¹ Terimolah urang nyo lamah imannye, hambok bukon untok melawon pendepotnye. ² Ado urang nyo yaken bahwa nye pacok makon segelo jenis makanon, hambok urang nyo lamah imannye hanyo makon sayoron. ³ Urang nyo makon jengonlah menghino urang nyo hopi makon, ngan urang nyo hopi makon jengon menghakemi urang nyo makon, sabab Allah lah nerimo nye. ⁴ Siapekah kowe sehingga kowe menghakemi hamba urang loen? Beik togok ataupon titek, iye oroson tuannye dewek. Ngan, nye nak togok ulenyo Tuhan sanggop membuatnye togok. ⁵ Ado urang nyo menganggap satu hari lobeh penteng deripado hari nyo loen, sementaro nyo loen menganggap segelo hari samo. Setiap urang haros bonor-bonor yaken delom hatinye dewek. ⁶ Mike nyo mementengko hari tertentu, mementengkonye untok Tuhan. Ngan, mike nyo makon, makon untok Tuhan sabab nyo mengucap syokor kepado Allah. Upa iyelah mike nyo hopi makon, mike hopi makon untok Tuhan ngan mengucap syokor kepado Allah. ⁷ Sabab, hopi seurang pon deri kite nyo hidop untok dirinye dewek, ngan hopi ado seurang pon nyo mati untok dirinye dewek. ⁸ Sabab, munye kite hidop, kite hidop untok Tuhan, atau munye kite mati, kite mati untok Tuhan. Jedi, beik kite hidop atau mati, kite adolah milik Tuhan. ⁹ Ulenyo untok iyelah Kristus mati ngan bangket, empok Nye menjadei Tuhan, beik pocok urang-urang mati maupon urang-urang hidop. ¹⁰ Cuma hambok, mengkah kowe menghakemi dolorme? Atau, mengkah kowe mandong rendah dolorme ngan menghinonye? Sabab, kite segelo nak togok menghadop takhta pengadelon Allah. ¹¹ Sabab ado tetules, "Uleh ulenyo Ake hidop, firman Tuhan, setiap lotot nak nyembah kepadoKe, ngan setiap lidah nak mengaku kepado Allah." ¹² Jedi, setiap kite nak membori pertanggong-jawabon tentang dirinye dewek kepado Allah. ( Jengon Membuat Urang Loen Bedoso) ¹³ Ulenyo iye, jengonlah kite saleng menghakemi, hambok lobeh beik bertekad untok hopi menaruh penghalang atau sebuah betu sandongon bage dolor kite. ¹⁴ Ake mengetahui ngan lah deyakenko delom Tuhan Yesus bahwa hopi ado sesuatu pon nyo najis deri hal iye dewek, hambok bage urang nyo menganggap bahwa segelo sesuatu adolah najis, maka hal iye najis bage dirinye. ¹⁵ Sabab, munye hati dolorme teluka ulenyo sesuatu nyo kowe makon, kowe hopi lagi hidop sesuoi kaseh. Jengonlah kowe membinasako nye dengan makanonme iye, ulenyo Kristus jugo lah mati untoknye. ¹⁶ Ulenyo iye, jengon biarko ape nyo kowe anggap beik defitnah sebagai sesuatu nyo jahat. ¹⁷ Sabab Kerajaon Allah bukonlah tentang makon ngan minom, hambok tentang kebonoron, damai sejahtera, ngan sukacita delom Roh Kudus. ¹⁸ Sabab siape pon nyo melayani Kristus dengan caro nie berkenan pado Allah, ngan dehormati mendesio. ¹⁹ Jedi, mailah kite ngejar hal-hal nyo mendetongke damai sejahtera ngan membengun satu dengan loen. ²⁰ Jengon merusak pekerjaon Allah hanyo ulenyo makanon! Segelo sesuatu halal, hambok jahatlah bage seseurang nyo makon ngan menyebabko urang loen bedoso. ²¹ Lobeh beik hopi makon degeng atau minom anggur, atau melakuko hal loen nyo depot menyebabko dolormu tersandong. ²² Pogonglah keyakenon nyo kou meleki untok dirime dewek de hadapon Allah. Berbahagialah urang nyo hopi menghakemi dirinye dewek terhadop ape nyo deanggapnye beik. ²³ Cuma hambok, urang nyo bimbang nak dehokom munye nye makon, ulenyo nye makon hopi berdasarko iman; ngan segelo sesuatu nyo hopi beasal deri iman adolah doso.