Pangitungen Ma Ulun Tatau ¹ Hiai kuan ulun tatau, sandrengeileh ! Nangis nelang nungkau umak kasusahen isa haut wuah hanyu. ² Katatwen nu haut hapus baya kuan pamanu haut galis hansur. ³ Amas baya perak nu haut galis luntur, nelang lunturni haut jari bukti haut nyameat hanyu palus nguta tenga dagingnu yalah apui. Hanyu haut nunyuk haratanu hampe andrau sa pangalisanni. ⁴ Rengeileh, upa kuan walah isa ngaraja ume taun nu, hanyu sulas upa here puang hanyu nyurung, here nantiak nawan hanyu. Balalu, kiak tungkau here upaan ru hampe ma silu Tuhan ampun alam. ⁵ Hanyu haut welum hang amai tane hang wuang katatauen nelang karaien ma dirini raerai, hanyu haut ngampisanang atei nu hang andrau panyamalisan. ⁶ Hanyu haut nukum nelang munuulun isa mawitu bujur, nelang hanye puang nawan hanyu. Tabah Hang Panyusah ⁷ Daya sabab iru, kuan pulaksanaiku, basabar hampe andrau [pihawian Tuhan. Dinung eh kewangun kuan patani ngandrei wua isa maeh teka tane, ngandrei andri sabar hampe hawi masa uran hawi nelang hampe hujungni. ⁸ Hanyu pada harus basabar, pitamam ateinu daya pihawian Tuhan haut riet. ⁹ Pulaksanaiku, ada naun kaku'ut isa andri isa lainni humpan hanyu puang nahukum. Dinung eh, hakim ru haut mindri hang wading wanawang. ¹⁰ Pulaksaniku, himpan jari suntu hang wuang panyusah baya kasabaren, dinung eh kuan nabi isa bapaner makai ngaran Tuhan. ¹¹ Kami ngangab arai hewu daya gana basabar. Hanyu haut karengei katabahen wat Ayub nelang haut kadinung bahum Tuhan hang pijumpuhanni, sabujurni Tuhan ru penu ahi lelu nelang murah atei. Ada Basumpah ¹² Walehanni, kuan pulaksanai ku, hang amau katuluhni ru, ada hanyu basumpah, inun daya langit, tane, atawa daya inunleh. tu'ingleh "yai" amun yai atawa "Puang" himpan hanyu na ami hukuman. Kuasa Dusa Hang Wuang Iman ¹³ Inunkah hang penah naun naan isa lagi hang wuang panyusah ? Mara'eh hanye ilakudu'a, Inunkan na'an sa lagi arai hewu ? Mara eh hanye ba mazmur. ¹⁴ Inunkan na'an ulun hang helang-helang naun naan ulun lagi mekum ? Elahleh hanye nerau kuan tueh ungkup hang jemaat ru nelang here badu'a ma hanye, ngilau ngalanis makai ilau hang wuang ngaran Tuhan. ¹⁵ Du'a sa nadu'a hang wuang iman sagar nyalamat ulun sa mekum ru nelang Tuhan sagar namu'an hanye. Balalu, amun hanye haut ngulah dusa, hanye pada sagar naampun. ¹⁶ Daya iru, ware naun sameh-sameh ngaku dusa naun nelang ware naun saling mandu'a himpan naun ware. Du'a ulun sa bujur nelang kapinu'u bangat hante kuasa ni. ¹⁷ Elia erang kaulun murunsia sameh wangun takam. Hanye lakudu'a andri kapinu'u himpan puang jari uran, balalu pada andrau puang jari uran salawah telu taun enem wulan. ¹⁸ Udihi'e hanye lakudu'a kamulek, udihi'e langit ngampinau uran balalu tane ngaluar wawua'en. Ngarawah Ulun Mi'ulek Ma Alatalla ¹⁹ Ku'an pulaksaniku, umpama naan hang lahelang hanyu na'an banyimpang teka sa kapinu'u palus na'an ulun isa ngarawah ni iwaleng, ²⁰ Karasa na'un naan ulun isa ngenei ulun badusa mi'ulek malalan isa bujur sagar nyalamat amiru'e ulun ru teka pampatei humpan nutup hene dusa.