( Yesus Ngan Zakheus) ¹ Mangko, masoklah Yesus ngan melewati Kota Yerikho. ² Desane ado seurang jenton benamo Zakheus, enye adolah kepalo penageh pajak ngan seurang nyo sogeh. ³ Enye berusaha ngelek Yesus, hambok hopi pacok ulehnyo tehakong urang lobot, sabab badannye pandok. ⁴ Jedi, Zakheus belari mendehului urang lobot ngan noek sebetong kayu aro untok ngelek Yesus ulehnyo Enye akan melewati jelon iye. ⁵ Tekalo Yesus sampoi dedeman Zakheus berado , Enye ngelalo kepocok ngan bekehato kepadonye, " Zakheus, cecepat lah toron ulehnyo sari nie Ake nharos tandong ke rumahme." ⁶ Mangko, Zakheus pon cepat- cepat toron ngan menerimo Yesus dengan besukacita. ⁷ Hambok, tekalo segelo urang ngelek hal iye, rombongon iye mulai berotuk ngan bekehato, " Enye menjedi tamu de rumah seurang nyo bedoso." ⁸ Kemudion, Zakheus togok ngan bekehato kepado Tuhan, " Tuhan keleklaah, separoh deri retoke akan ku boriko kepado urang mesken, ngan munye ake lah menggelapko reto seseurang, ake akan mambelekonye empat kali lipot. " ⁹ Mangko, Yesus bekehato kepado Zakheus, " Pado sari nie, keselamaton lah detong atas rumah nie ulehnyo urang nie jugo anak Abraham. ¹⁰ Sabab, Anak mendesio detong untok deloki ngan menyelamatko nyo sayau." ¹¹ Sementaro rombongon iye mendongorko segelo tong nie, Yesus melanjotko dengan menceritoko sebuah perumpamaon ulehnyo Enye sodah parok dengan Yerusalem ngan rombongon iye menyangko behwa Kerajaon Allah akan secepanye detong. ¹² Ulehnyo iye Enyepon bekehato," Seurang bengsawon bejelon kenegeri nyo jouh untok deangkot menjedi rajo, ngan sesodah iye enye belek. ¹³ Kemudion, tuan iye mengompolko sepoloh urang pelayannye ngan membori nye doet selobot 10 mina. Ujonye kepado rombongon iye, ' Bedegonglah menggunako doet nie sampoi ake belek.' ¹⁴ Hambok sebeleknye, urang- urang sebengsonye luat ngan enye ngan mengiremko perwakelon setelah nye bejelon untok bekehato,' Kamie hopiendok urang nie menjedi rajo atas kamie.' ¹⁵ Setelah deangkot menjadi rajo, bengsawon iye belek nan memerentahko hambo- hambo nyo lah deborinye doet iye depantou untok menghadopnye empokno enye [acok mengetahui seberape gede keontungon nyo rombongon iye depotko deri bedegong. ¹⁶ Pelayan nyo pertamo jongok ngan bekehato, ' Tuan, doet nyo 1 mina punyome iye lah manghaselko 10 mina laagi. ' ¹⁷ Rajo iye bekehato kepadonye,' Sajo beik, hai kowe hambo nyo beik! ulehnyo kowe setia delom oroson nyo kecik, kowe kan memerentah atas sepoloh kota.' ¹⁸ Pelayan nyo keduapon jongok ngan bekehato,' Tuan, doet 1 mina punyome lah menghaselko 5 mina.' ¹⁹ Lalu, sang rajo bekehato kepado hambo iye, ' Bekuasolah kowe atas 5 kota.' ²⁰ Kemudion, jongoklah gambonyo sikuk lagi ngan bekehato.' Tuan, nio 1 mina punyome nyo ku simpan delom sapu tangon. ²¹ Ake takpt kepadome sabab kowe urang karas, Kowe mengambek ape nyo hopi perenah kowe simpan ngan menuoi apa nyo hopi perenah kowe tandor.' ²² Kemudion rajo iye bekehato kepadonye,' Ake akan mengadelime sesuoi dengan perkehatoonme, hai mowe hambo nyo jahat! Jedi, kowe tahuko behwa ake adolah urang nyo karas, nyo ngambek ape nyo hopi perenah ku simpan ngan menuoi ape nyo hopi u tandor? ²³ Munye memunye, mengka kpwe hpi moteko doetke de deman urang menjelonko doet sehinggo tekalo ake belek, ake akan menerimo doetku iye besereta bunganye?' ²⁴ Lalu, rajo iye bekehato kepado urang- urang nyo togok desane, ' Ambek mina iye jakenye ngan borikolah kepado urang nyo mempunyoi 10 mina.' ²⁵ Hambok, rombongon iye bekehato kepado sang rajo, ' Tuan, hambo iye sodah mempinyoi 10 mina.' ²⁶ Simbot rajo iye,' Ake bekehato kepadome, setiap urang nyo mempunyoi akan debori lobeh, hambok jak urang nyo hopi mempunyoi apepon, segelo nyo depunyoinye akan deambek. ²⁷ Hambok sebeleknye, tentang mosoh- mosohke nyo hopi mengendoko ake menjedi rajo atas mike, undahlah kemai ngan bunohlah rombongon iye dehadoponke." ²⁸ Setelah Yesus mengehatoko hal- hal iye, enye bejelon dehulu menuju Yerusalem. ²⁹ Tekalo enye sampoi deparok desa Betfage ngan Betania, parok buket benamo Buket Zaitun, Enye mengotos dua urang mored-Nye. ³⁰ Ujp-Nye kepado nye, " Bejelon;ah ke desa nyo ad depanme iye/ Ngan, tekalo kowe masok de sane, kowe akan ngelek seikuk anak keledai nyo tekobot ngan bolum perenah denoeki urang lapskolah anak keledai iye ngan undahlah kemai. ³¹ Munye ado urang betanyo kepadome, ' Mengka kowe ngundah keledai iye?', kehatokolah upamio: Tuhan memerlukonye." ³² Lalu, bejelonlah kedua mored nyo deotos-Nye iye ngan menomuko segelo sesuatu perecis upa nyo lah dekahatoko-Nye kepado rombongon iye. ³³ Selagi melapasko keledai iye iye, tuannye betanyo kepado rombongon iye. "Mengka kowe melapasko anak keledai iye?" ³⁴ rombongon iyepon menyimbot, "Tuhan memerlukonye." ³⁵ Lalu, rombongon iye ngundah anak keledai iye kepado Yesus ngan memoteko buntelon bejunye de pocok ponggong keledai iye, kemudion menoeko Yesus kepocoknye. ³⁶ Tekalo Yesus melewati jelonon, urang - urang membotongko pakoinnye dejelon. ³⁷ Ngan, tekalo Yesus sodah semaken parok Yerusalem, iyelah dejelon nyo menoron deri arah buket Zaitun, segelo pengikot-Nye mulai memuji Allah dengan bersukacita ngan suaro nyo lantang. Rombongon iye bersyokor kepado Allah atas segelo mukjizat nyo lah rombongon iye kelek. ³⁸ Rombongon iye bepekeon, " Deberkatilah Enye nyo jongok sebagoi Rajo delom namo Tuhan, damai sejahtera de sorga ngan kemuliaon de deman nyo mahatinggi!" Mazmur 118: 26 ³⁹ Beberape urang Farisi jak kerumunon urang lobot iye bekehato kepado Yesus, " Guru, tegorlah mored- mored-Me." ⁴⁰ Hambok sebeleknye, Yesus menyimbot, " Ake bekehato kepadome, munye rombongon nie diom, betu- betu nielah nyo akan bepekekon. " ⁴¹ Saat Yesus sodah parok de kota Yerusalem ngan ngelek kota iye, Enyepon meratopinye. ⁴² Kehatonye, " Seandoinye sarinie kowe tahuko ape nyo mendetongko damai sejahtera atasme. Hambok sebeleknye, kinie hal iye tekerawo jak matome. ⁴³ Sabab akan jongok waktunye tekalo mosoh- mosohme akan membegun tembok penghalang desekelilengme ngan mengepongme jak segelo arah. ⁴⁴ rombongon iye akan merontohkome, kowe besereta anak- anakme nyo belindong pado tembokme. Ngan, rombongon iye hopi akan menyisako sikuk betupon tesooon de pocok betu nyo loen dedelomme sabab kowe hopi mengenali waktu tekalo Allah melawatme." ⁴⁵ Kemudion, Yesus ke Bait Allah ngan mulai mengoser keluor urang- urang nyo bejualon desane. ⁴⁶ Ujo-Nye kepado rombongon iye, " Ado tetoles: 'Rumah-Ke akan menjedi rumah doa,' hambok kowelah menjadikonye sebagoi sarong perampok!" ⁴⁷ Lalu, Yesus mengajor de Bait Allah setiap ari. Gambok, imam- imam, ahli- ahli Taurat, ngan padong pemempen bengso iye mendeloki caro untok membunoh-Nye. ⁴⁸ Hambok sebeleknye, rombongon iye hopi tahuko upamone melakukonye sabab segelo urang memogong toguh perkehatoon Yesus.