Surat Natuju Ma Jemaat Hang Sardis ¹ "Nelang, natuju ma malaikat jemaat hang Sardis natulis ; Inaleh piwaraan teka Hanye naan pitu Ruh* Alatalla nelang pitu kadiki wawahiang : Aku karasa ulahan-ulahan nu. Ulun kaeau neu welumnu, walehani isa kapinu'u ni hanyu haut matei. ² Waspada, nelang ampitamam inun isa magun naan, nelang isa kai matei, daya Aku huan kaiyuh pagawian isa paruna hang wuang bahum Alatalla. ³ Daya iru, itung inun isa haut natarime nelang haut nasandrengei, palupuileh nelang batubat ! Amun hanyu puang waspada, Aku sagar hawi nyalah ulun hamen ngalat nelang hanyu puang himat puang karasa hamian jam ni aku sagar hawi ma unengnu. ⁴ Walehanni, hanyu uweng papire kaulun isa uweng papire ulun Sardis isa huan nangkurun pama here ; nelang here sagar takia sindrah Aku andri nuwe pama saraba mahilak daya susuk amhere. ⁵ Ulun isa manang sagar nuwe pama isa mahilak nelang Aku puang sagar muhut ngaran ni isa naan hang Kitab Pamelum, Aku sagar ngaku ngaranni hang dahapan Ammahku nelang hang dahapan malaikat-malaikatni. ⁶ Hanye isa uweng silu maraeh hanye nyandrengei inun sa na wara Ruh nuju jemaat-jemaat." Surat ma Jemaat Hang Filadelfia ⁷ Nelang, ma malaikat jemaat hang Filadelfia tulisleh : Inaleh piwaraan teka Isa Barasis nelang Kapinu'u, isa negei kunsi Daut,* isa haut nguka nelang puang sunah erang kaulun isa kaiyuh nutupni nelang puang sunah erang kaulun isa kaiyuh nguka ni; ⁸ Aku karasa ulahan-ulahan naun. Dinung eh, aku haut nguka wanawang mahanyu, puang sunah erang kaulun isa kaiyuh nutupni daya kakuatennu maleme, kude hanyu haut ngalut firman Ku nelang puang manyangkal ngaran Ku. ⁹ Dinung eh, Aku sagar ngulang kuan sinagoge iblis ru, isa ngaku jari ulun Yahudi, kude sabujurni puang, sabujurni ipusu, Aku sagar ngulah here hawi nelang sujud hang pe'e nu, nelang ngulah here karasa, sabujurni Aku ngalelu hanyu. ¹⁰ Daya hanyu haut malihara firman napalihara Ku, Aku sagar malihara hanyu teka masaa kasusahen sa sagar hawi ma anteru dunia, umak nyuba here isa muneng hang amau tane. ¹¹ Aku sagar hinang hawi. Tegeileh inun sa haut uweng hang naun himpan puang sunah erang kaulun sagar kaiyuh ngalap mahkotanu. ¹² Hanye isa manang, Aku sagar ngampindri ari umak nyanga Bait Suci Alatalla Ku, nelang hanye sagar mahulu lagi teka iru ; nelang Aku sagar nulisni pada ma hanyu ngaran Alatalla Ku nelang ngaran kota Alatalla Ku, hanyeru Yerusalem wau, isa iru minau teka surga, teka Alatalla Ku, nalang ngaran Ku isa wau. ¹³ Hanye isa uweng silu mara eh hanye nyandrengei inun sa haut nawara Ruh ma jemaat-jemaat." Surat Ma Jemaat Hang Laodikia ¹⁴ Nelang, natuju ma malaikat jemaat hang Laodikia haut natulis ; Inaleh piwaraan Sang Amin, saksi isa setia nelang bujur, awal teka katuluh ulahan Alatalla : ¹⁵ Aku haut karasa kuan gawian-gawiannu, neuni hanyu puang marisak atawa kalaingan. ¹⁶ daya hanyu malaing kuku, puang malaing atawa puang marisak, Aku sagar niep teka wuang wawa Ku. ¹⁷ Daya hanyu kaeau, 'Aku tatau, balabisan, nelang puang uweng kakurangen inun-inun,'nelang ngaan karasa isa sabujurni hanyu sansara, susah, paua, pehe, nelang tabentur. ¹⁸ Aku nyamara hanyu umak midii amas teka Aku, isa haut nasapuh makai apui himpan hanyu jari tatau, nelang bapama mahilak himpan hanyu kaiyuh nuweni pada himpan puang amangan mun karasa tabentur puang sagar dinung, nelang ngasai salap hang mate nu himpan hanyu kaiyuh kadinung. ¹⁹ Here isa nakaleluku, naiyai nelang najar Ku; Daya iru, relaleh ateinu nelang batubat ! ²⁰ Dinungleh ! Aku mindri hang dahapan wanawang nelang nalitik. Amun naan ulun karengei lengan Ku palus ngka wanawang, Aku sagar masuk maunengni, nelang hanye sasameh baya Aku. ²¹ Hanye isa manang, Aku sagar ngami izin maharung baya Aku hang paharungan Ku,sameh kala Aku haut manang nelang maharung baya amah Ku hang paharungan Ni. ²² Hanye sa uweng silu maraeh nyandrengei inun sa haut nawara Ruh nuju ma jemaat-jemaat."