(Pengumpulon Persembahon Kaseh bage Urang-Urang Kudus) ¹ Kinie, Dolor-dolor, kami endok kowe mengetahui tentang anugrahAllah nyo lah deboriko kepodo jemaat-jemat de Makedonia, ² bahwa delom lobotnye ujion penderitaoon, kelimpahon sukacita ngan godongnye kemeskenon rombongon lah bekelimpahon delom kekayohon ketuloson hati rombongon. ³ Ake besaksi bahwa rombongon membori sesuoi ngan kemampuon rombongon, bahkan melobehi kemampuonnye atas kerelaon rombongon dewek. ⁴ Rombongon memohon ngan sangat kepodo kami akan anugrah untok turot ngambek bageon delom pelayanon urang-urang kudus. ⁵ Ngan, nielah nyo rombongon lakuko, bukon upanyo kami haropko, pertamo-tamo, rombongon iye memboriko diri rombongon dewek kepodo Allah, kemudion kepodo kami ule kehendok Allah. ⁶ Jedi,kami mendesak Titus, sebagaimone ye lah memulainye, upanio pula ye jugo nak menyodako gaweon anugrah nie de antaro kowe. ⁷ Hambok, samo upa kowe bekelobehon delom segelo hal, delom iman, pemboeon, pengetahuon, segelo usaha, ngan delom kasehme terhadop kami, empoknyo kowe jugo bekelobehon delom anugrah nie. ⁸ Ake hopi nggerako hal nie sebagai perintah, hambok untok menuju melalui kesonggohon urang loen tentang keiklason kasehme. ⁹ Sabab, kowe mengetahui anugrah Tuhan kite Yesus Kristus, bahwa walupun ye kayo, ye rela menjedi mesken demi kowe empoknyo melalui kemeskenon-Nye, kowe menjedi kayo. ¹⁰ Ngan, delom hal nie ake memboriko pendepotke, hal nie adolah untok keuntongonme, nyo sejak tahon tekelahe, kowe bukon anyo melakukonye, cuma jugo endok untok melakukonye. ¹¹ Jedi, kinie, selesikolah jugo gaweon iye empoknyo sepadan ngan kerelaonme untok menyelesaiko ape nyo ado podome. ¹² Sabab, munye ado kesiapon membori, pemborion iye nak deterimo, bedasarko ape nyo demeleki seseurang, ngan bukon bedasarko ape nyo hopi demelekinye. ¹³ Hal nie bukon untok meringanko urang loen ngan memboboni kowe, cuma empoknyo ado keseimbangon. ¹⁴ Biarlah kelobehonme kinie mencukopi kekurangon rombongon munye kelobehonye rombongon kemudion mencukopko kekurangon kowe. Ngan demikian ado keseimbangon. ¹⁵ Upanionyo tetoles delom Kitab Suci, " urang nyo mengumpolko lobot, hopi kelobehon ngan urang nyo mengumoplko kekecikon, hopi kekurangon." ¹⁶ Hambok, sukor bage Allah nyo moteko delom hati Titus kesunggohon nyo samo ngan nyo ake meleki untokme. ¹⁷ Sabab, ye hopi menerimo anjuron kami, cuma ngan kesunggohonnye nyo godong, ye njongo kepodome atas kehendoknye dewek. ¹⁸ Besamo Titus, kami mengutos dolor nyo depuji-puji de antaro segelo jemaat delom hal pemberitaon injil. ¹⁹ Bukon iyoy bae, nye jugo detunjok uleh jemaat-jemaat untok lari besamo kami delom pelayanon anugerah nie, nyo kami lakuko untok ngunda kemuliaon bage Tuhan ngan untok menunjoko kerelaon kami. ²⁰ Kami sajo behati-hati empoknyo hopi ado urang nyo nak mehima kami delom hal delom pemborion godong nyo deator uleh kami nie. ²¹ Kami beusaha melakuko ape nyo bonor, hopi anyo delom pandongon Tuhan, cuma jugo delom pandongon mendesio. ²² Ngan, besamo rombongon, kami mengutos dulor kami nyolah recap kami uji ngan tebukti rajen delom lobot hal, telobeh lagi kinie nye sajo rajen ulenyo ye memeleki keyakenn nyo godong terhadopme. ²³ Kinie tentang Titus, nye adolah pasongon ngan kanti begaweke nyo nak bemanfaat untokme. Sedangko tentang dolor-dolor kite nyo loen, rombongon utuson jemaat-jemaat, suatu kemuliaon bage Kristus. ²⁴ Jedi, tujokkolah kepodo rombongon, de hadopon jemaat-jemaat, bukti kasehme ngan kebanggaon kami atas kowe.