¹ Lah Yesus ngehatoko hal -hal nie, Enye pogi serompok murid-murid-Nye ke seberang sungai Kidron, tempat terdepotnye sebuah taman ngan Yesus masuk ke delomnye serompok murid-murid-Nye. ² Yudas, saloh seurang murid nyo menghianati Yesus, jugo tahuko taman iye ulehnyo Yesus sereng bekumpul serompok murid-murid-Nye de sane. ³ Yudas, lah menerimo sejumlah pasukon ngan hambo-hambo deri imam-imam kepalo ngan urang-urang Farisi, njongok ke taman iye dengan mengunda lentera, obor, ngan senjata. ⁴ Yesus, nyo tahuko segelo hal nyo bakal terjedi pado-Nye, maju ke depan ngan betanyo kenempat mike," Ibo nyo kowe dalak?" ⁵ Mike nyimboti," Yesus deri Nazaret." ⁶ Tekalo Yesus buik, " Akelah Yesus," urang-urang iye mundur ngan titek ke tanoh. ⁷ Mengka, Yesus betanyo lage kenempat mike," Ibo nyo kowe dalak?" ⁸ Yesus nyimboti," Lah Ke Kehatoko kenempatme, Akelah Yesus. Jedi, munye kowe bedalak Ake, biarkolah murid-murid-Ke nie pogi." ⁹ Hal nie terjedi enggakkonyo genaplah pembuikkon nyo lah de kehatoko Yesus: " Deri segelo nyo Kowe boriko kenempat-Ke, Ake hopi kesayauan sikuk pun." ¹⁰ Simon Petrus, nyo mengunda sebilah pedang, menghunus pedangnye ngan menyabetkonye pado pelayon Imam Godong, singgo menototok telingo kanon pelayon iye; namo pelayon Imam Godong iye adolah Malkhus. ¹¹ Mengka, Yesus buik kenempat Petrus, " Masukko pedang iye kedelom sarungnye! cawan nyo lah Bepak boriko kenempat-Ke, bukonkah Ake harus meminomnye?" ¹² Mengkah, padong prajurit Romawi ngan perwira-perwiranye sereta padong pelayon urang Yahudi menangkop Yesus ngan mengobot Enye, ¹³ Ngan telobeh dehulu mengunda Yesus kenempat Hanas, mentuha Kayafas, nyo adolah Imam Godong pado tahun iye. ¹⁴ Ngan, Kayafaslah nyo menasehati urang-urang Yahudi behwo adolah hal nyo beguna munye sikuk urang te'elek demi rakyat. ¹⁵ Simon Petrus ngan seurang murid loin mehilui Yesus. Murid nyo loin iye de kenal ule Imam Godong ngan enye masuk serompok Yesus ke delom halamon istana Imam Godong. ¹⁶ Cuma hambuk, Petrus togok de luor, de parok pintu. Kemudion, murid nyo loin iye, nyo mengenal Imam Godong, belek ke luor ngan buik dengan betina penjego pintu, mengka mengunda Petrus masuk. ¹⁷ Mengka, betina penjego pintu iye betanyo kenempat Petrus," Bukonkah kowe jugo saloh seurang murid deri Urang iye?" ¹⁸ Lah membuat perapion, padong pelayon ngan perwira togok de sane ulehnyo waktu iye udara teraso dingen, ngan mike bediang. Petrus jugo serompok mike, togok ngan bediang. ¹⁹ Kemudion, Imam Godong menanyai Yesus tentang murid-murid-Nye ngan tentang ajaron-Nye. ²⁰ Yesus nyimboti enye," Ake lah buik torus tarang kenempat denia. Ake selalu mengajor de sinagoge-sinagoge ngan Bait Allah, tempat segelo urang Yahudi bekumpul. Ake hopi perenah buik secaro bekerawo. ²¹ Mengka kowe betanyo kenempat-ke? Tanyokolah kenempat mike nyo lah mendongor ape nyo Ake kehatoko kenempat mike; mike tahuko ape nyo lah Ke kehatoko." ²² Tekalo Yesus buik upanio, seurang penjego nyo togok de sie menabok muka-Nye ngan buik," Upaiyekah caro-Me nyimboti Imam Godong?" ²³ Yesus nyimboti enye," munye Ake ngehatoko sesuatu nyo saloh, tunjukkolah kesalohonnye; hambuk munye nyo Ke kehatoko bonor, mengka kowe menabok Ake?" ²⁴ Mengka, Hanas mengirem Yesus delom keadaon tekobot kenempat Imam Godong Kayafas. ²⁵ Tekalo iye, Simon Petrus lage togok ngan bediang. Mengka, mike betanyo kenempatnye," Bukonkah kowe jugo saloh sikuk murid Urang iye?" Petrus menyangkolnye ngan nyimboti," Bukon." ²⁶ Saloh sikuk pelayon Imam Godong, nyo merupakan dulur deri urang nyo telingonye de totok Petrus, buik," Bukonkah ake ngoleh kowe serompok Enye de taman iye?" ²⁷ Sekali lage, Petrus menyangkolnye, ngan tekalo iye jugo, hayom bekukuk. ²⁸ Kemudion, mike mengunda Yesus deri tempat Kayafas ke gedung pengadilon, waktu iye lage sajo pagi, ngan mike dewek hopi masuk ke delom gedung pengadilon enggakkonyo mike hopi menajisko badan, singgo bule makon paskah. ²⁹ Mengka, Pilatus keluor menomui mike ngan betanyo," Ibo tuduhonme terhadop urang nie?" ³⁰ Mike nyimboti ngan buik kenempatnye," munye Urang nie bukon urang jahat, kamie tentu hopi bakal mengunda-Nye kenempatme." ³¹ Pilatus buik kenempat mike," Undalah Enye ngan hakimilah menurut hukomme." Urang-urang Yahudi iye nyimboti, " Adolah hopi sesuai hukom bage kamie untok menghukom te'elek seseurang." ³² Nie terjedi untok menggenapi pembuikkon Yesus, nyo menunjukko dengan kemation upa ape Enye bakal te'elek. ³³ Mengka, Pilatus masuk belek ke delom gedung pengadilon ngan memantau Yesus, ngan betanyo kenempat-Nye, " Ibo Kowe Rajo urang Yahudi?" ³⁴ Yesus nyimboti," Ibo Pertanyaon iye deri badanme dewek, atau ibo urang loin nyo memboritahume tentang Ake?" ³⁵ Pilatus buik," Ibo ake seurang Yahudi? bengeso ngan imam-imam kepalo-Me dewek menyerahko Kowe kenempatme. Ape nyo lah Kowe lakuko?" ³⁶ Yesus buik, " Kerajakon-Ke bukon deri denie nie. Munye kerajakon-Ke deri denia nie, pelayon-pelayon-Ke pesti bakal melawon enggakkonyo Ake hopi de serahko kenempat urang-urang Yahudi. Cuma hambuk, kerajakon-Ke bukonlah deri denia nie." ³⁷ Pilatus buik," Jedi, Kowe seurang rajo?" Yesus nyimboti," Kowelah ngehatoko behwo Ake adolah rajo. Untok nielah Ake laher, ngan untok nielah Ake njongok ke denia, yaitu untok besaksi tentang kebonoron. Setiap urang nyo berasol deri kebonoron bakal mendongorko suaro-Ke." ³⁸ Pilatus buik kenempat-Nye," Ibo kebonoron iye?" Ngan, lah buik upanio, Pilatus keluor lage menomui urang-urang Yahudi, ngan buik kenempat mike," Ake hopi menomuko kesalahon ape pun pado-Nye. ³⁹ Cuma, kowe memilikih sikuk kebiasaon behweo ake harus membebasko seurang tahanon pado hari paskah. Jedi, ibo kowe endok enggakkonyo ake membebasko 'Rajo Urang Yahudi Nie"? ⁴⁰ Mike nyimboti lage dengan mekek," jengon bebasko Urang nie, meloinko Barabas!" Barabas adolah seurang pemaleng.