(Paulus de Kota Efesus) ¹ Hal nie tejedi, sementaro Apolos berado de Korintus, Paulus melewati daerah de pedelomon ngan sampoi de Efesus. De sane, nye mendepoti beberape mored. ² Paulus boek kepado mike, "Apokah kowe menerimo Roh Kudus tekalo kowe lah menjedi pecayo?" Mike menjawab, " Hopi,bahkan kami bolum pernah mendongor bahwa ado Roh Kudus." ³ Lalu, Paulus boek, " De delom ape, kemudion, kowe debaptes?" Jawab mike, "De delom bapteson Yohanes." ⁴ Paulus boek, "Yohanes membaptes dengan bapteson pertobaton, sambel memboritahu urang-urang ontok pecayo kepado Seseurang nyo nak njongok sesodah nye, yaitu kepado Yesus." ⁵ Setelah mike mendongor hal nie, mike debaptes de delom namo Tuhan Yesus. ⁶ Kemudion, tekalo Paulus lah motekko tangonnye pocok mike, Roh Kudus njongok ke pocok mike, lalu mike mulai boek delom bebagai beheso ngan benubuat. ⁷ Mike segelo bejumlah kiro-kiro dua belas urang jenton. ⁸ Mengka, Paulus masok ke sinagoge ngan boek dengan berani selamo tiga bulan, sambel betukor pekeron ngan meyakenko mike tentang Kerajaon Allah. ⁹ Cuma hambok, tekalo beberape urang mengarasko hati ngan menolak pecayo, sambel mboekko hal-hal nyo jahat tentang Jelon iye dehadapon urang lobot, Paulus meninggalko mike ngan mengajok para mored bejelon, sambel betukor pekeran setiap hari de sekolah Tiranus. ¹⁰ Hal nie belangsong selamo dua tahon nyo tinggal de Asia mendongor firman Tuhan, beik urang-urang Yahudi maupon urang-urang Yunani ¹¹ Allah melakuko lobot mujizat nyo luor biaso melalui tangon Paulus, ¹² sehingga sapu tangon apo celemek nyo pernah menyentuh kulet Paulus dengunda kepado urang-urang saket, mengka penyaket mike ilang ngan roh-roh jahat keluor deri mike. ¹³ Hambok, beberape penguser setan Yahudi nyo bejelon bekelileng beusaha menyobot namo Tuhan Yesus atas urang-urang nyo kerasukon roh-roh jahat sambel boek, "Ake menyumpahi kowe delom namo Yesus nyo Paulus beritako!" ¹⁴ Tujuh anak jenton Skewa, salah seurang imam besar Yahudi nyo melakukonye ¹⁵ Cuma hambok, roh jahat iye menjawab ngan boek kepado mike, "Ake kenal Yesus ngan ake tau tentang Paulus, hambok siape kowe?" ¹⁶ Lalu, urang nyo kerasukon roh jahat iye melompat ke arah mike, ngan bekuaso pocok mike sereta mengalahko mike segelo sehingga mike melariko diri deri rumah iye delom keadaon telanjong ngan teluka. ¹⁷ Hal nie deketahui uleh segelo warga Efesus, beik urang-urang Yahudi maupon urang-urang Yunani. Ngan, mike segelo menjedi ketakoton ngan namo Tuhan Yesus semaken demuliako. ¹⁸ Lobot deri antaro mike nyo sodah menjedi pecayo tetap njongok, sambel mengakui ngan memberitahuko perbuaton-perbuaton mike. ¹⁹ Lalu, lobot deri mike nyo pernah melaluko seher, mengompolko buku-buku mike ngan membakarnye de depan segelo urang. Ngan, mike menghitung nilai buku-buku iye ngan menomuko nilainye mencapai 50.000 keping perak. ²⁰ Jedi, firman Tuhan teros betomboh ngan bekuaso. ²¹ Setelah hal-hal iye selesai, delom Roh, Paulus bemaksod bejelon ke Yerusalem setelah nye lah melewati Makedonia ngan Akhaya, dengan boek, "Setelah ake berado de sane, ake jugo haros ngoleh Roma." ²² Ngan, setelah mengotos dua urang nyo melayaninye ke Makedonia, yaitu Timotius ngan Erastus, nye dewek tinggal beberape waktu de Asia. ²³ Sekitar waktu iye, de sane tejedi kerosohon nyo hopil kecil mengenai Jelon iye. ²⁴ Sabab, ado urang benamo Demetrius, seurang pengrajen perak, nyo mbuat kuil-kuil perak Dewi Artemis, memboriko penghaselon nyo hopi sediket bage tukang-tukangnye. ²⁵ Para tukang iye nye kompolko besamo dengan pekerjo-pekerjo de bidang serupa ngan boek. " Dolor-dolor, kowe tau bahwa kemakmuron kite beasal deri perusahaon nie. ²⁶ Lalu, kwe ngoleh ngan mendngor bahwa, bukon anyo de Efesus meloenko hamper de segelo Asia, Paulus lah meyakenko ngan mbuat lobot urang bebelek dengan mboekko bahwa allah nyo debuat dengan tangon mendesio bukonlah Allah. ²⁷ Hal nie behayo bukan anyo bahwa usaha kite nak titek ke delom kehinaon, hambok jugo kuil Dewi Artemis nyo agung iye hopi nak sediket pun deperhitungko, ngan nye, nyo desembah de segelo Asia ngan denia, akan kehilangon keagongonnye." ²⁸ Tekalo mike mendongor hal nie, mike menjedi en marah ngan lelolungon, "Godonglah Artemis, dewi urang Efesus!" ²⁹ Lalu, kota iye deponohi dengan kekacauon ngan mike begegas besamo-samo ke gudung kesenion sambel meheset Gayus ngan Aristarkhus, orang Makedonia nyo adolah kanti seperjelonon Paulus. ³⁰ Hambok, tekalo Paulus nak bejelon masok de antaro urang lobot iye, para mored hopi membiarkonye. ³¹ Bahkan, beberape pembesar Asia nyo bekanti denannye mengirem sebuah poson kepadonye ngan beulang kali memohon kepadonye ontok hopi menyerahko diri ke gudung kesenion iye. ³² Mengka, sebageon meneriako sesuatu ngan sebageon nyo loennyo, ulenyo kompolan iye ado delom kekacauon ngan sebageon godong deri mike hopi tau ape alason mike lah njongok bekompol. ³³ Sebageon deri urang lobot iye menyimpulko Aleksander ulenyo urang-urang Yahudi lah mendorongnye ke depan, ngan setelah Alexander memboriko isyarat dengan tangonnye, nye bemaksod mbuat pembelaon de hadapon urang lobot. ³⁴ Hambok, tekalo mike mengenal bahwa Aleksander adolah urang Yahudi, selamo kiro-kiro dua jam, mike segelo beteriak dengan sikok suaro, "Godonglah Artemis, dewi urang Efesus!" ³⁵ Sesodah panitera kota menenangko urang lobot iye, nye boek, "Hai urang-urang Efesus, siape urang nyo hopi tau bahwa kota Efesus adolah penjago kuil Dewi Artemis nyo agung ngan nyo toron deri langet? ³⁶ Jedi, ulenyo hal-hal iye hopi depot debantah, kowe seharosnye tetap tenang ngan hopi betindak gegabah. ³⁷ Sabab, kowe lah mengunda urang-urang nie ke sie, nyo hopi merampok kuil apo menghujat dewi kite. ³⁸ Uleh ulenyo, munye Demetrius ngan tukang-tukang nyo besamo-samo dengannye memeleki keluhon tehadop seseurang, pengadelon debuka ngan ado prokonsul, biarlah mike mengajuko tuntuton sikok tehadop loennye. ³⁹ Hambok, munye kowe menghendaki sesuatu hal nyo loen, hal iye depot deselesaiko delom sidang rakyat menorot hokom. ⁴⁰ Sabab, kite berado delom behayo ontok detodoh pocok kerosohon hari nie ulenyo hopi ado alason ape pun nyo depot kite jelasko tentang pertemuon nyo kacau nie." ⁴¹ Sesodah nye mboekko hal-hal nie, nye membubarko kompolon urang iye.