Penyala ikan jadi penyala mensia ¹ Bisik sekalik Yesus bediri de pantai lepung Genesaret, sedang urang mayuh ngerumun Ya kak ninga ke firman Allah. ² Ya medak dua perau de sisi pantai. Bala nelayan dah turun ketengah masuk jala. ³ Ya naik kalam salah sutik perau diak, perau Simon, ngau nyuruh ya ngejang ke perau jauh ikit re pantai. Udek Ya duduk ngau ngajar urang mayuh r'atau perau. ⁴ Udah temuk banai, Ya banai ngau Simon: "Kejang ke perau re te dalam, sangkau ke jala mih ngau nangkap ikan." ⁵ Saut Simon: "Guru, dah semalam suntik kami manting ngering, ngau kami ndai sik nangkap nama-nama, tapi empadai Nuan nyuruh, ku sangkau ugak me jala tuk." ⁶ Udah sidak ngereja piak, sidak nangkap mayuh ikan besai, nyak nyuruh jala sidak mulai teridang. ⁷ udek sidak merik isarat ngau kaban-kaban sidak de perau bukai isak sidak datai nulung kiak. Ngau sidak yak datai, udek sidak betulung ngisik ke dua perau yak ngau ikan sampai perau kak temgelam. ⁸ Rama Petrus medak yak, ya tesungkam de mua Yesus ngau banai: "Tuhan, angkat re aku, empadai aku tuk urang bedosa." ⁹ Empadai ya ngau sidak te tamai ya tebelenga empadai pemayuh ikan te sidak tangkap; ¹⁰ Piak ugak Yakobus ngau Yohanes, anak-anak Zebedeus, te jadi kaban Simon. jekuh Yesus ngau Simon: "Nang takut, mulai re pituk mih jadi penyala mensia." ¹¹ Udah sidak ngemaik perau-perau sidak ke darat, sidak nudi ke semua utai, udek tamai Yesus. ¹² Bisik sekalik yesus nugau de sigik kota. Diak bisik urang te penuh kusta. Rama ya medak Yesus, ya tesungkur ngau mohon: "Tuan, antik Tuan kak, Tuan tau nahir ke aku." ¹³ Udek Yesus ngulur ke jari ya, nyapai urang yak ngau banai: "Aku kak, tahir me." Sekelin yak ayap pemedih kusta. ¹⁴ Yesus ndai nyagi mensia yak madah urang ngau banai: "Angkat, padah ke dirik mih ngau imam, ngau berik persembahan pentahiran mih, upa te deperintah ke Musa, sebagai bukti bagi sidak." ¹⁵ Tapi kabar tentang Yesus makin jauh tesiar ngau datai urang mayuh begerumung ngau Ya kak ninga ke Ya ngau kak desemuh ke re pemedih sidak. ¹⁶ Tapi Ya munur ke pengkerang te sunyik ngau bedoa. ¹⁷ Bisik ari rama Yesus ngajar, bisik urang farisi ngau ahli Taurat duduk ninga ke Ya. Sidak datai re semua desa de Galilea, Yudea, ngau Yerusalem. Kuasa Tuhan nyereta Ya, nyak nyuruh Ya tau nyemuh ke urang pedih. ¹⁸ Udek datai sidak nangkun urang lumpuh datau peninuk; sidak berusaha ngemaik Ya tamak ngau ngeletak ya de mua Yesus. ¹⁹ Sidak ndai dapat ngemaik ya tamak, empadai mayuh urang diak, sidak naik k'atau atap, udek mungkar atap yak, ngau nurun ke mensia yak ngau peninuk ya detengah-tengah urang mayuh de mua Yesus. ²⁰ Rama Yesus medak iman sidak, Ya banai: "Ui menyadik, dosa mih dah deampun." ²¹ Tapi ahli-ahli Taurat ngau urang Farisi bepikir alam ati sidak: "Sapa urang te menghujat Allah tuk? Sapa te tau ngampun dosa bukai re Allah kedirik?" ²² Tapi Yesus ketau pemikir sidak, udek banai ngau sidak: "Nama te kitak pikir alam ati kitak? ²³ Ni te palin mudah, madah: "Dosaa mih dah dampun atau madah: Angkat ngau bejalai am? ²⁴ Tapi isak kitak ketau, de denia Anak Mensia bekuasa ngampun dosa" - Ya banai ngau urang lumpuh yak -: "Ngau mih Ku madah, angkat, katung peninuk mih, ngau pulai ke rumah mih!" ²⁵ Ngau sekelin yak ugak, ya angkat, de mua sidak, ngatung peninuk ya ngau pulai ke rumah samil memulia ke Allah. ²⁶ Semua urang iran (takjub) udek memulia ke Allah ngau sidak takut bebenar, jekuh sidak: "Ari tuk kami dah medak bala hal te nyuruh iran." ²⁷ Udek, rama Yesus angkat keluar, Ya medak pemungut cukai benama Lewi, ketengah duduk de rumah cukai. Yesus banai ngau ya: "Buh tamai Ku!" ²⁸ Udek Lewi bediri ngau nudi ke semua utai, tamai Ya. ²⁹ Ngau Lewi mulah gawai besai untuk Ya derumah ya, ngau mayuh pemungut cukai bukai, ngau bala urang tamai Ya makai diak. ³⁰ Urang-urang Farisi ngau ahli-ahli Taurat ngerungut ngau bala murid Yesus, jekuh sidak: "Nama kitak makai minum ngau pemungut cukai ngau urang-urang bedosa?" ³¹ Saut Yesus ngau sidak, jekuh Ya: "Bukai urang sehat te merelu tabib tapi urang pedih; ³² Aku datai bukai untuk ngumai urang benar, tapi urang bedosa, isak sidak betobat." ³³ Urang-urang Farisi yak banai ugak ngau Yesus: "Murid-murid Yohanes rajin bepuasa ngau semayang, piak ugak murid-murid urang Farisi, tapi murid-murid Mih ndai." ³⁴ Saut Yesus ngau sidak: "Tau nama kaban mempelai bakas desuruh puasa, ketengah mempelai yak tamai sidak? ³⁵ Tapi bisik senta, mempelai bakas yak d'amik re sidak, rama yak me sidak puasa." ³⁶ Ya madah ke sutik ugak perumpamaan ngau sidak: "Ndai ssik urang te ngeridang kain re baju baru ngau namal baju te lamak. Antik piak, baju baru jadi teridang, udek baju baju lamak ndai cucuk ngau kain penamal re baju baru te deridang. ³⁷ Piak ugak ndai sik urang ngisik anggur te baru kalam kantung kulit te tuai, empadai antik piak, anggur te baru yak bakal ngeridang kantung ngau anggur yak bakal tebuai ngau kantung yak lelak. ³⁸ Tapi anggur te baru kalah detaruh alam kantung te baru ugak. ³⁹ Ngau ndai sik urang te dah minum anggur tuai ining minum anggur te baru, empadai ya banai: Anggur te tuai yak baik."