¹ Ketiko Yesus sedang bejelon, Enye ngoleh urang nyo buta sejak lahernye. ² Mured-mured Yesus betanyo kenempat-Nye, " Guru, siapekah nyo bedoso, urang nie atau indok bepaknye sehinggo nye delaherko buta?" ³ Yesus menjawab, "Bukon enye ataupon indok bepaknye bedoso, meloenko empokyo gawe-gawe Allah denyatoko de delom enye. ⁴ Kite haros gaweko gaweon-gaweon Enye nyo mengutos Ake selmo ari lagi siang; malom nak jongok saat hopi do seurang pon depot begawe. ⁵ Selamo Ake lagi de denia, Akelah tarang denia." ⁶ Sesodah gerako demikion, Yesus meludah ke letak ngan ngacou ludah-Nye ngan letak, mengkah ngosokkonye ke mato urang iye, ⁷ ngan boek kepodonye, "Lari besuhlah dirime de kolam Siloam." Siloam artinye "deutos". Lalu, urang iye lari, membesuh dirinye, ngan enye belek ngan ngelek. ⁸ Para tetanggo ngan mike nyo sebolomnye ngelek enye sebagai urang buta boek, "Bukonkah urang nie nyo biasonye dodok ngan mengemis?" ⁹ Sebageon urang boek, "Ao, enyelah pengemis iye." Yo loen boek, "Bukon, enye hanyo merep ngan pengemis iye." Hambok, urang nyo tadinye buta iye boek, "Akelah pengemis iye.'' ¹⁰ Mengkah, urang-urang iye betanyo kepodonye, ''Upamone matome pacok decelangko?" ¹¹ Urang iye menjawab, "Urang nyo benamo Yesus iye ngacou letak ngan culetkonye ke matoke. Kemudion, Enye boek kepodoke, 'Lari ke Siloam ngan besuhlah dirime', jedi ake lari ngan membesoh diri, ngan ake depot ngelek." ¹² Mike boek kepodonye, "De monekah Urang iye?" ¹³ Kemudion, mike ngundah urang nyo tadinye buta iye kenempat urang-urang Farisi. ¹⁴ Adopon ari ketiko Yesus ngacou letak ngan membuka mato urang iye adolah hari Sabat. ¹⁵ Mengkah, urangt-urang Farisi sekali lagi menayoko kepodo urang iye upamone enye depot ngelek. ¹⁶ Ulenyo iye, beberape urang Farisi iye boek, "Urang iye hopi beasal deri Allah ulenyo enye hopi mematohi hari Sabat." Nyo loen boek, "Cuma hambok, upamone mungken urang nyo bedoso depot melakuko tando ajaib upa nie?" Mengkah, timbollah pepecahon deantaro mike. ¹⁷ Jedi, mike belek betanyo podo urang buta iye, "Ape pendepotme tentang Enye ulenyo Enye lah membukako matome?" ¹⁸ Urang-urang Yahudi iye tetap hopi pecayo kepodonye, bahwa urang iye tadinye memang buta cuma kinie depot ngelek, sampoi mike mantou urang rayo deri urang nyo kinie depot ngelek iye, ¹⁹ ngan betanyo ke podo mike, "Apekah nie anakme, nyo kou gerako buta sejuak laher? Munye upa iye, upahmone enye kinie depot ngelek?" ²⁰ Indok bepaknye menjawab mike ngan boek, "Kamie tahu bahwa enye anak kami ngan bahwa enye buta sejak laher, ²¹ cuma upamone kinie enye depot ngelek, kami hopi tahu; atau siape nyo lah bembuka matonye, kamie hopi tahu. Tanyoko bae ngannye, enye lah godong; enye nak boek untok dirinye dewek." ²² Indok bepaknye gerako demikion ulehyo mike takot kepodo urang-urang Yahudi. Sabab, urang-uraqng Yahudi iye lah sepakat, bahwa setiap urang nyo mengakui Yesus sebagai Kristus, nak dekucelko deri sinagoge. ²³ Iyelah sababnye indok bepaknye boek, "Enye lah godong, tanyoko bae kepodonye." ²⁴ Jedi, untok kedua kalinye urang-urang Yahudi mantou urang nyo tadinye buta iye, ngan boek kepodonye, "Boriko kemuliaon bage Allah, kami tahu bahwa Urang nie bedoso." ²⁵ Enye menjawab, "Apekah Urang iye urang bedoso tau hopi, ake hopi tahu; sikok hal nyo ake tahu, sebolomnye ake buta, cuma kinie ake ngelek." ²⁶ Mike boek kepodonye, "ape nyo enye lakuko kepodome? Upamone Enye buka matome?" ²⁷ Enye menjawab mike, "Ake lah gerakonye kepodome, cuma kowe pindok dongorkonye; mengkah kowe endok dongorkonye lagi? Apekah kowe endok menjedi mured-Nye jugo?" ²⁸ Mengkah, mike menghino enye ngan boek, "Kowelah mured Urang iye, cuma kami adolah mure-mured Musa. ²⁹ Kami tahu bahwa Allah lah boek kepodo Musa, cuma tentang Urang iye, kami hopi tahu deri mone Enye beasal!" ³⁰ Urang iye menjawab ngan boek kepodo mike, "Sajo aneh baha kowe hopi tahu deri mone Enye beasal, padohal Enye lah membuka matoke. ³¹ Kite tahu bahwa Allah hopi mendongorko urang bedoso, cuma siape pon nyo takot akan Allah ngan melakuko kendok-Nye, Allah mendongorko enye. ³² Jak tekaloe sampoi kinie, bolom perenah dedongor bahwa seseurang membuka mato urang nyo buta sejak laher. ³³ Munye Urang iye hopi beasal deri Allah, Enye hopi depot bebuat ape-ape." ³⁴ Urang-urang Yahudi iye menjawab ngan boek kepodonye, "Kowe laher ponoh ngan doso, ngan kowe endok menggurui kami?" Mengka, mike nguser urang iye. ³⁵ Yesus mendongor bahwa urang-urang Yahudi lah menguser urang buta iye; ketiko Yesus betomu ngan enye, Yesus boek, "Apekah kowe pecayo kepodo Anak Mendesio?" ³⁶ Urang iye menjawab, "Siapekah Enyo iye, Tuhan, empoknyo Ake pecayo kepodo-Nye?" ³⁷ Yesus boek kepodonye, "Kowe lah ngelek Enye. Enye adolah nyo edang boek nganme." ³⁸ Urang iye menjawab, "Tuhan, ake pecayo!" Kemudion, enye sujud de hadopon-Nye. ³⁹ Yesus boek, "Untok penghakemon Ake jongok ke denia nie empoknyo mika nyo hopi ngelek, depot ngelek ngan mika nyo ngelek, menjedi buta." ⁴⁰ Beberape urang Farisi nyo ado de parok-Nye mendongor hal iye, ngan boek kepodo-Nye, "Apekah kami jugo buta?" ⁴¹ Yesus boek kepodo mike, "Munye kowe buta, kowe hopi mempuyoi doso; cuma ulenyo kowe boek, 'Kami ngelek', dosome tetap ado."