Alatalla Manyanyi Lagu Wau ¹ Udihie, Aku kadinung Anak Domba mindri hang Bukit Sion, nelang sasameh Hanye naan 144 ribu kaulun, isa natulis ngaran Ammah Ni hang ra'i here. ² Aku karengei lengan teka surga yalah kareh ranu isa hane nelang yalah lengan ampeng kelat isa mehet, kude lengan ni sa rengei ku iru nyalah lengan kecapi isa petikan kecapi here. ³ Here manyanyi makai nyanyian isa wauhang dahapan paharungan nelang hang dahapan kaepat satua, sindrah hang dahapan tatueh*. Puang sunah erang kaulun isa kaiyuh paajar nyanyian wa'u salain jatuh epat pulu epat ribu kaulun isa haut natewuh teka amau tane. ⁴ Here ru kuan ulun puang menajiskan tenga here makai kuan wawei daya here lagi bujang. Here ru kuan ulun sa umma Anak Domba maawelw haere mahulu. Here haut natewuh teka lahelang murunsia yalah wua isa malani teka Alatalla nelang Anak Domba. ⁵ Here ru puang uweng tau ipusu : Here ru puang uweng kahalaen. Pesen Teka Telu Malaikat ⁶ Aku kadinung malaikat samiding hang penah langit, ngenei Injil* paruna umak na wara ma katuluh ulun isa muneng hang amau tane nelang makatuluh bangsa, suku, bahasa, nelang kaum ⁷ nelang hanye kaeau makai lengan isa mehet, "Takutleh ma Alatalla nelang ngampamai kamulien ma Hanye daya tawuk pahakiman Ni haut hampe ; sammahleh Hanye isa haut ngulah langit, tane, laut, nelang katuluh mate ranu." ⁸ Balalu, malaikat isa lain, isa karueh, naharak nelang kaeau, "Runtun, haut runtun Babel isa hante ru daya hanye haut ngulah katuluh bangsa nguut anggur nafsu seksual magin bejat." ⁹ Udihie, malikat isa lain, isa katelu, naharak karueh malaikansa dahulu, nelang kaeau makai lengan mehet, "Jaka hieleh isa nyammah situa ru nelang sampatungni, nelang narime isa sirihang rai atawa hang tangan ni, ¹⁰ Ulun yiti sagar nguut anggur murka Alatalla, isa na tuang andri kakuaten penu ma wuang saluki murka Ni, nelang hanye sagar nasiksa makai apui nelang waye hang dahapan malaikat-malaikat barasis hang dahapan Anak Domba. ¹¹ Nelang, siksaan ma here palus makalalawahni, Here puang uweng uneng umak tarie baranai, inun hanye kaandrau atawa kamalem, ekat ulah here nyamamah situa baya sampatungni, atawa hieleh isa narime siri hang ngaran ni." ¹² Inaleh kapinu'u ulun-ulun barasis isa haut malihara parentah Alatalla nelang iman ma here hang wuang Yesus. ¹³ Balalu, akukarengei lengan teka surga kaeau, "Tulisan ni kaliti : Teka itati, naberkatleh ulun-ulun sa haut matei hang wuang Tuhan." Ruh* kaeau, "Bujur, Himpan here kaiyuh baranai teka uyuh rara here daya gawian here ngalut aheng here." Wasian Hang Tane ¹⁴ Balalu,Aku kadinung awan mahilak nelang maharung erang kaulun anak murunsia * nuwe mahkota teka amas nelang sabit isa kumat hang tangan Ni ¹⁵ Balalu, malaikat lain kaluar teka bait Alatalla, nelang kaeau makai lengan mehet nadap Hanye isa maharung hang amau awan, "Tantuyur sabit Nu nelang masii daya tawuk ulun masi haut hampe wayahni hang tane daya haut mihak." ¹⁶ Makani, Hanye isa maharung hang amau awan nantuyur sabit Ni ma amau tane, nelang palus masi. ¹⁷ Udihie, malaikat lain kaluar teka Bait Alatalla isa hang surga, nelang hanye pada uweng sabit isa kumat. ¹⁸ Balalu, malaikat lain lagi, isa bakuasa andri apui, kaluar teka altar*. Hanye kaeau andri lengan mehet nuju ma malikat isa negei sabit isa kumat ru, "Tantuyurnu sabit isa kumat ru nelang kumpul tuykan wua anggur teka kakau anggur hang tane." ¹⁹ Makani, malaikat ru nantuyur sabitni ma tane nelang ngumpul tuyukan wua anggur hang tane nelang nawut ni ma wuang watu kilangan hante murka Alatalla. ²⁰ Pamian nan wua anggur hang luar kuta, nelang ira mareh teka alat pamian nan anggur ru kakira kala amau kuda nelang kala amau saribu enem jatuh stadia.