¹ Yesus buik, " Akelah betong anggur nyo sejati ngan Bepak-Kelah pengusahanye. ² Setiap ranteng pado-Ke nyo hopi bebuah, de campok-Nye ngan setiap ranteng nyo bebuah, de resehko-Nye, enggakkonyo ranteng iye bebuah lobeh lobot. ³ Kowe memang sodah de resehko ulehnyo firman nyo lah Ke kehatoko kenempatme. ⁴ Tinggallah de delom Ake ngan Ake de delom kowe. Samo upa ranteng hopi depot bebuah deri badannye dewek, hambuk enye tinggal pado betong anggur, upanio jugo kowe hopi depot bebuah, hambuk kowe tinggal de delom Ake. ⁵ Akelah betong anggur ngan kowelah ranteng-rantengnye. Setiap urang nyo tinggal de delom Ake, ngan Ake de delom enye, enye bakal bebuah lobot ulehnyo tepisah deri-Ke, kowe hopi depot berbuat ape-ape. ⁶ Munye seseurang hopi tinggal de delom Ake, enye bakal de campok upa ranteng ngan menjedi koreng; ngan urang bakal mengumpulko ngan melemparkonnye ke delom api, ngan tetunu. ⁷ Munye kowe tetap tinggal de delom Ake ngan pembuikkon-Ke tinggal de delom kowe, mintaklah ape bae nyo kowe amatko, ngan iye bakal de kabulko bageme. ⁸ Bepak-Ke bakal de muliako dengan hal nie, yaitu munye kowe bebuah lobot ngan dengan upanio, kowe adolah murid-murid-Ke." ( Perentah Yesus Untok Saleng Mengasehi) ⁹ " Upa Bepak lah mengasegi Ake, upaniolah AKe lah mengasehime; tetaplah tinggal delom kaseh-Ke. ¹⁰ Munye kowe menaati segelo perentah-Ke, kowe bakal tinggal delom kaseh-Ke, samo upa Ake lah menaati perentah Bepak ngan tinggal delom kaseh-Nye. ¹¹ Hal-hal nie Ake kehatoko kenempatme enggakkonyo sukacita-Ke ado de delomme, singgo sukacitame menjedi ponuh. ¹² Nielah perentah-Ke : kowe harus saleng mengasehi, samo upa Ake lah mengasehi kowe. ¹³ Hopi ado kaseh nyo lobeh godong deripado kaseh seseurang nyo memboriko nyawonye untok kanti-kantinye. ¹⁴ Kowe adolah kanti-kanti-Ke munye kiwe melakuko ape nyo Ke perentehko kenempatme. ¹⁵ Ake hopi lage menyobut kowe hambo ulehnyo hambo hopi tahuko ape nyo de lakuko ule tuannye. Cuma hambuk, Ake menyobut kowe kanti ulehnyo segelo nyo Ake dongor deri Bepak, lah Ake beritahuko kenempatme. ¹⁶ Bukon kowe memileh Ake, meloinko Akelah nyo lah memileh ngan lah menetapko kowe enggakkonyo kowe pogi ngan menghaselko buah, ngan buahme tetap singgo ape pun nyo kowe mintak deri Bepak delom namo-Ke, Enye bakal memborikonnye kenempatme. ¹⁷ Nielah perentah-Ke: Kowe harus saleng mengasehi!" ¹⁸ " Munye denia luat nganme, kowe tahuko behwo denia lah luat ngan Ake sebolum luat nganme. ¹⁹ Munye kowe deri denia, tentulah denia bakal mengasehi milik kepunyaonnye; hambuk ulehnyo kowe bukon deri denia, meloinko Ake lah memilehme deri denia, ulehnyo hal iyelah denia luat ngan kowe. ²⁰ Ingotlah pembuikkon nyo lah Ke kehatoko kenempatme: ' Seurang hambo hopi lobeh godong deripado tuannye'. Munye mike lah menganiaya Ake, mike jugo bakal menganiaya kowe. Munye mike menaati firman-Ke, mike jugo bakal menaati pembuikkonme. ²¹ Cuma hambuk, segelonye iye bakal mike lakuko terhadop kowe, ulehnyo iye namo-Ke. Sabab, mike hopi mengenal Enye nyo mengutos Ake. ²² Munye Ake hopi njongok ngan ngehatoko segelonye iye kenempat mike, mike hopi bakal memilikih doso. Cuma hambuk kinie, mike hopi memilikih dalih untok doso mike. ²³ Setiap urang nyo luat ngan Ake, enye jugo luat ngan Bepak-Ke. ²⁴ Seandainye Ake hopi melakuko de antaro mike pekerejaon-pekerejaon nyo hopi perenah de lakuko urang loin, mike hopi bakal memilikih doso. Cuma hambuk kinie, mike lah ngoleh cuma tetap luat angan Ake ngan Bepak-Ke. ²⁵ Cuma, firman nyo tetules delom kitab Torat mike harus de genapi: ' Mike luat ngan Ake hopi ado aloson." ²⁶ Tekalo penolong iye njongok, nyo bakal Ake utos kenempatne deri Bepak, yaitu Roh kebonoron nyo beasal deri Bepak, Enye bakal besaksi tentang Ake. ²⁷ Ngan kowe jugo bakal besaksi ulehnyo kowe lah serompok-Ke jak bilek."