¹ Mengka, Agripa buik kenempat Paulus," Kowe de izinko buik untok membela diri." Kemudion, Paulus merentangko tangonnye ngan menyatako pembelaonnye. ² " Sehubongon dengan segelo hal nyo de tuduhko kenempatke ule urang-urang Yahudi, ake menganggap dirike beruntung, Rajo Agripa, ulehnyo ake bakal menyatako pembelaonke de hadoponme sari nie, ³ Kehososnye ulehnyo kowe adolah urang nyo bonor-bonor tahuko segelo kebiasaon ngan persoalon de antaro urang-urang Yahudi. Ulehnyo iye, ake memohon kenempat kowe untok mendongorko ake dengan sabar. ⁴ Segelo urang Yahudi tahuko caro hidopke sejak maso mudake, nyo sejak awal menghabesko hidopke de tangah-tangah bengesoke dewek ngan de Yerusalem. ⁵ Ulehnyo sodah lamo mike tahuko tentang dirike, munye mike endok, mike depot besaksi behwo ake hidop sesuai dengan ajaron kelompok nyo paleng karas deri agamo kite, ake hidop sebage urang Farisi. ⁶ Ngan kinie, ake togok de sie untok de adili ulehnyo pengharaponke bakal jenjo nyo de jediko Allah kenempat nenek puyang kite. ⁷ Jenji nielah nyo de harapko ule kedua belas suku bengeso kite depot tecapai, sementaro mike menyembah Allah dengan bonor-bonor tangah hari ngan malom. Ngan, ulehnyo pengharapon nielah ake de tuduh ule urang-urang Yahudi, ao Rajo. ⁸ Mengka kowe anggap mustahil behwo Allah membangketko urang te'elek? ⁹ Ulehnyo iye, ake dewek mengiro behwo ake harus melakuko lobot hal nyo menentang namo Yesus deri Nazaret. ¹⁰ Ngan, iyelah nyo ake lakuko de Yerusalem. Ake bukon anyo memasukko urang-urang kudus ke delom penjaro, lah menerimo wewenang deri imam-imam kepalo, hambuk jugo tekalo mike de hukom te'elek, ake menyetujuinye. ¹¹ Mengka, ake sering menghukom mike de sinagoge-sinagoge ngan beusaha memakso mike untok menghujat. Ngan, dengan bemarah nyo sajo godong terhadop mike, ake menganiayo mike, bahkan sampoi ke kota-kota asing." ¹² " Untok maksud iye jugo, ake sedang delom pejelonon ke Damsyik, dengan wewenan ngan penugason deri imam-imam kepalo. ¹³ Tekalo tangah hari, ao Rajo, de tangah perjelononke, ake ngoleh suatu cahayo deri langet, lobeh tarang deripado matoari, nyo besinar de sekelelengke ngan uran-urang bejelon serompokke. ¹⁴ Mengka, tekalo kamie segelo tesungkur de pucuk tanoh, ake mendongor suatu suaro buik kenempatke delom bahaso Ibrani," Saulus,Saulus, mengka kowe menyikso Ake? Sulet bageke untok menenggak galah rangsang.' ¹⁵ Mengka ake betanyo, ' ibo Kowe Tuhan?' kemudion, Tuhan nyimbot, ' Ake Yesus, nyo sedang kowe sikso. ¹⁶ Cuma, jego ngan togoklah dengan kakime. Sabab, Ake lah menampakko diri kenempatme untok tujuon nie, yaitu menetapkome sebage seurang pelayon ngan saksi, hopi hanyo untok hal-hal nyo lah kowe koleh, hambuk jugo untok hal-hal nyo bakal Ake tunjukko kenempatme. ¹⁷ Ake bakal menyelamatko deri bengesome nie ngan deri bengeso-bengeso loin, nyo kenempat mike ake mengutusme, ¹⁸ Untok membukak mato mike singgo mike bebelek deri kekolomon kenempat tarang ngan deri kuaso Beles kenempat Allah enggakkonyo mike menerimo pengampunon pucuk doso-doso sereta menerimo bageon de antaro urang-urang nyo lah de kudusko ule iman de delom Ake." ¹⁹ " Mengka, Rajo Agripa, ake hopi perenah hopi taat terhadop pengolehon sergawi iye, ²⁰ Hambuk, pertamo-tamo, ake memberitakonnye kenempat mike nyo ado de Damsyik, mengka de Yerusalem ngan de segelo wilayah Yudea, jugo kenempat bengeso-bengeso loin, behwo mike barus betobat ngan bebelek kenempat Allah, dengan melakuko perbuaton-perbuaton nyo sesuai denga pertobaton mike. ²¹ Iyelah sababnye, urang-urang Yahudi menangkopke de Bait Allah ngan beusaha membunohke. ²² Sampoi sari nie, ake lah menerimo pertolongon deri Allah singgo ake togok de sie untok besaksi, beik kenempat urang-urang kecik maupun urang-urang godong dengan hopi ngehatoko hal loin, hambuk ape nyo de kehatoko ule padong nabi ngan Musa tentang nyo bakal terjedi, ²³ Behwo Kristus harus menderito ngan behwo, dengan alason menjedi nyo pertamo bangket deri antaro urang te'elek, Enye bakal memberitako tarang, beik kenempat urang-urang Yahudi maupun kenempat bengeso-bengeso loin." ²⁴ Sementaro Paulus lage menyampoiko hal-hal delom pembelaonnye, Festus buik dengan saro karas," Paulus, kowe sodah gila! pengetahuonme nyo sajo lobot iye membuatme hopi waras." ²⁵ Cuma, Paulus nyimbot, " Nyo Mulia Festus, ake hopi gila, hambuk ake menyampoiko kebonoron ngan kehato-kehato nyo masuk akal. ²⁶ Sabab, Rajo tahuko hal-hal nie ngan kenempatnye ake jugo buik dengan berani. Sabab, ake yaken behwo hopi adi sikuk pun deri hal-hal nie nyo lolos deri perhationnye ulehnyo nie hopi terjedi de tempat nyo tepencel. ²⁷ Rajo Agripa, ibo kowe mempercayoi padong nabi? Ake tahuko kowe pecayo." ²⁸ Rajo Agripa buik kenempat Paulus," Delom waktu nyo singkat, kowe lah menyakenko ake untok menjedi urang kristen." ²⁹ Mengka, Paulus nyimbot," Ake memohon kenempat Allah enggakkonyo cepat atau lambat, hopi hanyo kowe, hambuk jugo segelo urang nyo mendongorkoke sari nie, pacok menjedi upa akelah, hambuk rantoi-rantoi nie." ³⁰ Mengka, rajo togok. Demikion jugo gubernur, Bernike, ngan segelo urang nyo duduk serompok mike. ³¹ Mengka, tekalo mike meninggalko ruangon iye, mike buik sikuk samo loin," orang nie hopi melakuko ape pun nyo pantas de bandengko dengan hukumon te'elek atau penjaro." ³² Mengka, Agripa buik kenempat Festus, " Orang nie sodah buleh de bebasko munye enye hopi noek bandeng kenempat Kaisar."