aku ngumong enta balo bahaso dilah lebi'h dar'i kita'k semuo. ¹⁹ Tapi, enta jemaat, aku lebi'h bae'k ngumong limo kato ngau pemiki'r aku bia'r aku tau'k go'k ngaja'r ur'a lain, dar'i pado sepuluh ri'bu kato enta bahaso dilah. ²⁰ Balo menyanak nang jadi ana'k bia'k enta pemiki'r kita'k. Jadilah ana'k bia'k re'nyai enta te ja'i, tapi enta pemiki'r kita'k jadi em dewaso! ²¹ Upo te ditulis enta Hukum Taurat, "Uli'h balo ur'a te mpu'k bahaso lua'r tamai uli'h mulut balo ur'a lua'r, aku ko'k madah nguso bangso tu'k, tapi sido'k ndo ningo ke Aku, firman Tuhan." ²² Jadi, balo bahaso dilah yo'k tan'o, ndo ngau ur'a te pecayo'k, tapi ngau ur'a te ndo pecayo'k, sementar'o benubuat yo'k tan'o, ndo ngau ur'a te ndo pecayo'k, tapi ngau ur'a te pecayo'k. ²³ Anti'k semuo jemaat bekumpul besamo enta suatu tempat, tamai semuoneh ngumong ngau balo bahaso dilah, lalu bisi'k balo ur'a te ndo nger'ti atau balo ur'a te ndo pecayo'k tamo'k, ndokah sido'k madah kalau kita'k dah gilo? ²⁴ Tapi, anti'k semuo benubuat, dah yo'k bisi'k ado te ndo pecayo'k atau te ndo nger'ti tamo'k, neh disuru'h sada'r uli'h semuoneh tamai dinilai uli'h semuoneh. ²⁵ Re'sio enta ati neh ko'k nyato, neh tesungku'r, tamai nyembah Allah, ngaku kalau sebena'rneh Allah bisi'k diantar'o kita'k. ²⁶ Jadi, seudahneh macam ni, balo menyanak? Anti'k kita'k bekumpul,kediri'k- kediri'k mpu'k mazmur, te diaja'r. te dinyato, bahaso dilah, atau suti'k penafsi'r. Bia'r em semuo tu'k dipulah ngau membangun. ²⁷ Anti'k bisi'k te bebahaso dilah, bia'r em cumo duo atau pali'n bangat tigo ur'a, tamai kediri'k-kediri'k secar'o beganti, dah yo'k aru's bisi'k ur'a lain te menejemahneh. ²⁸ Tapi anti'k ndo si'k ur'a te menejemah, neh aru's nugau enta jemaat tamai bia'r em neh ngumong nguso diri'k neh kediri'k tamai nguso Allah. ²⁹ Bia'r em cumo duo atau tigo nabi te ngumong tamai te lain memiki'r keneh. ³⁰ Tapi, anti'k te dinyato dipulah ngau ur'a lain te dudo'k dio'k, ur'a te petamo aru's nugau. ³¹ Sebab, kita'k semuo tau'k benubuat suti'k demi suti'k, bia'r semuoneh tau'k belaja'r tamai semuoneh tau'k dikuat. ³² Balo roh balo nabi taku't nguso balo nabi. ³³ Sebab, Allah ndo Allah dar'i te kacau tapi damai sejahtera, samo upo enta semuo jemaat balo ur'a kudus. ³⁴ betino'k aru's tetap nugau enta jemaat ker'no sido'k ndo disuru'h ngau ngumong, tapi aru's takut upo te dipadah Hukum Taurat. ³⁵ Anti'k bisi'k utan te mau'k dipelaja'r, bia'r em sido'k nanyo'k nguso lakineh diru'mah ker'no yo'k nyuru'h malu ke betino'k kalau ngumong enta jemaat. ³⁶ Apokah firman Allah bera'sal dar'i kita'k? Atau, apokah cumo ngau kita'k geno firman yo'k dipadah? ³⁷ Anti'k bisi'k te bepiki'r kalau neh yo'k seur'a nabi atau ur'a te rohani, so'k neh ngelalo kalau balo pekar'o te aku tulis nguso kita'k yo'k perintah Tuhan. ³⁸ Anti'k bisi'k ur'a te ndo ngelalo tu'k, neh ndo dikelalo. ³⁹ Jadi, balo menyanak aku, usahokan bena'r-bena'r ngau benubuat, tamai nang nidah ur'a ngumong enta balo bahaso dilah. ⁴⁰ Tapi semuoneh aru's dipulah ngau sopan tamai tera'tu'r.