Ngalelu Katuluh Ulun ¹ Kuan pulaksanaiku, ada nantarang iman nu hang wuang Tuhan takam isa mulia, Yesus Kristus, andri ma milah-milah ulun. ² Amun naan ulun isa hawi ma sinaguge nu andri nuwe utas amas nelang makai pama haraga rarang, hang erang andrau isa sameh, hawi pada ulun isa pau'a nuwe pama isa bere, ³ nelang naun ngami harati ma ulun isa makai pama haraga rarang ru balalu kaeau ma hanye, "yu maharung hang uneng isa maeh," kude nuju maulun isa susah ru hanyu kaeau, "Mindri hang yaru !" atawa "Harung iti hang tete pe'eku !" ⁴ Puangkah hanyu haut milah-milah nuju ma here balalu hanyu jari hakim makai kunuan isa murun ? ⁵ Kuan pulaksana'i isa nakaleluku, rengei naun ! Puangkah Alatalla haut midi ulun isa pau'a hang mate dunia umak jari tatau hang wuang iman nelang sagar ampun waris Karajaan Alatalla isa haut najannyi-Ni ma here isa ngallelu Hanye ? ⁶ Walehanni, hanyu haut ngaranahhan ulun pau'a. Puangkah ulun tatau isa ngranahan nelang nyarah ma pangadilan ? ⁷ Puangkah here ru isa nangkurun ngaran ulun maeh, daya iru hanyu na herau ? ⁸ Amun hanyu haut ngaraja hukum isa utama sameh andri isa naan hang Kitab Barasis, hanye iru "Kalelu ma sasameh takam murunsia nyalah takam ngalelu diri tenga takam erai," hanyu haut ngaraja isa kapinu'u. ⁹ Kude, amun hanyu hambeda-beda ulun, hanyu haut ngulah dusa nelang haut patantarang malangar hukum. ¹⁰ Hieleh isa haut taat ma katuluh hukum, kude ekai makai mehe ni ai, hanye hala tu'u nadap hukum ru. ¹¹ Dayani, Hanye kaeau, "Ada idapa," pada kaeau, "Ada munu." Jari, amun hanyu puang ngulah idapa ibela, kude hanyu naan munu, hanyu haut ngulah kahalaen nawan hukum ru. ¹² Basurah nelang ngaraja nyalah kuan ulun isa sagar na hakimi daya hukum sa ta'u hambebasni. ¹³ Dayani, pahakiman puang sagar tau pamuahi pamulelu nuju ulun isa pauweng nantarang ahi lelu ; ahi lelu sagar manang hang wung pahakiman. Iman Puang Natantarang Samehleh Matei ¹⁴ Kuan pulaksana'i ku, inun riran'ni erang kaulun ngaku baiman, kude hanye puang uweng Iman ? Ta'ukah iman ru ngulah salamat ? ¹⁵ Amun erang kaulun pulaknai upu atawa erang kaulun pulaknai wawei puang uweng pama nelang panguta tatiap andrau, ¹⁶ nelang erang kaulun sa naan hang penah-penah naun kaeau, "Mahulu hang wuang ranai, mudahan tenganu malaing nelang natamising." kude hanyu puang sunah ngami ma hanye inun isa naparlu tenga dagingni, inun riran ni ru ? ¹⁷ Kalahie pada iman, amun iman ni puang natantarang hang ulah gawi ni, sameh ulun ngaan ba iman atawa iman ni matei. ¹⁸ Walehanni, mun puang uweng ulun sa kaeau, "Hanyu uweng iman, kude aku uweng ulahan." Aku sagar nuing, "Tantarang iman nu puang baya ulahan, nelang aku sagar nantarang imanku andri ulahan." ¹⁹ Hanyu harapleh sabujurni Alatalla ru isa. Iru tu'u. Ruh-ruh alamurun gin harap nelang here neter. ²⁰ Yai ulun budu ! Hakun sa hanyu sadar kapinu'u ni iman mun puang baya ulahan ni iru sasia ? ²¹ Puang sa hi Abraham , Am'mah takam, wuah tu'u daya ulahan-ulahan ni tawuk hanye hamen munu anak ni hi Ishak , anakni,hang amau altar ? ²² Dinungleh sabujurni iman ta'u sasameh andri ulahan-ulahan ni, nelang daya ulahan-ulahan ni, iman tau na olah paruna. ²³ Haut na ampi ganab hang wuang Kitab Barasis , "Abraham harap ma Alatalla, nelang katuluh ni ru haut na reken ma hanye yalah kapinu'u ni," balalu hanye na antuh "Sahabat Alatalla." ²⁴ Jari, hanyu kadinung teka ulahan ulun sa kapinu'u, puang teka iman ai. ²⁵ Kaliru pada, puang sa Rahab, erang kaulun idapa ibela, natarime daya gawianni tawuk hanye narime kuan mata-mata Israel nelang ngarawah here mahulu mitah lalan isa lainni ? ²⁶ Jari, sameh nyalah tenga puang uweng amiru'e sameh leh matei, kaliru pada iman puang baya ulah gawi ni sameh leh matei.