( Yesus Tampak Bersamo Musa Ngan Elia ) ¹ Enom hari kemudion, Yesus mengajok Petrus, Yakobus serta Yohanes dulur Yakobus, ngan ngunda mike noek ke gunong nyo tinggi secaro tersendiri. ² Mengka, Yesus berubah rupa de depan mike. Wajah-Nye bersinar upa matoari ngan pakoiyon-Nye menjedi seputeh cayo. ³ Ngan, kolehko, kenanlah ngan mike Musa ngan Elia, sedang bebencang dengan Yesus. ⁴ Petrus buik ngan Yesus, " Tuhan, adolah beik bag kite untuk berado de sie, aku bakal mendiriko tiga kemah de sie, satu untuk-Me, satu untuk Musa, ngan satu untuk Elia." ⁵ Tekalo Petrus lagi buik, sebuah aban nyo tarang menaongi mike, ngan koleko, ado suara jak aban iye nyo buik, " Nielah Anak-Ke nyo Kukasehi ngan kepodo-Nye Ake berkenan, Dongorkolah Nye." ⁶ Tekalo murid-murid dongor tong nie, mike tesungkur dengan wajah sampoi ketanoh ngan sajo ketakuton. ⁷ Cuma, Yesus njongok ngan menyentuh mike ujo-Nye," Jegolah ngan jengon takut." ⁸ Tekalo mike mengangkat mato mike, mike hopi ngoleh siapepun, kecuali Yesus dewek. ⁹ Singgo mike turun jak gunong, Yesus memerentahko mike, ujo-Nye, " Jengon ceritoko pengolehon iye kenempat siapepun sampoi Anak Mendesio debangketko deri antaro urang teelek." ¹⁰ Ngan, murid-murid betanyo dengan-Nye," mengka, teape ahli-ahli Torat buik bahwa Elia harus njongok sajo ndehulu?" ¹¹ Yesus nyimbot, " Elia memang njongok sajo ndehulu ngan bakal memuliako segelo sesuatu. ¹² Hambuk, Ake ngehatoko ngan kowe bahwa Elia sodah njongok, , cuma mike hopi mengenalinye ngan memperlakukonye menurut kemouon mike. Upa iyelah jogo Anak Mendesio bakal menderita de tangon mike." ¹³ Mengka, padong murid tereti bahwa enye ngomong ngan mike tentang Yohanes Pembaptis. (Seurang Anak Debebasko deri Roh jahat) ¹⁴ Tekalo Yesus ngan murid-murid ngulang kenempat urang lobot, seurang jenton njongok kenempat Yesus ngan berlutut de hadopon-Nye sambel buik, ¹⁵ " Tuhan, kasehanilah anakke sabab nye saket ayan ngan sajo menderito. Enye galak titek ke delom api ngan ke delom aik. ¹⁶ Ake sodah ngundanye kenempat murid-murid -Me, cuma enye hopi depot menyombuhkonnye." ¹⁷ Yesus nyimbot, " Hai, kowe generasi hopi pecayo ngan sosot ! Berape lamo lagi Ake nak tinggal besamome? Berapo lamo lagi Ake harus besabar terhadop kowe ? Undalah anak iye kepodo-Ke." ¹⁸ Mengka Yesus menyegak roh jahat iye sampoi keluor jak anak jenton iye, ngan anak iye sombuh seketiko iye jugo. ¹⁹ Mengka padong murid njongok kenempat Yesus, tekalo mike dedewekon dengan Enye ngan betanyo," Mengka kamie hopi pacok ngusir roh jahat iye ?" ²⁰ Ujo-Nye kenempat mike," Ulenyo imanme nyo kecik. Ake ngehatoko nyo sebonornyo ngan kowe, munye kowe mempunyoi iman segodong biji sesawi bae, mengka kowe depot bekehato kenempat gunong iye," Pendahlah jak tempat nie ke sane ! ngan gunong iye bakal pendah. Hopi ado nyo mustahel bagime. ²¹ [ Hambuk cuma, roh jahat jenis nie anyo depot de gerah dengan doa ngan puaso."] (Yesus buik tentang Kemation-Nye) ²² Tekalo Yesus ngan murid-murid-Nye sedang bekumpul de wilayah Galilea, Enye buik ngan mike," Anak Mendesio bakal deserahko kedelom tangon mendesio, ²³ ngan mike bakal membunoh-Nye, ngan Enye bakal de bangketko singgo hari nyo ketigo." Ngan, padong murid-Nye menjedi sajo sedih. ²⁴ Tekalo mike sampoi de Kapernaum, padong pengumpul pajak 2 dirham njongok kenempat Petrus ngan betanyo, " Ibo gurume hopi membayar pajak 2 dirham ?" ²⁵ Petrus menyimbot," Ao". Tekalo enye masuk kedelom rumah, Yesus telobeh ndehulu buik ngan enye, "Upamone pendepotme, Simon? Deri siapekah rajo-rajo denia nie nyo nagih bea ngan pajak? Jak anak-anaknye ngan jak urang loin ?" ²⁶ Tekalo Petrus nyimbot," jak urang loin," Yesus buik ngan enye, " Memunye, anak-anaknye bebas. ²⁷ Cuma hambuk, enggak konyo kite hopi menyinggung enye, pogilah ke denou ngan tohukkolah kail. Ambeklah ikan nyo petamo nimbul ngan tekalo kou mbukak mulutnye, kowe nak menomuko sekepeng stater. Ambeklah duit iye ngan borikolah kenempat enye, bagi-Ke ngan bagime."