Kelahiran Yesus ¹ Rama yak Kaisar Agustus ngeluar ke perintah, nyuruh mendaftar ke semua urang de seluruh tanah aik. ² Tuk me pendaftaran peruba depulah rama Kirenius jadi wali negeri de Siria. ³ Nyak nyuruh semua urang angkat mendaftar ke dirik de kota sidak masing-masing. ⁴ Piak ugak me Yusuf, angkat re kota Nazaret de Galilea ke Yudea, kota Daud te benama Betlehem,--empadai ya berasal re menyanak kenturun Daud-- ⁵ isak dedaftar ke tamai Maria, tunang ya te ketengah nganung. ⁶ Ketengah sidak diak, senta ngau Maria beranak, ⁷ ngau ya beranak bakas, anak tuai, udek debalut ngau ampin, depegalai ya alam palung empadai ndai sik pengkerang ngau bemalam. ⁸ De daaerah yak bisik bala gembala te nugau de padang nyaga pengidup sidak rama malam. ⁹ Mungkak bediri malaikat Tuhan damping sidak ngau kemuliaan Tuhan mancak sidak, ngau sidak matang takut bebenar. ¹⁰ Udek jekuh malaikat yak ngau sidak: "Nang takut, empadai akau madah ngau kitaak ke berita te nyuruh semua bansa gaga: ¹¹ Ari tuk dah lahir bagi kitak Juruselamat, Kristus Tuhan de kota Daud. ¹² Ngau tuk kecelik bagi kitak: "Kitak nemu nemiaak debalut ngau ampin depegalai alam palung." ¹³ Sekelin yak tampak mayuh bala tentara surga tamai malaikat muji Allah, jekuh sidak: ¹⁴ "Kemuliaan bagi Allah de tempat te palin tingik ngau damai sejahtera de tanah aik dentara mensia te bekenan ngau Ya." ¹⁵ Udah malaikat-malaikat yak nudi ke sidak ngau bekalih ke surga, gembala-gembala diak banai sama direk: "Buh kita angkat ke Betlehem, medak nama te tejadi din, upa te depadah Tuhan ngau kita." ¹⁶ Udek sidak sigat-sigat angkat betemu ngau Maria, Yusuf ngau nemiak te depegalai alam paalungan. ¹⁷ Ngau rama sidak medak Ya, sidak madah ke nama te depadah ke ngau sidak tentang nemiak yak. ¹⁸ Ngau semua urang iran ninga nama te dekisah ke bala gembala ngau sidak. ¹⁹ Tapi Maria naruh semua yak alam ati ngau ngerenung ke yak. ²⁰ Udek bekalih bala gembala yak samil muji ngau memulia ke Allah empadai semua te sidak dinga ngau sidak pedak, semua sesuai ngau nama te depadah ngau sidak. ²¹ Rama genap lapan ari, Ya desunat ngau deberik nama Yesus, nama te detelah malaikat s'apan Ya dekanung inai Ya. ²² Ngau genap rama pentahiran, menurut ukum Taurat Musa, sidak ngemaik Ya ke Yerusalem untuk nyerah ke Ya ngau Tuhan, ²³ upa te tetulis alam ukum Tuhan: "Semua anak bakas kalah dekudus ke bagi Allah", ²⁴ ngau untuk mempersembah ke kurban menurut nama te defirman ke alam ukum Tuhan, sepasang burung tekukur ngau dua ikuk anak burung merpati. ²⁵ De yerusalem bisik urang benama Simeon. Ya urang benar ngau saleh te nunguk penghiburan bagi Israel. Roh Kudus bisik atau ya, ²⁶ ngau ya dah denyatakan Roh Kudus, antik ya ndai bakal mati s'apan medak Mesias, Ya te d'urapi Tuhan. ²⁷ Ya datai ke Bait Allah ulih Roh Kudus. Rama Yesus, Nemiak yak, debaik tamak apai inai Ya untuk mulah ngau Ya nama te detentu ke ukum Taurat, ²⁸ ya nyamut Nemiak yak, samil muji Allah, jekuh ya: ²⁹ "Pituk, Tuhan, isak ke hamba Nuan tuk pulai alam damai sejahtera sesuai ngau firman Nuan, ³⁰ empadai mataku dah medak keselamatan te re Nuan, ³¹ te dah Nuan sedia d'adap semua bansa, ³² yak me terang te jadi penyataan bagi bansa-bansa bukai ngau jadi kemuliaan bagi umat Nuan, Israel." ³³ Apai ngau inai Ya iran ngau nama semua te depadah tentang Ya. ³⁴ udek Simeon ngemerekat sidak, samil banai ngau Maria, inai Nemiak yak: "Sebenar nemiak tuk detentu untuk ngenyatuk atau ngemangkit ke mayuh urang de Israel ngau jadi kecelik te nimul ke bantah ³⁵ ngau pedang te nem'us jiwa dik - , isak jadi nyata pemikir ati mayuh urang." ³⁶ Agik pulak diak bisik Hana, nabi inuk, anak Fanuel re suku Asyer. Ya dah tuai bebenar. Udah kawin ya idup tujuh taun pelamak tamai laki ya, ³⁷ pituk ya janda berumur lapan puluh empat taun. Ya ndai suah nudi ke Bait Allah, semayang lawas malam, bepuasa ngau bedoa. ³⁸ Ngau rama yak ugak ya datai kiak, ngucap syukur ngau Allah, ngau banai tentang nemiak yak ngau semua urang te nunguk kelepas untuk yerusalem. ³⁹ Udah temuk semua te kalah depulah sidak menurut ukum Tuhan, sidak bekalih ke penugau asal sidak, kota Nazaret de Galilea. ⁴⁰ Nemiak yak betamah besai ngau jadi kuat, penuh hikmat, ngau kasih karunia Allah bisik entang Ya. ⁴¹ Tetiap taun urang tuai Yesus angkat ke Yerusalem pada ari raya Paskah. ⁴² Rama Yesus berumur dua belas taun sidak angkat ke Yerusalem upa te selama depulah sidak rama ari raya. ⁴³ Udah temuk ari-ari raya yak, rama sidak ketengah bejalai pulai, Yesus nugau de Yerusalem ndai deketau urangtuai Ya. ⁴⁴ Empadai dekira sidak, Ya bisik dentara urang-urang te bejalai bereta sidak, bejalai me sidak dah sari , udek ngegak Ya dentara menyanak ngau urang te dekelala sidak. ⁴⁵ Empadai sidak ndai nemu Ya, sidak bekalih ke Yerusalem samil ngegak Ya. ⁴⁶ Udah tiga ari, sidak nemu Ya alam Bait Allah; ketengah duduk de tengah-tengah alim ulama, ninga ke sidak samil betanyak ngau sidak. ⁴⁷ Ngau semua urang te ninga Ya iran bebenar medak pemintar Ya, ngau semua saut te deberik ke Ya. ⁴⁸ Ngau rama urangtuai Ya medak Ya, sidak tebelenga, udek jekuh inai Ya: "Nak, nama Mih mulah kami upa tuk? kenua apai dah gaduh ngegak Mih." ⁴⁹ Saut Ya: "Nama kitak ngegak Aku? Ndai nama kitak ketau, antik Aku kalah nugau alam rumah Apai Ku?" ⁵⁰ Tapi sidak ndai nyaruk nama te depadah Ya ngau sidak. ⁵¹ Udek Ya pulai bereta sidak ke Nazaret; ngau Ya ttp idup alam pengasuh sidak. Ngau inai Ya naruh semua yak alam ati ya. ⁵² Ngau Yesus mangkin betamah besai ngau hikmat Ya betamah ugak, ngau mangkin dekasih Allah ngau mensia.