¹ Kinie, sesodah Sabat, sajo menjelang fajar, tekalo hari pertamo minggu iye, Maria Magdalena ngan Maria nyo loin pogi untuk ngoleh kuburon iye. ² Ngan, koleko, terjedilah gempo behumi nyo godong ulenyo malaikat Tuhan turun deri serga, njongok ngan menggulengko betu iye, mengka duduk de pucuknye. ³ Wajahnye upa kilat ngan pakoyonnye puteh upa salju. ⁴ Ulenyo raso takut terhadopnye, mike nyo menjego iye teguncang ngan menjedi upa urang-urang teelek. ⁵ Ngan, malaikat iye buik kenempat betina-betina iye," Jengon takut ule ake tahuko munye kowe ndelok Yesus nyo sodah de salibko. ⁶ Enye hopi ado de sie ulenyo enye la bangket upa nyo de buikko-Nye. Maro, kolehkolah de nempat Enye bebareng. ⁷ Cecepatlah bejelon ngan boritahuko murid-murid-Nye behwo Enye sodah bangket deri antaro urang teelek, ngan kolehkolah, Enye mendehului kowe ke Galilea. Desane, kowe nak ngoleh Enye. Perhatikolah, ake sodah ngehatokonye ngan kowe." ⁸ Ngan, mike cepat-cepat meninggalko kuburon iye dengan ketakuton ngan sukacita godong; ngan belari untuk memboritahuko iye kenempat murid-murid-Nye. ⁹ Ngan, koleko, Yesus menomui mike ngan buik," Salam!" mengka, mike njongok kenempat Yesus, memogong kaki-Nye, ngan menyembah-Nye. ¹⁰ Mengka, Yesus buik ngan mike, " Jengon takut; pogi ngan tetelakolah dulur-dulur-Ke untuk bejelon ke Galilea, ngan de sane, mike nak ngoleh Ake." ¹¹ Sementaro mike bejelon, beberape penjego bejelon ke kota ngan memboritahu imam-imam kepalo tentang segelo hal nyo lah terjedi. ¹² Ngan, tekalo mike de kumpulko serompok padong tua-tua. Tekalo berundeng, mengka mike memboriko lobot duit kenempat padong penjego iye, ¹³ Ngan buik, "Tetelakolah, murid-murid Yesus njongok tekalo hari malom ngan memaleng-Nye tekalo kami tidur.' ¹⁴ Ngan, munya hal nie tedongor uleh gubernur, kamie nak menyakinkonye ngan membuat kowe hopi cemas." ¹⁵ Majo, mike nrimo duit iye ngan melakuko upa nyo lah de ajarko kenempat mike; ngan pembuikon iye lagi tesebar de antaro urang Yahudi sampoi ari nie. ¹⁶ Mengka, kesebelas murid bejelon ke Galilea, ke buket nyo lah detunjukko Yesus kenempat mike. ¹⁷ Tekalo mike mengoleh-Nye, mike menyembah-Nye. Cuma hambuk, beberape ikuk ragu-ragu. ¹⁸ Mengka, Yesus njongok ngan buik kenempat mike, " Segelo kuaso lah de boriko ngan Ake, de serga moupun de behumi. ¹⁹ Ulenyo iye, bejelonlah ngan muridkolah segelo bengeso, baptiskolah mike delom namo Bepak, ngan Anak, ngan Roh Kudus, ²⁰ ajorlah mike untuk menaati segelo nyo Ake perentahko ngan kowe; ngan kolehkolah, Ake selalu bersamome, bahkan sampoi kenempat aher zaman."