(Uyuhlah Allah Nyo Menjedi Hakem) ¹ Uleh iye, kowe hopi pacok mengelak lagi, hai mendesio, siape pun nyo menghakemi urang loen, sabab tekela kowe menghakemi mike, kowe jugo menghukom dirime; sabab, kowe nyo menghakemi jugo melakuko hal-hal nyo samo. ² Kite tahu ko behwa penghakemon Allah detitekko dengan adil atas segelo urang nyo melakuko hal-hal semacam iye. ³ Hambok sebeleknye, apokah kowe mengiro pacok lapas jak penghakemon Allah, hai mendesio, iyelah kowe nyo menghakemi mike nyo melakuko hal-hal upa iye, hambok jugo melakukonnye hal nyo samo? ⁴ Apo, apekah kowe menganggap enteng kekayoon kemurahon-Nye, kesabaron-Nye, ngan kelapangon hati-Nye dengan hopi mengetahui behwa kebeikon Allah betujuan untuk memimpin kowe kepado pertobaton? ⁵ Hambok sebeleknye, uleh sikap karas kepalome ngan hatime nyo hopi endokon betobat, kowe sedang menyimpan murka atas dirime untuk hari kemurkaon tekela penghakemon nyo bonor jak Allah denyatoko. ⁶ Enye nak membelos segelo urang sesuoi dengan perbuaton mike maseng-maseng: ⁷ iyelah kehidupon kekal kepado mike nyo dengan ketekunon delom bebuat beik mendelok kemuliaon ngan kehormaton, ⁸ hambok murka ngan kemarahon kepodo mike nyo mementingko diri dewek ngan hopi menaati kebonoron, melalui kehopi bonohon. ⁹ Hambok ado penderitaon ngan kesuliton atas segelo jiwo urang nyo berbuat jahat, pertamo-tamo kepodo urang Yahudi ngan jugo urang Yunani. ¹⁰ Hambuk, kemuliaon, kehormaton, ngan damai sejahtera nak ado bage segelo urang nyo bebuat beik, pertamo-tamo kepodo urang Yahudi ngan kemudion kepodo urang Yunani. ¹¹ Sabab, Allah hopi membeda-bedako urang. ¹² Untuk urang-urang nyo berbuat doso hopi mengenal Hokom Taurat, nye akan benaso tanpa Hokom Taurat. Hambuk, urang-urang nyo berbuat doso de bewo Hokom Taurat nak dehokom berdasarko Hukum Taurat. ¹³ Sabab, bukon pendongor Hukum Taurat nyo debonohko dehadopon Allah, hambok urang nyo melakukonnye nyo akan denyatoko bonor. ¹⁴ Sabab, tekalo urang bukon Yahudi nyo hopi mempunyai Hokom Taurat menjelonko secaro alami opo nye detuntut Hokom Taurat, mangko nye, nyo hopi memiliki Hokom Taurat, adolah Hokom Taurat bage dirinyo dewek. ¹⁵ Hal nie menunjuko behwo perbuaton Hokom Taurat iye tertoles de delom hati mike, nurani mike memberi kesaksion, ngan pekeron mike akon saling menuduh apo membela mike, ¹⁶ pado hari tekalo Allah nak menghakemi pekeron-pekeron mendesio nyo tekerawo melalui Yesus Kristus sesuoi ngan Injilku. ¹⁷ Hamokonyo, munye kuwe menyobut direme urang Yahudi ngan begentong pado Hokom Taurat, sererta bemegah delom Allah, ¹⁸ mengenal kehendok-Nye, menyetujui apenyo beik, elah deajo mengenai Hokom Taurat, ¹⁹ ngan yaken behwo dirime adolah penuntun bage mike nyo buta, tarang bage mike nyo berado delom kekolomon, ²⁰ pengajor bage urang-urang nyo bodoh, guru bage urang-urang nyo bolum dewasa, ngan ulehnyo mempunyoi perwujuton pengetahuon ngan kebonoron de delom Hokom Taurat, ²¹ mangko hai kowe nyo mengajor urang loen, mengka kowe hopi mengajor dirime dewek? Kowe nyo mengajor mike untok hopi maleng, hopikah kowe dewek maleng? ²² Kowe nyo melarong urang berzinah, bukonkah kowe dewek berzinah? Kowe nyo jijik terhadop berhala-berhala, hopikah kowe dewek merampok rumah berhara? ²³ Kowe nyo bangga terhadap Hokom Taurat justru mempermaluko Allah ngan melanggar hu=okom-Nye! ²⁴ Sabab, upa ado tetoles: "Namo Allah dehujat de antaro bengso-bengso loin uleh kowe." ²⁵ Sunat Memang mempunyoi nilainye munye kowe mematuhi Hokom Taurat, hambok munye kowe seurang melanggar Hokom Taurat, mangko sunatnye menjedi hopi bersunat. ²⁶ Jedi, munyenyo hepi bersunat melauko perentah-perentah delom Hokom Tarut, kukonkah nyo hopi bersunat iye deperhitungko sebagoi besunat? ²⁷ Ngan, hopikah urang nyo hopi bersunat secaro kelaheron, munye nye melakuko Hokom Taurat, akan menghakemi kowe, urang nyo meskipun mempunyoi Hokom Taurat ngan bersunat, hambok jugo melanggo Hokom? ²⁸ Sabab, nyo desobut Yahudi sejati bukonkah urang nye kenan jak luornyo bae, ngan sunat sebonornye bukonkah sunat pado badan bae. ²⁹ Seurang Yahudi sejati adolah urang nyo batennye sungguh-sungguh Yahudi, ngan sunat sebonornye adolah sunat dilakuko pado hati, nyo dejelonko uleh Roh, bukon hokom tetoles. Pujion terhadop urang upanie bukon detong jak mendesio, hambok jak Allah dewek.