¹ Hendaklah setiap urang tondok kepado pemerintah nyo bekuaso pocoknye sabab hopi ado pemerintah hopi beasal deri Allah, ngan mike detetapko uleh Allah. ² Uleh ulenyo iye, siape nyo menentang pemerintah, nye menentang ketetapon Allah, ngan mike nyo menentang nak mendetongko hokomon atas dirinye. ³ Sabab, pemerintah hopi menyebabko ketakoton pado nyo bebuat beik, hambok pado nyo bebuat jahat. Endokkah kowe hidop tanpa raso takot terhadop pemerintah? Lakukolah ape nyo beik, ngan kowe nak mendepot pujion derinye ⁴ sabab mike adolah pelayan Allah demi kebeikonme. Cuma hambok, munye kowe melakuko ape nyo jahat, takotlah sabab bukon tanpa alason pemerintah menyandang pedang. Mika adolah pelayan Allah, penontot belos nyo menjelonko murka Allah kepado urang nyo bebuat jahat. ⁵ Sabab iye, kowe haros tondok, bukon anyo ulenyo murka Allah, hambok jugo ulenyo hatio nurani. ⁶ Iyelah sababnye kowe jugo membayar pajak, sabab mike adolah para pelayan Allah nyo mengabdiko dirinye untok hal iye. ⁷ Borilah kepado segelo ape nyo haros kou bori; pajak kepado nyo berhak nerimo pajak, cukai kepado nyo berhak nerimo cukai, raso takot kepado urang nyo berhak nerimo raso takot, ngan hormat kepado nyo berhak nerimo hormat. ⁸ Jengonlah behutang apepun kepado siape pun, hambok kasehilah sau ngan nyo loen ulenyo urang nyo mengasehi sesamonye lah memonohi Hukum Taurat. ⁹ Sabab, "Jengon berzinah, jengon membunoh, jengon maleng, jengon mengengeni, "ngan munye ado perentah loen, segelonye sodah terangkum delom pengehatoon nie, "Kasehilah sesamome upa dirime dewek." ¹⁰ Kaseh hopi melakuko kejahaton kepado sesamo mendesia. Ulenyo iye, kaseh adolah penggenapon Hukum Taurat. ¹¹ Upa iyelah pulo, kowe mengetahui waktunye bageme saat nie untok jego deri tidor; sabab kinie keselamaton sodah lobeh dekat bage kite deripado waktu pertamo kali kit pecayo. ¹² Malom sodah belalu ngan siang sodah parok, ulenyo iye mailah kite campok perbuaton-perbuaton kekolomon ngan mengenako perlengkapon senjeto tarang. ¹³ Mailah kite hidop ngan sopan upa pado waktu siang hari, bukon delom pesta pora ngan kemabokon, bukon delom percabulon ngan hawa nafsu, ngan bukon delom lelegeon sereta iri hati. ¹⁴ Cuma hambok, kenakolah Tuhan Yesus Kristus, ngan jengon merawat badanme untok memuasko keingenonme.