Yesus nyemuh ke urang te pedih kusta ¹ Seudah Yesus turun re bukit, urang mayuh begerumung nurut Ya. ² Udek datai surang te pedih kusta ngau-Ya, lalu sujud nyemah-Ya, ngau banai: " Tuan, antik Tuan kak, Tuan tau nyemuh ke aku." ³ Udek Yesus nyurung ke jari, nyapai uraang yaak ngau banai: Aku kak, jadi em nuan tahir." Sekelin yak ugak tahir me urang yak ari pemedih kusta. ⁴ Udek Yesus banai ngau ya: " Kingat ke, nang nuan madah ke hal tuk ngau sapa-sapa, tapi angkat ke, pedak ke dirik ngau imam ngau berik ke persembahan te de padah Musa, sebagai bukti bagi sidak." ⁷ Yesus nyemuh ke anak buah perwira de Kapernaum ⁵ Rama Yesus tamak ke Kapernaum, datai surang perwira betemu ngau mohon ke-Ya: ⁶ " Tuan, anak buahku tegalai lemah de rumah empadai tungkut, ngau ya sangaat sisa." Yesus nyaut: " Aku datai nyemuh ke ya." ⁸ Tapi saut perwira yak ngau Ya: " Tuan, aku ndai pantas nerima Tuan de rumahku, banai na seleka, maka anak buah aku yak semuh. ⁹ Empadai aku tuk anak buah ugak, aku bisik anak buah agik, antik aku madah anak buahku: Angkat!, maka ya angkat, ngau surang agik: pulai!, ya sik datai, ngau: Kerja ke yak!, ya sik ngerja ke yak." ¹⁰ Udah Yesus ninga hal yak, Ya iran ngau banai ngau sidak te tamai Ya: Aku madah kitak, sebenar Aku paan suah nemu iman sebesai yak dentara urang Israel. ¹¹ Aku madah kitak: Mayuh urang datai de timur, re barat, ngau duduk makai tamai Abraham, Ishak ngau Yakub alaam kerajaan surga. ¹² Udek anak-anak kerajaan yak desempalung ke pengkerang te palin keleman, din me te bisik ratap ngau kerit gigi. ¹³ Udek Yesus banai ngau perwira yak: Pulai kin ngau jadi upa te nuan pecayak yak." Rama yak ugak, semuh aanak buah ya. ¹⁴ Sepenatai ke langkau Petrus, Yesus medak mentua Petrus te inuk tegalai empadai tabin. ¹⁵ Depegai-Ya jari ibuk yak, langsung ayap tabin ya. Ya lansung angkat ngau ngelayan Yesus. ¹⁶ Dah kak malam ari, mayuh urang te kesarung sitan debaik ngau Yesus, cuma ngau sepatah kata Yesus ngusir roh-roh jaik yak ngau nyemuh ke urang-urang te pedih. ¹⁷ Hak yak isak genap te defirman ke nabi Yesaya: " Ya yak me te nangung kelemah ngau pemedih kita." ¹⁸ Rama Yesus medak urang mayuh nurut Ya, Ya nyuruh angkat ke seberang. ¹⁹ Udek datau surang ahli Taurat, banai ngau Ya: " Guru aku kak tamai Nuan, kini kini nuan angkat." ²⁰ Yesus nyaut ya: Serigala bisik lubang, burung bisik sarang, tapi Anak mensia ndai sik pengkerang te tau ngau ngeletak kepalak Ya." ²¹ Surang agik, salah sikuk re murid Ya, banai ngau Ya: "Tuhan, sagi ke aku angkat lau ngubur ke apak aku." ²² Tapi Yesus nyaut ya: "Tamai na aku, isak urang mati ngubur ke urang mati." ²³ Udek Yesus naik kalam perau seturut bala murid-murid-Ya. ²⁴ Sekelin yak ribut kayah de danau yak, sampai perau kenak ulak, tapi Yesus tinuk. ²⁵ Bala murid datai kiak, neguk Ya, jekuh sidak: "Tuhan, tulung, kita benasa." ²⁶ Ya banai ngau sidak: "Nama kitak takut? kitak te ndai pecayak?" Udek Yesus angkat, merak ribut ngau danau yak, udek danau jadi tenanag nar. ²⁷ Iran lah sidak, jekuh: "Sapa mensia tuk? sampai sampai ribut pun nunak te jekuh Ya?" ²⁸ Sepenatai de seberang, daerah Gadara, dua urang te kesarung datai ari belayan kubur betemu ngau Yesus. Sidak matang nyuruh takut, nyak mek nyuruh urang ndai sik tekik mansak jalai yak. ²⁹ Sidak menciak, jekuh: "Nama urusan dirik ngau kami, ui Anak Allah? Adai mek Dirik kak nyisa kami seapan senta?" ³⁰ Ndai jauh re sidak, bala babi ketengah enggak pemakai. ³¹ Sitan-sitan te diyak mintak muhun ngau Yesus, jekuh sidak: "Antik Dirik ngusir kami, isak ke na kami pinah kalam babi-babai yak." ³² Yesus banai ngau sidak: "Angkat kin!" Udek keluar mek sidak lalu tamak kalam babi yak. Udek semua babi yak terjun re jurang ke danau, lalu mati alam aik. ³³ Udek penyaga babi yak rari, sepenatai ya de kuta degisah ke ya semua te tadek, temasuk urang-urang te kesarung sitan. ³⁴ Udek, keluar semua bala urang de kuta yak, lalu nemu Yesus, sidak nesak Ya nudi ke kuta yak.