¹ Enom hari sebolom Hari Rayo Paskah, Yesus lari ke Betania, tempat tinggal Lazarus, nyo lah Enye bangketko jak kemation. ² De sane, lah de siapko jamuon makon malom untok Yesus; ngan Marta edang melayani, cuma Lazarus adolah saloh sikok deri mika nyo dodok de meja besamo Yesus. ³ Kemudion, Maria ngambek setangah kati minyak narwastu murni nyo sajo mahal, Lalu meminyaki kki Yesus ngan ngorengkonye ngan rambotnye. mengka, rumah iye de ponohi mambu rohom minyak wangi tesebut. ⁴ Hambok, Yudas Iskariot, saloh seurang mored-Nye, nyo nak menghianati Enye, boek, ⁵ "Mengkah minyak horom iye hopi de jual bae serega tiga ratos dinar ngan de boriko kepodo urang-urang mesken?" ⁶ Enye demikion bukon ulenyo enye peduli kepodo urang mesken, meloenko ulenyo enye adolah seurang pemaleng, ngan ulenyo enye ngundah kotak doet, enye biaso ngambek doet nyo demasuko ke delom kotak iye. ⁷ Lalu, Yesus menjawab, "Biarkolah betina iye, enye melakukonye sebagai persiapon untok pengoboron-Ke. ⁸ Sabab, urang mesken selalu ado besamome , cuma Ake hopi selalu ado besamome." ⁹ Ketiko sejumlah godong urang Yahudi mendongor bahwa Yesus ado de Betania, mike lari ke sane, bukon hanyo ulenyo Yesus, meloenko jugo ulenyo endok ngelek Lazarus nyo lah Enye bangketko deri kemation. ¹⁰ Lalu, imam-imam kepalo berencana untok membunoh Lazarus jugo. ¹¹ Ulenyo Lazarus, lobot urang Yahudi meninggal ko mike ngan pecayo kepodo Yesus. ¹² Pagi arinye, urang lobot nyo menghaderi pesta iye, ketiko mendongor bahwa Yesus nak jongok ke Yerusalem, ¹³ mike ngambek doun-doun palem ngan lari keluor untok menyambot Enye ngan mulai beseru-seru, "Hosana! Deberkatilah Enye nyo jongok delom namo Tuhan, Rajo Israel!'' ¹⁴ Sesodah mendepot ko seikok keledai muda, Yesus dodok de pocoknye, upa nyo tetoles: ¹⁵ "Jengon takot, hai putri Sion ! Keleklah! Rajome jongok, dodok de pocok seikok keledai muda." ¹⁶ Awalnye, mured-mured-Nye hopi mengerti segelo hal iye, cuma ketiko Yesus demuliako , mike kemudion mengerti bahwa segelo iye lah detoles tentang Enye, ngan bahwa mike lah melakuko segelo iye untok Enye. ¹⁷ Jedi, urang-urang nyo besamo Yesus saat Enye mantou Lazarus keluor deri kobor ngan membangketko enye deri kemation ngan besaksi. ¹⁸ Uleh sabab iye, lobot urang nyambot Yesus ulenyo mike mendongor bahwa Enyelah nyo lah melakuko mukjizat iye. ¹⁹ Maka, urang-urang Farisi boek sikok namo loen, "Cobek Kelek, ape nyo kito rencanako hopi beasel. Keleklah, segelo denia lah mehilu Enye!" ²⁰ Podo saat iye, ado jugo urng-urang Yunani de antaro mike nyo lari untok kompolon ngan perayaon iye. ²¹ Mike menomui Filipus, nyo beasal deri Betsaida de Galilea, ngan boek kepodonye, "Tuan, kami nak betomu ngan Yesus." ²² Filipus lari ngan membori tahu Andreas; lalu Andreas ngan Filipus lari ngan membori tahu Yesus. ²³ Yesus nyimbot mike, "Waktunye lah sampoi bage Anak Mendesio untok demuliako. ²⁴ Ngan sesunggohnye, Ake gerako kepoome, kecuali biji gandung titek keletak ngan mati, biji iye tetap sikok bae; cuma munye biji iye mati, enye menghaselko lobot buah. ²⁵ Urang nyo mencintai nyawohnye, nak kesayauon nyawohnye, cuma urang nyo hopi mencintai nyawohnye de denia nie, nak memeliharonye untok hidop kekal. ²⁶ Munye seseurang melayani Ake, enye haros mengikoti Ake; de mone Ake berada, de sane pula pelayan-Ke berada; munye seseurang melayani Ake, Bepa akan menghormati enye." ²⁷ "Kinie, jiwo-Ke gelisah. Ape nyo nak Kugerako? 'Bepa, selamatkolah Ake deri saat nie?' Cuma hambok, untok tujuon nielah Ake jongok saat nie. ²⁸ Bepa, muliakolah namo-Me!" Lalu, tedongorlah suaro deri serega, "Ake lah bmemuliako namo-Ke ngan Ake nak memuliakonye lagi." ²⁹ Urang lobot nyo togok de sane ngan dongornye gerko bahwa iye suro guntor, cuma nyo loen boek, "Seurangt malaikat lah boek kepodo-Nye!" ³⁰ Yesus menjawab ngan boek, "Suaro iye tedongor bukon untok kepentengon-Ke, meloenko untok kepentengonme. ³¹ Kinielah penghakemon bage denia nie, kinielah penguaso denia nak de user. ³² Ngan, munye Ake detinggiko deri denia nie, Ake nak menarek segelo urang kepodo-Ke." ³³ Yesus gerako hal nie untok menunjoko ngan kemation upa ape Enye nak mati. ³⁴ Urang lobot iye menjawab Enye, "Kami lah mendongor deri hokom Taurat bahwa Kristus nak tetap tinggal selamo-lamonye; upamone mungken Kowe boek, 'anak Mendesio iye haros detinggiko?' Siapekah Anak Mendesio iye?" ³⁵ Yesus menjawab mike, "Tinggal setegal lagi Tarang iye ado besamome. Bejelonlah selagi Tarang iye lagi ado empoknyo kekolomon hopi mak menguasoime; sabab urang nyo bejelon de delom kekolomon hopi tahu kemone nyo lari. ³⁶ Saat kowe nuhani Tarang iye, pecayolah kepodo Tarang iye empoknyo kowe menjedi anak-anak Tarang." Sesodah gerako demikion, Yesus lari ngan ngerawoko diri deri mike. ³⁷ Meskipon Yesus lah melakuko tando ajaib de depan mike, mike tetap hopi pecayo kepodo-Nye, ³⁸ empoknyo genaplah perkataon nye desampoiko uleh Nabi Yesaya, "Tuhan, siapekah nyo pecayo kepodo pembritaon kami? Ngan, kepodo siapekah tangon Tuhan lah denyatoko?" ³⁹ Iyelah sababnye, mike hopi depot pecayo ulenyo Yesaya jugo boek, ⁴⁰ "Enye lah membutako mato mike ngan mengarasko hati mike, empoknyo mike jengon ngelek ngan mato mike ngan memahami ngan hati mike, lalu bebelek sehinggo Ake menyembuhko mike." ⁴¹ Yesaya segelo nie ulenyo enye lah ngelek kemuliaon Yesus ngan enye boek mengenai Enye. ⁴² Meski demikion, lobot jugo para pemempen nyo pecayo kepodo Yesus, hambok ulenyo takot kepodo urang-urang Farisi mike hopi gerakonye teros terang ulenyo takot nak dekucelko jak sinagoge. ⁴³ Sabab, mike lobeh agom nerimo kemuliaon deri mendesio deripado kemuliaon Allah. ⁴⁴ Kemudion, Yesus beseru, ujo-Nye, "Setiap urang nyo pecayo kepodo-Ke, hopi pecayo kepodo-Ke, meloenko kepodo Enye nyo mengutos Ake. ⁴⁵ Ngan, setiap urang nyo lah ngelek Ake, lah ngelek Enye nyo mengutos Ake. ⁴⁶ Ake lah jongok sebagai Tarang ke denia nie, empoknyo setiap urang nyo pecayo kepodo-Ke hopi tinggal delom kekolomon. ⁴⁷ Munye seseurang mendongorko perkataon-Ke, cuma enye hopi menorotinye, ake nak menghakemi enye; sabab Ake jongok bukon untok menghakemi denia, meloenko untok menyelamatko denia. ⁴⁸ Siape nyo menolak Ake ngan hopi nerimo perkataon-Ke, maka firman nyo Ake gerako nak menghakemi enye pada akher zaman. ⁴⁹ Ulenyo Ake hopi boek ucok kehendok-Ke, meloenko Bepa nyo mengotos Ake membori-Ke perentah pucok ape nyo haros Ake gerako ngan Ake boekko. ⁵⁰ Ngan, Ake tahu bahwa perentah-Nye adolah hidop kekal. Sabab iye, hal nyo Ake sampoiko, Ake sampoiko upa nyo degerako Bepak kepodo-Ke."