¹ " Segelo nie lah Ake kehatoko kenempatme enggakkonyo kowe hopi teguncang. ² Mike bakal mengusirme deri sinagoge. Bahkan waktunye bakal sampoi behwo setiap urang nyo membunohme bakal bepeker behwo mike sedang bebakti kenempat Allah. ³ Ngan, hal-hal iye bakal mike lakuko ulehnyo mike hopi mengenal Bepak ataupun Ake. ⁴ Cuma hambuk, segelo iye sodah Ake kehatoko kenempatme enggakkonyo apabila waktunye njongok, kowe ingot behwo Ake lah ngehatokonye kenempatme. Ngan, hal-hal nie hopi Ake kehatoko kenempatme pado awalnye ulehnyo Ake lage serompokme. ⁵ Cuma hambuk, kinie Ake bakal pogi kenempat Enye nyo mengutos Ake, ngan hopi seurang pun deri kowe nyo nanyoko Ake, ' Ke mone Kowe bakal pogi?' ⁶ Cuma, ulehnyo Ake lah ngehatoko segelo nie kenempatme, kesedihon memonuhi hatime. ⁷ Cuma hambuk, Ake boritahuko kebonoron kenempatme: Lobeh beik bageme munye Ake pogi ulehnyo Ake hopi pogi, penolong iye hopi bakal njongok kenempatme; hambuk munye Ake pogi, Ake bakal mengutos-Nye kenempatme. ⁸ Ngan, tekalo penolong iye njongok, Enye bakal menyadarko denia bakal doso, kebonoron, ngan penghakemon; ⁹ Tentang doso, ulehnyo mike hopi pecayo kenempat-Ke; ¹⁰ Tentang kebonoron, ulehnyo Ake pogi kenempat Bepak ngan kowe hopi bakal ngoleh Ake lage, ¹¹ Ngan tentang penghakemon, ulehnyo penguaso denia nie lah de hakemi. ¹² Lage lobot hal nyo amat Ake kehatoko kenempatme, hambuk kowe hopi depot menanggungnye kinie. ¹³ Cuma, tekalo Enye, Roh kebonoron iye njongok, Enye bakal membimbingme ke delom segelo kebonoron. Sabab, Enye hopi buik pucuk keamatan-Nye dewek, meloinko segelo hal nyo Enye dongor iyelah nyo bakan de kehatoko; ngan Enye bakal memboritahume hal-hal nyo bakal terjedi. ¹⁴ Enye bakal memuliako Ake ulehnyo Enye bakal menerimo nyo Ake terimo, ngan bakal memboritahukonye kenempatme. ¹⁵ Segelo sesuatu nyo Bepak milikih adolah milik-Ke. Ule sabab iye, Ake ngehatoko behwo Roh kebonoron bakal memboritakan kenempatme ape nyo de terimo-Nye deri-Ke." ( Dukacita Menjedi Sukacita ) ¹⁶ " Tinggal setegal bae, ngan kowe hopi bakal ngoleh Ake lage; ngan sekali lage, tinggal setegal bae, ngan kowe bakal ngoleh Ake." ¹⁷ Beberape murid Yesus saleng betanyo," Ape maksud-Nye Enye buik kenempat kite,' Tinggal setegal bae, ngan kowe hopi bakal ngoleh Ake lage; ngan sekali lage, tinggal setegal bae, ngan kowe bakal ngoleh Ake?' ngan' ulehnyo Ake bakal pogi kenempat Bepak?" ¹⁸ Jedi, mike betanyo, " Ape nyo Enye maksudko dengan,' tinggal setegal bae? kite hopi tahuko ape nyo Enye buikko." ¹⁹ Yesus tahuko behwo murid-murid-Nye amat betanyo kenempat-Nye, mengka Enye buik kenempat mike," Ibo kowe betanyo de antaro kowe dewek mengenai hal nyo Ake maksud tekalo Ake buik,' Tinggal setegal bae ngan kowe hopi bakal ngoleh Ake lage; ngan sekali lage, tinggal setegal bae, ngan kowe bakal ngoleh Ake'? ²⁰ Dengan sebonornye, Ake ngehatoko kenempatme, kowe bakal meratop ngan meratop, hambuk denia bakal agom; kowe bakal berduka, hambuk dukacitame bakal beubah menjedi sukacita. ²¹ Tekalo seurang betina melaherko, enye menderita ulehnyo waktunye untok melaherko sodah sampoi; hambuk sesodah anaknye laher, enye piteringot bakal penderitaonnye nyo sajo berat ulehnyo sukacita behwo seurang mendesio lah de laherko ke denia. ²² Upaniolah kowe jugo mengalami penderitaon saat nie, hambuk Ake bakal menomuime lage ngan hatime bakal bersukacita, ngan hopi ado seurang pun nyo bakal mengambek sukacitame derime. ²³ Pado hari iye, kowe hopi bakal menanyako ape pun kenempat-Ke. Dengan sebonornye, Ake ngehatoko kenempatme, ape pun nyo kowe mintak kenempat Bepak-Ke delom namo-Ke, Enye bakal memborikonnye kenempatme. ²⁴ Sampoi kinie, kowe bolum perenah memintak ape pun delom namo-Ke. Mintaklah, ngan kowe bakal menerimonye enggakkonyo sukacitame menjedi ponuh." ²⁵ " Ake sodah ngehatoko hal-hal nie kenempatme dengan perumpamaon; saatnye bakal sampoi tekalo Ake hopi lage buik kenempatme dengan perumpamaon, hambuk bakal buik kenempatme dengan torus tarang tentang Bepak. ²⁶ Pado hari iye, kowe bakal memintak delom namo-Ke, ngan Ake hopi ngehatoko kenempatme behwo Ake mendoakonye kenempat Bepak bageme. ²⁷ Sabab, Bepak dewek mengasehi kowe ulehnyo kowe lah mengasehi Ake ngan pecayo behwo Ake njongok deri Bepak. ²⁸ Ake berasal deri Bepak ngan lah njongok ke denia; kinie, Ake bakal meninggalko denia ngan belek kenempat Bepak." ²⁹ Murid-murid-Nye buik," Nah, kinie Kowe buik torus tarang ngan hopi menggunako perumpamaon lage. ³⁰ Kinie, kamie tahuko behwo Kowe mengetahui segelo sesuatu ngan hopi perelu seseurang betanyo kenempat-Me. Ulehnyo iye, kamie pecayo behwo Kowe njongok deri Allah." ³¹ Yesus nyimboti mike," ibo Pecayo kowe kinie? ³² Kolehlah! Saatnye bakal njongok, bahkan sodah njongok bageme untok de cerai-beraiko, maseng-maseng belek ketempat asalnye dewek ngan bakal meninggalko Ake dedewekon. Cuma hambuk, Ake hopi dewek ulehnyo Bepak serompok-Ke. ³³ Segelo nie Ake kehatoko kenempatme enggakkonyo de delom Ake, kowe memilikih damai sejahtera. De denia, kowe bakal mengalami penganiayaon, hambuk kuatkolah hatime! Ake lah mengalahko denia!"