(Perumpamaon tentang Penabor) ¹ Mengka, Yesus mulai mengajor lagi de topi denou. Bekompollah mengerumuni Yesus urang lobot nyo jumlahnye godong sehingga Nye noek ke delom sebuah biduk ngan dodok de atas danau. Sementaro, urang lobot iye ado de derot, de topi denou. ² Ngan, Nye mengajor mike tentang lobot hal ngan perumpamaon-perumpamaon. delom pengajoron-Nye, Nye boek kepodo mike, ³ "Dongorlah! Ado seurang penabor nyo lari untok menabor. ⁴ Mengka terjedilah, tekalo nye sedang menabor, beberapeh beneh titek de topi jelon, ngan borong-borong njongok, lalu memakonnye. ⁵ Sebageon titek de pocok tanoh bebetu nyo hopi lobot tanohnye. Beneh iye cepat tomboh ngan cepat ulenyo tanohnye hopi delom. ⁶ Tekalo matohari semaken saket, tenaman iye hangos ngan ulenyo hopi memeleki akor, tenaman iye menjedi koreng. ⁷ Sebageon titek de tangah-tangah somok unok. Mengka, somok unok betomboh ngan mengepet tenaman iye sampoi mati, ngan tenaman iye hopi memboriko buah. ⁸ Hambok, sebageon titek de tanoh nyo beik ngan menghaselko buah, betomboh, ngan betamboh godong, serta menghaselko tiga poloh kali lipot, enom poloh kali lipot, ngan seratus kali lipot." ⁹ Kemudion, Yesus boek, "Siape nyo mempunyoi telinga untok mendongor, biarlah enye mendongor!" ¹⁰ Podo waktu Yesus dedewekon, urang de sekelileng-Nye, besamo ngan kedua belas rasul, menanyoko kepodo-Nye tentang perumpamon-perumpamaon iye. ¹¹ Mengka, Ne nyimbot mike, "Resio Kerajaon Allah lah deboriko kepodome. Cuma hambok, kepodo urang-urang loen, setiap hal desampoiko delom perumpamaon-perumpamaon, ¹² empoknyo, "Meskipon depot ngoleh, mike ngoleh ngan hopi mengetahui; ngan meskipon depot mendongor, mike mendongor ngan hopi memahami. empoknyo mike jengon betobat ngan deamponi." "Yesaya 6:9-10 ¹³ Kemudion Yesus boek kepodo mike, "Hopikah kowe tereti perumpamaon nie? Upamone kowe depot tereti segelo perumpamaon iye? ¹⁴ Penabor iye menaborko firman. ¹⁵ Mika iye adolah urang-urang nyo titek de topi jelon, tempat firman iye detaborko. saat mike mendongor, ngan cepat beles jongo ngan merobot firman nyo detaborko kepodo mike. ¹⁶ Upa iye jugo, mike nyo detabor de tanoh bebetu adolah urang-urang nyo mendongorko firman ngan langsong menerimonye ngan sukacita. ¹⁷ Cuma hambok, mike hopi beakor de delom dirinyo dewek ngan anyo betahan sementaro. Kemudion, tekalo jongo kesuleton apo penganiayaon ulenyo firman iye, mike langsong tetitek. ¹⁸ Ngan, loennye adolah nyo titek de tangah-tangah somok unok. Mike adolah urang-urang nyo mendongor firman, ¹⁹ cuma kekawateron akan denia, ngan hawo nafsu akan kekayoon, ngan keendokon-keendokon akan hal-hal loen masok de antaro firman iye ngan mengepetnye singgo ye hopi mehaselko buah. ²⁰ Hambok, mike nyo detabor detano nyo beik adolah mike nyo mendongor firman, menrimonnye, ngan menghaselko buah, tiga poloh kali lipot, enom poloh kali lipot, ngan seratos kali lipot." ²¹ Meka, Yesus boek kepodo mike, "Bukonkah lampu hopi deundah untok depoteko de bewo sebuah gantang apo de bwo sbuah deman tidor? Bukonkah lampu iye seharosnnye depotekko de atas kaki lampu? ²² Sabab, hopi ado nyo tekerawo nyo hopi deungkapko. Upaiyoy jugo, hopi ado resio apo pun ulenyo hal iye nak denyatoko. ²³ Munye ado urang nyo mempunyoi telinga untok mendongor, biarlah nye mendongor!" ²⁴ Meka, Yesus boek kepodo mike "Perhatikolah ape nyo kou dongor. Okoron nyo kou pakoi nak deokorko kepodome, ngan lagi ado lagi nyo nak detambohko kepodome. ²⁵ Ulenyo siape nyo mempunyoi, nye nak debori lagi, cuma siape nyo hopi mempunyoi, ape pun jugo nyo ado podonye nak deambek derinye." ²⁶ Kemudion, Yesus boek, " Kerajaon Allah adolah upa seseurang nyo menabor beneh de tanoh. ²⁷ Penabor iye tidor ngan jego siang ngan malom, ngan beneh iye mengeluorko tunos ngan tomboh. Penabor iye hopi tahu upamone terjedinye. ²⁸ Tanoh iye menghaselko buah ngan dedewekon. Mula-mula Tunos, kemudion bulirnye, mengka biji-biji gandum de delom boler iye. ²⁹ Tekalo biji-biji gandum iye masok, urang iye langsong menyabetnye ulenyo mosem panen lah sampoi." ³⁰ Kemudion, Yesus boek, "Ngan apokah kite depot membandengko Kerajaon Allah? Apo, ngan perumpamaon Apokah kite depot membandengkonnye? ³¹ Kerajaon Allah iye upa biji sesawi nyo detabor de tanoh, walaupon biji iye adolah biji nyo sajo kecik de antaro sgelo biji de bumi, ³² cuma tekalo detabor, biji iye nak tomboh ngan menjedi sajo godong deripado segelo tenaman kebon, ngan mengeluorko cangka-cangka godong sehingga borong-borong de awong-awong depot membuat sangkor de bewo naungonnye." ³³ Ngan, memakoi lobot perumpamaon upa iye, Yesus memberitako firman kepodo mike, sesuoi ngan nyo depot mika dongor. ³⁴ Nye hopi perenah boek kepodo mike tanpa suatu perumpamaon, cuma Nye jelasko segelonye ngan dedewekon kepodo mored-mored-Nye. ³⁵ Ngan, podo hari iye, singgo lah petang Yesus boek kepodo mored-mored-Nye, "Mayoklah kite bejelon ke seberang denou." ³⁶ Setelah meninggalko urang lobot iye, mike ngunda Yesus besamo mika masok ke biduk deman Yesus nantek. Ngan, biduk-biduk loennye besamo ngan-Nye. ³⁷ Meka, terjedilah angen topan nyo sajo seleh ngan ombak godong mehempasko biduk sehingga biduk pun akhernnye ponoh ngan aek. ³⁸ Hambok, Yesus ado de buriton biduk, tidor de atas bentol. Meka, mike menjegoko-Nye ngan boek kepodo-Nye, " Guru, apokah Kowe hopi peduli munye kite binaso?" ³⁹ Kemudion, Yesus jego ngan membentak angen, meka boek kepodo lout, "Diom! Tenanglah!" Meka, angen iye berenti ngan menjedi sajo tenang. ⁴⁰ Kemudion, Nye boek kepodo mike, " Mengka kowe ketakoton? Apokah kowe maseh bolom mempunyoi Iman?" ⁴¹ Mike menjedi sajo takot ngan boek sikok samo loen, "Siapokah Enyo nie? Bahkan angen kencang ngan lout bahkan taat kepodo-Nye!"