¹ Tagal te, awi itah jadi impabuah awi iman, maka itah jadi badamai dengan Hatalla mahalau Tuhan itah, Kristus Yesus; ² mahalau Ie, itah mandinun jalan tame manintu iman akan anugerah Hatalla je metuh tuh manjadi dasar itah mendeng, tuntang itah paham hanjak huang pengharapan kemuliaan Hatalla. ³ Dia hanya jite, itah kea hanjak huang kajake je itah mangkeme awi itah katawan bahwa kajake tuh mahasil kaketep, ⁴ kaketep mahasil sipat je tahan uji, tuntang sipat je tahan uji mahasil kaharap, ⁵ tuntang kaharap te dia manampa kecewa, awi sinta Hatalla jadi inyuang huang atei itah hapan Roh Kudus je jadi inenga akan itah. ⁶ Katika itah huang kalemu, Kristus matei akan kare uluh durhaka huang katika waktu je pas. ⁷ Awi, jarang tege uluh je handak matei akan uluh je bujur, tapi mungkin tege kea uluh je handak matei akan uluh je bahalap. ⁸ Tapi, Hatalla mamparahan sinta Ayu akan itah, bahwa katika itah masih uluh badosa, Kristus matei akan itah. ⁹ Labih bara te, limbas impabuah awi dahan Ayu, itah akan inyalamat bara kalait Hatalla mahalau Ie. ¹⁰ Awi, katika itah masih manjadi musuh Hatalla, itah jadi indamai dengan Hatalla mahalau pampatei Anak-Ayu, labih hindai wayah tuh awi itah jadi indamai Denga. Tuntang kenyataaan bahwa metuh tuh itah jadi indamai dengan Hatalla, maka itah kea pasti inyalamat mahalau pambelum Ayu. ¹¹ Dia hanya jite, itah kea bermegah huang Hatalla mahalau Tuhan itah Yesus Kristus, je mahalau Ie itah tuh manarima pendamaian Hatalla. (Matei Mahalau Adam, Belum Mahalau Kristus) ¹² Awi te, kilau dosa jadi tame huang dunia tuh mahalau ije biti uluh tuntang maut tame mahalau dosa, kalute kea maut mangguang hapus uluh awi uluh handiai jadi badosa. ¹³ Awi, dosa jadi tege huang dunia sahelu bara Hukum Taurat Musa tege, tapi dosa dia diperhitungkan Hatalla sepanjang jatun Hukum Taurat. ¹⁴ Aluh kalute, maut berkuasa bara jaman Adam sampai Musa, bahkan akan kare uluh je dia manampa dosa kilau je inguan Adam, jete bayangan bara Ie je akan dumah. ¹⁵ Tapi, panenga bara Hatalla te dia sebanding dengan dosa. Sabab, amun awi dosa ije biti uluh, are uluh jadi matei, maka labih hindai karunia bara Hatalla tuntang panenga mahalau karunia ije biti Uluh te, iete Kristus Yesus. ¹⁶ Tuntang, anugerah dia kilau awi dosa bara ije biti uluh te. Sabab penghakiman huang ije pelanggaran akan mimbit hukuman, tapi anugerah akan kakare pelanggaran mimbit huang jalan je buah. ¹⁷ Amun awi dosa ije biti uluh, maut berkuasa akan ije biti uluh te, labih hindai kare uluh je mandinun kalimpah anugerah tuntang karunia kebenaran akan marentah huang pambelum mahalau ije biti Uluh te, iete Kristus Yesus! ¹⁸ Jadi, sama kilau mahalau ije pelanggaran uras uluh mandinun hukuman, kalute kea awi gawin katutu ije biti uluh kea uras kalunen mandinun pambelum tuntang impabuah. ¹⁹ Awi ije biti uluh je dia taat, are uluh manjadi uluh badosa. Tapi, awi ije biti Uluh je taat, are uluh je akan impabuah. ²⁰ Hukum Taurat inambah mangat dosa batambah are. Tapi, melai eka dosa sasar are, anugerah Hatalla sasar kea malimpah, ²¹ mangat sama kilau dosa berkuasa huang maut, kasih karunia kea berkuasa mahalau katutu je mamimpin akan belum je katatahi melai huang Kristus Yesus Tuhan itah.