(Kedetongon Roh Kudus) ¹ Tekaloh hari Pentakosta detong, segelo urang besamo-samo nyo ado de tempat nyo samo. ² Ngan tiba-tiba tedongorlah deri langet, pemboeon upa tiupon angen kencang, ngan pemboeon iye memonohi seisi rumah deman rombongon sedang duduk. ³ Ngan, tekolehlah kepado enye lidah-lidah upa nyalo api nyo beterbongon ngan hinggap de pocok enye maseng-maseng. ⁴ Hambok, nye segelo depenuhi ngan Roh Kudus ngan muloi boek delom berbagoi beheso, upa nyo deboriko Roh Kudus ontok enye boekko. ⁵ Pado waktu iye, ado urang-urang Yahudi nyo tinggal de Yerusalem, urang-urang saleh deri tiap-tiap bengeso de bewoh langet. ⁶ Ngan, tekaloh boek nye tedongor, sekompolon urang lobot njongo besamo-samo ngan bingung ulenyo setiap urang sedang ndongor rombongon iye bekehato delom bahaso rombongon dewek. ⁷ Rombongon takjub ngan heran, sambel bekehato, Bukonkah rombongon segelonyo sedang eomongon adolah urang-urang Galilea? ⁸ Ngan, upamone mungken maseng-maseng kite ndongor rombongon ngan beheso tempat kite delahirko? ⁹ Urang-urang Partia, ngan Media, ngan Elam, ngan pendodok Mesopotamia, Yudea, ngan kapadokia, Pontus, ngan Asia, ¹⁰ Frigia, ngan Pamfilia, Mesir, ngan de'erah-de'erah libia paro Kirene, ngan pendetong-pendetong deri Roma, beik urang-urang Yahudi moupun para proselit, ¹¹ urang-urang Kreta ngan Arab. Kite mendongor rombongon bekehato ngan beheso kite tentang perbuaton-perbuaton godong Allah." ¹² Ngan, mike segelo takjub ngan bingung sambel bekehato siko samo loen, "Ape heti segelo nie?" ¹³ Cuma hambok, urang loen nenawoko ngan bekehato, "Mike demaboko uleh anggur beheru." ¹⁴ Hambok, Petrus togok besamo kesebelas rasol, mengangkot suaronye ngan bekehato kepodo mike, "Hai urang-urang Yahudi ngan segelo urang nyo tinggol de Yerusalem, biarlah deketahui ulehme ngan pehatikolah ucaponke. ¹⁵ Sabab, urang-urang nie hopi mabok, upa nyo kowe kiro ulehnyo hari beheru jam tiga , ¹⁶ hambok inielah nyo dekehatoko melalui Nabi Yoel: ¹⁷ 'Ngan, podo hari-hari terakher nak terjedi, Allah befirman: behwa Ake nak mencurahko Roh-Ke ke atas segelo mendesio. Ngan, anak-anakme jenton-jenton ngan anak-anakme betiono nak benubuat, ngan anak-anak mudame nak mengoleh pengolehon, ngan urang-urang tuha de antarome nak memimpiko mimpi-mimpi. ¹⁸ Bahkon, ke pacok hamba-hamba-Ke jenton-jenton ngan hamba-hamba-Ke betino podo hari-hari iye, Ake nak mencurahko Roh-Ke, ngan mike nak benubuat. ¹⁹ Ngan, Ake nak menonjoko muzizat-muzizat de langit, de pocok, ngan tando-tando ajaib de bumi, de bewoh, dero, ngan api, ngan kabut hasop. ²⁰ Matahari nak deubah menjedi kekolomon ngan bulan menjedi dero, sebelom hari Tuhan nyo godong ngan mulia detong. ²¹ Ngan nak tejedi, setiap urang nyo memantou namo Tuhan nak deselamatko." ²² "Hai urang Israel, dongorko perkatoon nie. Yesus, Urang Nazaret, seurang nyo denyatoko de antaro kowe uleh Allah ngan hal-hal ajaib, muzizat-muzizat, nyo lah Allah tonjokko de antarome melalui Enye, upa nyo kowe dewek ketahui. ²³ Yesus nie, nyo desehako menorot rencano nyo sodah detentuko ngan pengetahuon Allah sebelomnye, kowe bunoh ngan menyalipko-Nye melalui tangon urang-urang durhako. ²⁴ Hambok cuma, Allah membangketko-Nye, ngan melepasko-Nye deri penderitaon maut ulehnyo hopi mungken bage-Nye uleh kemation. ²⁵ Sabab, Daud perenah bekehato tentang Yesus, 'Ake mengoleh Tuhan selalu ado di depanke, ulehnyo Iye berado de sebelah kanonke sehinggo ake hopi nak degoyahko. ²⁶ Uleh sabab iye, hatike senang, ngan lidake besorak-sorak. Badanke jugo nak tinggal delom pengharapon, ²⁷ ulehnyo Kowe hopi nak meninggalko jiwake berado de dunia urang mati, apo membiarko badan Urang Kudus-Me mengoleh kebinasaon. ²⁸ Engkau sodah memberitahuko kepodoke jelon kehidupon. Engkau nak membuatke ponoh sukacita ngan wajah-Me.' ²⁹ Dolor-dolor, ake depot boek kepadome ngan yakin tentang bepak leluhur kite, Daud, behwo nye lah mati ngan detanom, ngan kuburonnye lagi ado besamo dengan kite sampoi sari nie. ³⁰ Jedi, ulenyo nye adolah seurang nabi ngan mengetahui behwo Allah lah bejenji ngan sumpah kepadonye untok mendodokko sikok jak keturunon Daud de atas takhtonye. ³¹ Ulenyo iye, Daud nyo ngoleh hal nie sebolomnye, nye boek tentang kebangkitonKristus behwo: Enye hopi nak detinggalko de denia urang teelek, ngan tobo-Nye hopi ngoleh kebinasoon. ³² Yesus nielah nyo Allah bangketko ngan kami segelo adolah saksi tentang hal nie. ³³ Ulenyo iye, setelah detinggiko uleh tangon kanon Allah ngan menerimo jenji jak Bepak tentang Roh Kudus, Nye lah mencurahko beik apo nye kou koleh moupun dongor. ³⁴ Sabab, Daud hopi noek ke serga, hambok nye dewek boek, 'Tuhan boek kepado Tuanke, Dodoklah de sebelah kanon-Ke, ³⁵ sampoi Ake membuat mosoh-mosoh-Me menjedi tumpuon kaki-Me." ³⁶ "Ulenyo iye, biarlah segelo rumah Israel tahuko ngan peseti behwo Allah lah menjediko-Nye Tuhan ngan Kristus, nielah Yesus nyo lah kou salibko." ³⁷ Tekaloh mike mendongor hal nie, tetosoklah hati mike, lalu boek kepado Petrus ngan paro rasul loinnye, "Dolor-dolor, ape nyo haros kami lakuko?" ³⁸ Lalu, Petrus boek kepado mike, "Betobatlah ngan bepteskolah dirime maseng-maseng delom namo Kristus Yesus untok pengampunon doso-dosome, ngan kou nak menerimo karunia Roh Kudus. ³⁹ Sabab, jenji nie adolah untokme, ngan anak-anakme, ngan untok segelo urang nyo maseh jouh, selobot nyo Tuhan Allah kite nak memantounye." ⁴⁰ Ngan, dengan lobot pekatoon loin, Petrus bersaksi ngan songgoh-songgoh ngan beseru kepado mike, ujonye, "Selamatkolah dirime jak generasi nyo bengkok nie!" ⁴¹ Urang-urang nyo nerimo pemboekon Petrus debaptes ngan pado sari iye jumlah mike detambahko sekitar tigo ribu jiwo. (Pekompolon Urang-Urang Pecayo) ⁴² Mike betekun delom pengajoron rasul-rasul ngan delom pekompolon, delom memecahko roti, ngan delom bedoa. ⁴³ Ngan, ketokuton njongok ke atas setiap jiwo, ngan lobot hal ajaib sereta tando-tando nyo terjedi melewati rasul. ⁴⁴ Segelo nyo pecayo bekompol besamo ngan mempunyoi segelo sesuatunye besamo-samo. ⁴⁵ Mengka, mike menjual reto bando ngan mileknye, kemudion membage-bagekonye kepado segelo urang, sesuoi kebutuhonnye maseng-maseng. ⁴⁶ Setiap ari, dengan besatu hati mike bekompol besamo de Bait Allah ngan memecah-mecahko roti jak rumah ke rumah. Mike nerimo makanon mike dengan senang ngan tulus hati, ⁴⁷ sambel memuji Allah, ngan mike desukai uleh lobot urang. Ngan, setiap ari Tuhan menambahko jumlah mike, nyoiye urang-urang nyo deselamatko.