¹ Sementaro iye, para rasul ngan dolor-dolor seiman nyo ado de Yudea mendongor bahwa urang-urang bukon Yahudi jugo sodah menerimo firman Allah. ² Ulehnyo iye, ketiko Petrus noek ke Yerusalem, urang-urang nyo besunat berobut pendepot ngan nye, ³ ngan boek, "Kowe lari kepodo urang-urang hopi besunat ngan makon besamo mike." ⁴ Cuma hambok, Petrus mulai menjelaskonye secaro urut kepodo mike, boeknye, ⁵ "Ake sedang bedoa de kota Yope, ngan delom keadaon hopi sadar, ake ngoleh sebuah penglihaton, sesuatu upa selembar koen lebor toron, nyo tejurai dengan keempat sudutnye deri langet, ngan benda iye kepadoke. ⁶ Sesodah ake ngolehnye, ake memperhatiko ngan ngoleh benatong-benatong bekaki empat de bumi, benatong-benatong liar, benatong-benatong melata, ngan burung-burung de udara. ⁷ Ake jugo, mendongor ado suaro boek kepodoke, 'Jegolah, Petrus, semboleh ngan makonlah!' ⁸ Hambok, ake boek, 'Hopi Tuhan. Sabab, hopi ado nyo haram apo najis pernah masok ke delom molotke.' ⁹ Cuma hambok, suaro iye menjawab ontok kedua kalinye deri langet, ' Ape nyo lah Allah tahirko, jengon sekali-kali kowe sobot haram!' ¹⁰ Hal nie tejedi tiga kali, lalu segelonye iye de tarek belek ke langet. ¹¹ Kolehlah, saat iye jugo, ado tiga urang nyo deotos kepodoke njongok ke rumah tempat ake berado, deri Kaisarea. ¹² Kemudion, Roh boek kepadoke ontok pergi besamo mike dengan hopi ragu-ragu. Keenam dolor seiman nie jugo pegi besamoke ngan kami masok ke rumah urang iye. ¹³ Lalu, nye menyampoiko kepado kami upamone nye lah ngoleh malaikat togok de rumahnye ngan boek, ' suruhlah urang ke Yope ngan mintalah Simon nyo desobot Petrus njongok ke mai, ¹⁴ ngan nye nak mboekko pesan kepadome nyo uleh pesan iye kowe nak deselamatko, kowe ngan segelo urang nyo tinggal de rumahme.' ¹⁵ Semenatro ake mulai bekato-kato, Roh Kudus toron ke pocok mike, samo upanyo pado awalnye tejedi atas kite. ¹⁶ Munye, ake teringot pado perkataon Tuhan, tekalo Nye boek, 'Yohanes membaptis dengan aek, hambok kowe nak debaptis dengan Roh Kudus.' ¹⁷ Jedi, jiko Allah memberiko karunio nyo samo kepado kowe upa nyo Ia boriko jugo kepado kite setelah percayo de delom Tuhan Yesus Kristus, siapokah ake sehinggo ake depot menghalangi Allah?'' ¹⁸ Ketiko rombongon mendongor hal-hal iye, rombongon menjedi tenang dan memuji Allah ngan boek, ''beupa iyelah, Allah jugo lah mengaruniako kepado urang-urang bukon Yahudi pertobaton nyo menuju kepado hidup.'' ¹⁹ Kemudion, urang-urang nyo tecerai-berai ulehnyo penganiayaan nyo terjedi terhadap Stefanus, menyebur sampoi ke Fenisia, Siprus, ngan antiokhia ngan hopi memberitako firman Tuhan kepado siape pun kecuali kepado urang-urang Yahudi. ²⁰ Hambok, ado beberapo urang deri mike, iyelah urang-urang Siprus ngan Kirene, nyo detong ke Antiokhia ngan jugo boek kepado urang-urang Helenis, sambel memberitako tentang Tuhan Yesus. ²¹ Tangon Tuhan menyeretai mike, sejumlah neman urang nyo menjedi pecayo bebelek kepado Tuhan. ²² Berita tentang mike sampoi ke telinga jemaat de Yerusalem, ngan mike mengotos Barnabas ke Antiokhia. ²³ Tekalo Barnabas tiba ngan ngoleh kaseh karunia Allah, nye besukacita ngan menasehati mike segelo ontok tetap setia kepado Tuhan ngan ati nyo teguh. ²⁴ Ulehnyo Barnabas adolah urang nyo beik, ponoh ngan Roh Kudus ngan iman, sejumlah godong urang debewo kepado Tuhan. ²⁵ Kemudion, Barnabas lari ke Tarsus ontok ndeloki Saulus. ²⁶ Ngan, setelah nye menomukonye nye membewonye ke Antiokhia. Selamo setahon, mike betomu ngan jemaat ngan ngajor lobot urang. Ngan, de Antiokhia, murid-murid ontok petamo kalinye desobot "urang Kristen". ²⁷ Pado ari-ari iye, beberapo nabi toron deri Yerusalem detong ke Antiokhia. ²⁸ Salah seurang deri mike benamo Agabus, togok ngan meramal ngan pertolongan Roh bahwa nak tejedi kelaporon nyo hebat de segelo denia. Ngan, kelaporon iye tejedi de maso pemerintahon Klaudius. ²⁹ Maka, para murid memotosko ontok mengirem sumbangon, sesuoi ngan kemampuon mike maseng-maseng, kepado dolor-dolor seiman nyo tinggal de Yudea. ³⁰ Ngan, nyo jugo mike lakuko, mengiremko sumbangon iye kepado para penatua melalui tangon Barnabas ngan Saulus.