¹ Ake mengoleh tando loin de langet, nyo godong ngan ajaib, tujuh malaikat nyo mengunda tujuh bencana, yaitu bencana nyo teaher, ulehnyo delom ketujuh bencana iyelah murka Allah de aheri. ² Mengka, ake mengoleh sesuatu upa louton kaco becampur api ngan mike nyo lah mengalohko binatong iye, patungnye, ngan angko namonye, togok de topi louton kaco iye dengan memogong kecapi Allah. ³ Mike menyanyiko nyanyion Musa, hambo Allah, ngan nyanyion Anak Domba: "Godong ngan ajaib segelo pekerjaon-Me, Ao Tuhan, Allah Nyo Mahakuaso. Adil ngan bonor segelo jelon-Me, ao Rajo segelo bengeso. ⁴ Siapekah nyo hopi takut kenempat-Me, ao Tuhan ngan hopi memuliako namo-Me? Sabab, anyo Kowelah nyo kudus. Segelo bengeso bakal njongok ngan menyembah de hadopon-Me ulehnyo keadilon-Me lah de nyatako." ⁵ Lah segelo tong nie, ake mengoleh Bait Allah, kemah kesaksion Allah de serga, tebukak. ⁶ Tujuh malaikat nyo mengunda tujuh bencana iye keluor deri Bait Allah, bepakoyon linen nyo puteh ngan bekilau, ngan memakoi selempang emas de dado mike. ⁷ Sikuk deri keempat makhluk memboriko kenempat ketujuh malaikat iye tujuh cawan emas, ponih murka Allah, nyo hidop sampoi selamo-lamonye. ⁸ Bait Allah de ponuhi dengan hasop deri kemuliaon Allah ngan deri kuaso-Nye; ngan hopi seurang pun depot memasuki Bait Allah sebolum tujuh bencana deri ketujuh malaikat iye beaher.