¹ Keleh manarima uluh je balemu iman, tapi ela mambantah pandapat ayu. ² Tege uluh je percaya bahwa ie tau kuman uras macam panginan, tapi uluh je balemu iman baya kuman sayur bewei. ³ Uluh je kuman ela mahina uluh je dia kuman, tuntang uluh je dia kuman ela mahakim uluh je kuman, awi Hatalla jadi manarima ie. ⁴ Eweh kea ikau sampai ikau mahakim jipen uluh beken? En jipen te mendeng atawa manjatu, jete urusan tuan ayu. Tuntang, ie akan mendeng awi Tuhan olih mampendeng ie. ⁵ Tege uluh je maanggap andau ije labih penting bara andau je beken, tapi uluh je beken maanggap uras andau te sama ih. Genep uluh musti bujur-bujur percaya huang atei kabuat. ⁶ Ewen je mementingkan andau tertentu, mementingkan te akan Tuhan. Tuntang, ewen je kuman, kuman akan Tuhan awi ie mengucap syukur akan Hatalla. Kalute kea ewen je dia kuman, ewen dia kuman akan Tuhan tuntang mengucap syukur akan Hatalla. ⁷ Awi, jatun ije biti bara itah je belum akan arep kabuat, tuntang jatun ije biti je matei akan arep kabuat. ⁸ Awi, amun itah belum, itah belum akan Tuhan, atawa amun itah matei, itah matei akan Tuhan. Jadi, itah belum atawa matei, itah tuh ain Tuhan. ⁹ Awi akan jite Kristus matei tuntang bangkit, mangat Ie manjadi Tuhan, aluh akan kare uluh matei atawa akan kare uluh belum. ¹⁰ Tapi, mbuhen ketun mahakim paharin ketun? Atawa, mbuhen ketun maanggap paharin ketun randah dengan mahina ie? Awi, itah samandiai kareh manaharep tahta pengadilan Hatalla. ¹¹ Awi tege tarasurat,"Awi Aku belum, firman Tuhan, genep utut akan manyembah dengang-Ku, tuntang genep jelan akan mangaku dengan Hatalla." Yesaya 45:23 ¹² Jadi, genep itah akan manenga pertanggungjawaban tentang arep ah kabuat akan Hatalla. (Ela Mawi Uluh Beken Badosa) ¹³ Awi te, ela itah mahakim sama arep itah, tapi keleh berusaha uka dia manjadi penghalang atawa batu sandungan akan pahari itah. ¹⁴ Aku mangatawan tuntang jadi percaya huang Tuhan Yesus bahwa jatun taluh je najis bara hal te kabuat, tapi akan uluh je maanggap bahwa kare taluh handiai najis, maka hal jite najis akan arep. ¹⁵ Awi, amun atei pahari ketun kapehe awi taluh en-en je ketun kuman, ketun dia hindai belum tagal sinta. Ela ketun membinasakan ie awi panginan ketun te, awi Kristus kea jadi matei akan ie. ¹⁶ Awi te, ela manalua narai je ketun anggap bahalap imapa kilau taluh je jahat. ¹⁷ Awi Kerajaan Hatalla te beken tentang kuman dengan mihup, tapi tentang kebenaran, damai sejahtera, tuntang sukacita huang Roh Kudus. ¹⁸ Awi eweh bewei je melayani Kristus hapan cara jituh berkenan akan Hatalla, tuntang ihormat kalunen. ¹⁹ Jadi, mari itah mangguang kare hal je mimbit damai sejahtera tuntang mandohop sama arep itah. ²⁰ Ela marusak panggawi Hatalla baya awi panginan! Taluh handiai halal, tapi jahat akan uluh je kuman tuntang mawi sabab uluh beken badosa. ²¹ Labih bahalap dia kuman isin metu atawa mihup anggur, atawa malalus hal je beken je manjadi sabab pahari ketun tersandung. ²² Keleh mimbing kapercaya je tege intu ketun akan arep ketun kabuat intu taharep Hatalla. Berbahagia uluh je dia mahakim arep kabuat taharep narai je ie anggap bahalap. ²³ Tapi, uluh je bimbang akan ihukum amun ie kuman, awi ie kuman dia manumun iman; tuntang taluh handiai je dia berasal bara iman jete dosa.