¹ Maka ake betanyo, "Apekah Allah lah menolak umat-Nye?" Sekali-kali hopi! Sabab, Ake dewek jugo seurang Israel, ketoronon Abraham, deri suku Benyamin. ² Allah hopi menolak umat-Nye, nyo lah depileh-Nye deri semula. Apekah kowe hopi tahu ape nyo Kitab Suci boekko tentang Elia, waktu nye mengaduko Israel kepado Allah? ³ "Tuhan, mike lah membunoh nabi-nabi-Me, mike lah merosak mezbah-mezbah-Me, ngan anyo ake dewek nyo maseh hidop, ngan mike endok mbunohke. ⁴ Cuma hambok, ape tanggapon ilahi nyo deboriko kepadonye? "Ake maseh membiarko 7.000 urang untok-Ke, nyo hopi pernah sujud menyembah kepado Baal." ⁵ Upanielah saat nie, ado suatu sisa nyo depileh berdasarko anugerah. ⁶ Cuma hambok, munye berdasarko anugerah, maka hopi lagi berdasarko perbuaton, sabab munye demikian anugerah hopi lagi menjedi anugerah. ⁷ Mengka upamone? Bengso Israel gagal memperuleh pe nyo dedeloknye, hambok mike nyo terpileh justru memperulehnye, sementara nyo loen lah mengarasko hatinye ⁸ upa ado tetules: "Allah membori mike roh pengantuk, mato nyo hopi pacok ngoleh, ngan telinga nyo hopi pacok mendongor, sampi hari nie." ⁹ Ngan Daud ngehatoko: "Uyukolah meja perjamuon mike menjedi jerat ngan perangkap, menjedi betu sandongon, ngan pembalason bage mike. ¹⁰ Biarlah mato mike dekolomko supayo mike hopi depot ngoleh, ngan ponggong mike debongkokko teros-meneros." ¹¹ Jedi, ake betanyo, apekah mike tepantok empok titek? Sekali-kali hopi! cuma hambok, ueh pelanggaron mike, keselamaton lah njongok kepado bengso-bengso bukon Yahudi, empok membuat mike cemburu. ¹² Sabab, munye pelanggaron mike menjedi kekayaon bage denia, ngan kegagalon mike menjedi kekayaon bage bengso-bengso bukon Yahudi, mangko lobeh-lobeh lagi kesempurnaon mika. ¹³ Kinie ake boek kepadome, hai bengso-bengso bukon Yahudi, justru ulenyo ake adolah rasul untok bengso-bengso bukon Yahudi, ake memuliako pelayanonke, ¹⁴ empok ake depot membuat dolor sebengsoke cemburu, ngan menyelamatko beberapo urang deri mika. ¹⁵ Sabab, munye penolakon mike berarti pendamaion atas denia, apekah artinye penerimaon mike seloen deri hidop deri antaro nyo mati? ¹⁶ Munye roti pertamo adolah kudus, segelo adonon adolah kudus. Ngan munye akar adolah kudus, maka cabang-cabangnye jugo kudus. ¹⁷ Cuma hambok, munye beberapo cabang lah depatahko, ngan kowe, nyo secaro alami adolah tunas liar nyo decangkokko de antaro mika ngan torot mendepot bageon delom akar ngan getah pohon zaitun iye, ¹⁸ jengonlah menjedi sombong terhadop cabang-cabang iye. Hambok munye kowe sombong, ingotlah bahwa bukon kowe nyo menopang akar, hambok akar nyo menopang kowe. ¹⁹ Mungken kowe nak boek, "Cabang-cabang iye depatahko empok ake depot decangkokko." ²⁰ Iye bonor! Mika depatahko ulenyo kehopipecayoon mike, hambok kowe togok ulenyo iman. Jengonlah sombong, hambok takotlah. ²¹ sabab munye Allah hopi menyayangko cabang-cabang asli, Nye jugo hopi nak menyayangko kowe. ²² Uleh ulenye iye, perhatikolah kebeikon ngan kekarason Allah; kekarason kepado mike nyo lah titek, hambok kebeikon-Nye kepado kowe munye kowe tetap tinggal de delom kebeikon-Nye. Muny hopi, kowe jugo nak detotok. ²³ Ngan mike jugo, munye mike hopi teros-meneros delom kehopipecayoonnye, mike nak decangkokkan ulenyo Allah bekuaso untok mencangkokko mike belek. ²⁴ Sabab, miunye kowe lah detotok deri ape nyo secaro alami adolah betong zaitun liar ngan decangkokko kepado betong zaitun nyo detundor, nyo berlawanon ngan sifatme, hopikah telobeh lagi mike nyo adolah cabang asli nak decangkokko pado betong zaitun mika dewek? ²⁵ Sabab, dolor-dolor, ake hopi endok kowe hopi tahuko rahasia nie empok kowe jengon menganggap dirime bijaksana, bahwa, sikap karas kepalo lah menimpa sebageon Bengso Israel sampoi pado penggenapon bengso-bengso loen detong. ²⁶ Ngan demikian, segelo urang Israel nak deselamatko. Upa ado tetules, "Penebus nak detong deri Sion, ngan Ny nak mencampokko kefasikon deri Yakub. ²⁷ Ngan nielah perjenjion-Ke dengan mike, tekalo Ake mengangket doso-doso mike." ²⁸ Menorot Injil, mike adolah mosoh demi kowe, hambok menorot pemilehon, mike adolah urang-urang nyo dekasehi demi nenek puyang mike. ²⁹ Sabab anugerah ngan panggelon Allah hopi depot debatalko. ³⁰ Sabab, samo upa kou nyo dehulu hopi taat pado Allah, hambok nyo kinie lah menerimo belas kasehon ulenyo kehopitaaton mike; ³¹ demikian pulo mike kinie hopi taat empok uleh belas kasehon Allah nyo lah denyatako kepadome mike jugo nak memperuleh belas kasehon. ³² Sabab, Allah lah menempatko mike segelo delom kehopitaaton empok Nye depot menunjukko belas kasehan-Nye kepado segelo urang. ³³ Oh, alangkah delomnye kekayaon ngan kebijaksanaon ngan pengetahuon Allah! Betapa hopi terseledeki keputuson-keputuson-Nye ngan hopi terduga jelon-jelon-Nye! ³⁴ "Sabab, siapekah nyo mengetahui pekeran Tuhan? Apo, siapekah nyo depot membori-Nye nasihat?" ³⁵ "Atau, siapekah nyo pernah membori sesuatu kepado-Nye sebolomnye, ngan haros debalas uleh-Nye? ³⁶ Sabab segelo sesuatu adolah deri Nye, ngan uleh Nye, ngan kepado Nye. Bage Nyelah kemuliaon sampoi selamo-lamonye! Amin.