¹ Saat ha’i raya Paskah dan Roti Ide Be’agi due ha'i lagi tibe. imem-imem kepale juge dan ahli-ahli Taurat buat jolon nak nangkap dan munoh Yesus, ² sebeb mike becakap: usah pade mase pesta, supaye ide ade u'ang begado ka rakyat. ³ Waktu Yesus ka Betania, ka ruma Simon yang borok, dan lagi dudok maken, seu'ang betina dotong bawa balang be’isi minyek Narwastu yang mahel. Di pecah lehe’ balang itu, dicocorlah minyek itu ka kepale Yesus. ⁴ Ade u’ang yang ma’ah, seu'ang sama seu'ang becakap: “buat ape bo’os dengen minyek narwastu tu? ⁵ Sebeb minyek ikin dopot di jual tige ratus dinar lebeh dan dopot dibe’i pade u'ang mesken.” Lalu mike me’adang ka betina itu. ⁶ Tapi Yesus becakap: “Bia’kan die. Ape pule ikau nyusa die? Die lah buat bae pade Aku. ⁷ Ka’ene u'ang-u'ang mesken slalu ade pade ikau, dan ikau bise tolong mike, bila ikau suke, tapi Aku ide selalu dengen ikau. ⁸ Die lah buat ape yang die dopot buat. Nyawe Aku lah di nyapu minye buat siapan Aku nak dikubo. ⁹ Aku becakap pade ikau: Kamana Injil di be’itekan ka dunie, ape yang di buat ikin nak disebot juge untok di inget u'ang. ¹⁰ Seu'ang pengekot Yesus name die Yudas Iskariot, sala seu'ang da'i kedue belas murid itu, pe’gi kepade imem-imem kepale dengen minat nak serah Yesus pade mike. ¹¹ Mike senang ‘ati mendenga’ itu dan be’janji nak be’i upah padenya. Lalu iye cari mase yang baek untok nyerahkan Yesus. ¹² Ha'i pe’tama ha'i raya Roti Ide Be’agi, pade mase u'ang nyembele domba Paskah, pengekot Yesus becakap pade Yesus: “Kemane Ikau kehendak kami pegi untok siapkan Pesta Paskah untok Ikau? ¹³ Lalu Yesus nyu’u due u'ang murit Die dengen pesen: “Pe’gi ka kote; ka sana ikau nak jumpa seu'ang bawe taka yang ade ae. Ikoti die ¹⁴ bei tau pade u'ang ‘umah yang dia singge: Pesan Gu’u: ka mana bilek buat Aku untok makan Paskah besame dengen mu’it-mu’it Aku? ¹⁵ Kemudian u’ang itu nonjok bilek besa’ ka atas, yang lah siap semuenya. Ka situlah ikau ha’us buat pesta Paskah untok kite! ¹⁶ Kayola ke due mu’it itu dan waktu mike tibe ka kote, mike dopot semue yang di cakap Yesus kepade mike. Lalu mike mempe’siapkan Paskah. ¹⁷ Malam ha'i, Yesus tiba besame ka due belas murid-murid Die. ¹⁸ Waktu mike dudo makan, Yesus becakap: “Aku na cakap pade ingka, seu'ang da’i ikau nak se’ah Aku, yaitu iye yang makan same Aku. ¹⁹ Make susa atilah mike dan seu'ang demi seu'ang becakap pade Die: “Bukan ambe Tuhan neh?” ²⁰ Die bejawab: “U'ang itu salah seu'ang da'i ka due belas pengekot Yesus, iye yang celup ‘oti ka dolom mangko yang same dengen Aku. ²¹ Anak Manusie memang nak pe’gi same dengen yang ditules oleh Die, tapi celakelah u'ang yang ka’ene die Anak Manusie dise’ah. Bae die ide lahe. ²² Yesus sedang makan same pengekot Die, Yesus mengambe ‘oti, besuko dan Yesus porak-porak dan membagi pade mike, lalu Yesus becakap: “Ambelah, ikinlah nyawe Aku.” ²³ Sesuda itu Die mengambe cangke, besuko kemudian membe’i itu pade mike, dan mike semue minum da’i cangke itu. ²⁴ Dia bekate pade mike: Ikinlah da’a Aku, da’a pe’janjien, yang ditumpahkan buat u'ang anyak. ²⁵ Aku bekate pade ikau: Aku ide nak minom lagi hasel poko anggu’ sampai pade ha'i Aku minum itu, yaitu yang ba’u, dolom Ke’ajaan Allah.” ²⁶ Setela mike benyanyikan lagu, mike pe’gi ka bukit Zaitun. ²⁷ Yesus becakap pade mike: “Ikau semue kelak nak goncang iman ikau. Sebeb ade te’tules: Aku nak pangkong penjage dan domba-domba itu akan bece’ai-be’ai. ²⁸ Tapi lah Aku bangket, Aku nak lebeh dulu ka Galilea, baru ikau. ²⁹ Petrus bekate pade Die: Bia’pun mike semue te’goncang imannya, tapi Aku ide. ³⁰ Kate Yesus pade Dia: “Aku bekate pade ikau, pade ha'i ikin juge, malam ikin juge, sebelom ayam bekuko due kali, ikau lah nyangkal Aku tige kali. ³¹ Tapi dengen lebih sunggoh-sunggoh Petrus becakap: “Sekalipon aku ha’us mati besame-same Ikau, aku ide nak nyangkal Ikau. Semue u'ang lain pon becakap begitu. ³² Lalu Yesus tibe dengen mu’it’-mu’it Die ka tempat yang bename Getsemani. Kate Yesus pade mu’id-mu’id Die, dudok ka sike, selagi Aku na doa. ³³ Dan Die bawe Petrus, Yakobus dan Yohanes same Die. Die sangat takot, ³⁴ lalu Die bekata pade mike: “Ati Aku sedih amat, rase na mati. Tinggelah ka sini dan berawas-awaslah. ³⁵ Dia enso ka depan diket, me’ebah nyawe ka tana dan bedoa supaya kalau dopot, waktu itu lewat dari pade Die. ³⁶ Kate Die: Ya Abba, ya Apa’, muse yang mustahil dengen Ikau, ambelah cangke ikin da’i Aku, tapi usahlah yang Aku keenda, melainkan yang Ikau keenda. ³⁷ Abis itu Die dotong bale, dan bejumpe ketige mu’it Die sedang tido. Dia bekate pade Petrus: “Simon, sedang tidokah ikau? Idekah ikau sanggop bejage sejam saje? ³⁸ Awas-awaslah dan be’doa, supaya ikau ide jatoh ka dalam cobaan: roh memang penurut tapi isi lemah.” ³⁹ Lalu Die pe’gi lagi dan ngucap doa yang same lagi. ⁴⁰ Ketika Die bale pula, Dia bejumpe mike lagi tido, sebeb mate mike dah be’at dan mike tak tau na jawab ape pade Yesus. ⁴¹ Kemudian Die bale untok ke tige kalinya dan becakap pade mike: “Tidolah keneng dan be’isti’ahat. Waktunya udah tibe, tengo, Anak Manusia dise’ahkan ka tangan u'ang-u'ang be’dosa. ⁴² Bangunlah, ayo na bekayo. Dia yang na nyerahkan Aku lah dekat. ⁴³ Waktu Yesus masi becakap, moncolah Yudas, seu’ang da’i kedue belas pengekot Yesus itu, besame-same die se’ombongan u'ang yang bawe pa’ang dan pentung, dipe’intah oleh imem-imem kepale, ahli-ahli Taurat dan tue-tue. ⁴⁴ U'ang yang na se’ah Die, lah be’i tande pade mike: “U’ang yang nak aku cium, itulah Die, tangkaplah Die dan bawelah Die dengen selamet.” ⁴⁵ Dan waktu ia tibe ka situ ia maju ka depan jumpa Yesus dan bekate “Rabi,” lalu mencium Die. ⁴⁶ Make mike menangkap Die. ⁴⁷ Seu'ang dari mike yang ade ka situ mengangkat pa’angnya, lalu meneta pade kuli imem Besa hingge putus telingenya. ⁴⁸ Yesus becakap pade mike: “Sangka ikau Aku ni u'ang jahat, maka ikau dotong dengen pa’ang dan pentung untok nangkap Aku? ⁴⁹ Padehal setiap ha’i Aku ade ka tenga-tenga ikau mengaja’ ka Rumah Sembayang, dan ikau tak nangkap Aku. Tapi ha’uslah dibuet genap yang ditules ka Kitab Tuhan.” ⁵⁰ Lalu semue mu’it itu tinggalkan Die dan mela’ikan di’i. ⁵¹ Ade seu'ang bujang, waktu itu die hanya pakai sehelai sa'ung lenan buet tutup badan die, ikut Dia. Mike nak nangkap die, ⁵² tapi die melepaskan sa'ung die dan lompat dengen telanjeng. ⁵³ Kemudian Yesus di bawe semuke pade imem Besa’. Lalu semue imem kepale, tue-tue dan ahli Taurat bekumpol ka situ. ⁵⁴ Dan Petrus ikot Die dari jeuh, sampai ka dolom lapangan ‘umah imem Besa’, dan ka sana die dudok ka tenga penjage-penjage sambil be’uap kat api. ⁵⁵ imem-imem kepale, malah semue Mahkame Ugama menca’i sakse pade Yesus, supaye Die di ukom mati, tapi mike ide dopot. ⁵⁶ Belubo u'ang bekate sakse palsu pade Die, tapi sakse itu ide suai dengen yang laen. ⁵⁷ Lalu ade bebe’ape u’ang pula buat sakse lawan Die dengen buat tuduhan palsu ikin: ⁵⁸ “Kami lah denga’ u'ang ikin bekate: Aku nak robohkan Rumah Sembayang yang di buat tangan manusie ikin, tapi dolom tige ha’i Aku nak bangun yang laen, yang bukan di bangun oleh manusie. ⁵⁹ Dolom hal ikin pon sakse-sakse mike ide same seu'ang dengen yang laen. ⁶⁰ Make Imem Besa’ ka tenga-tenga sidang dan be’tanye pade Yesus, kate die: “Idekah Ikau be’i jawab atas tuduhan-tuduhan sakse-sakse ikin pade Ikau? ⁶¹ Tapi Die diem saje tak jawab ape-ape. Imem Besa’ betanye pade Die sekali lagi, kata die: “Ape Ikau Mesias, Anak da’i Yang te’puji? ⁶² Jaweb Yesus: “Akulah Die, dan ikau nak nengok Anak Manusie dudok ka sebale kanen Yang Mahe Kuase dan dotong ke tenga-tenga poon di langet.” ⁶³ Make Imem Besa’ itu mengoyak baju die dan becakap: “Buat ape kite pe’lu sakse lagi? ⁶⁴ Ikau lah denga’ Die nyumpa pade Allah. Ape pendopot ikau?” Lalu dengen suare besame mike mutuskan, bahwa Die ha’us di hukom mati. ⁶⁵ Lalu mulaila bebe’apa u'ang meludah ka Die dan mengatup muke Die dan menombo Die sambil bekate pade Die: “Oi nabi, coba teba!” Penjage pon pangkong Die. ⁶⁶ Pade mase itu Petrus masih ka bawah, ka lapangan. Lalu dotong seu'ang kuli betina Imem Besa’, ⁶⁷ dan waktu betina itu menengok Petrus lagi beuap api, dia natap muke die, dan becakap: “Ikau juge slalu same-same dengen Yesus, u'ang Nazaret itu.” ⁶⁸ Tapi die menyangkal dan becakap: “Ambe ide tau dan tak paham ape maksud ikau.” Lalu die pe’gi ka teras (saat itu be’kokolah ayam). ⁶⁹ Waktu kuli betina itu tengok Petrus lagi, die becakap pade u'ang yang be’di'i ka situ: “U'ang ikin adelah sala seu'ang da’i mike. ⁷⁰ Tapi Petrus menyangkal pula. Kemudian u'ang-u'ang yang ade ka situ becakap juge pade Petrus: “Ikau ikin pasti sala seu'ang da’i mike, ape lagi ikau u'ang Galilea!” ⁷¹ Make mulaelah Petrus ngutuk dan be’sumpah: “Aku tak kenal u'ang yang ikau cakap ikin!” ⁷² Dan waktu itulah ayam bekokok ke due kalinya. Te’ingatla Petrus bahwe Yesus pe’na becakap padenya: “Sebelom ayam bekoko due kali, ikau lah menyangkal Aku tige kali.“ Lalu die nanges dengen sedeh amat.