¹ Bukonkah ake urang bebas? Bukonkah ake adolah rasul? Bukonkah ake sodah ngoleh Yesus, Tuhan kite? Bukonkah kowe adolah hasel gaweoanke delom Tuhan? ² Munye bage urang loin ake bukon rasul, paleng hopi ake adolah rasul bageme. Sabab, kowe adolah meterai kerasulanke delom Tuhan. ³ Nielah pembelaonke terhadop mike nyo nak memerikso ake. ⁴ Apekah kami hopi ado hak untok makon ngan minom? ⁵ Apekah kami hopi ado hak untok ngunda serta seurang bini nyo seiman, samo upa rasul-rasul nyo loin, dolor-dolor Tuhan, ngan jugo Kefas? ⁶ Atau, Apekah hanyo Barnabas ngan ake nyo hopi ado hak untok hopi begawe? ⁷ Siapekah nyo perenah mengabdi sebagoi tentara ngan biayanyo dewek? Siapekah nyo menandori kbon anggur ngan hopi memakon buahnye? Atau, siapekah nyo menggembalako ternak ngan hopi meminom susunye? ⁸ Apekah ake boekko hal-hal nie menurut mendesio? Bukonkah Hukom Taurat jugo boekko hal-hal nyo samo? ⁹ Sabab, ado tetoles delom hukom Taurat Musa, "jengonlah kou memberangos lembu nyo sedang mengirik gandum!" Apekah lembu nyo sedang Allah perhatiko? ¹⁰ Atau, apekah Enye boekkonye demi kite? Ao, demi kitelah hal iye detoles ulenyo nyo membajak haros membajak delom pengharapon ngan nyo mengirek haros mengirek delom pengharapon untok mendepotko bageonnye. ¹¹ Munye kami nyemborko beneh rohani de antaro kou, apekah belobihon munye kami jugo menuoi hal-hal materi deri kou? ¹² Munye urang loin mempunyoi hak nie atas kowe, bukonkah kamie lobih berhak lagi? Meskipon demikion, kami hopi menggunako hak iye. sebeleknye, kamie menanggung segelo sesuatu empoknyo kamie hopi memboriko suatu halangon bage Injil Kristus. ¹³ Apkah kou hopi tahuko behwo mika nyo gaweko hal-hal nyo kudus iye, makon makonon deri Bait Allah jugo? Ngan, mika nyo melayoni de altar mendepot bageon deri kurban persembahon iye? ¹⁴ Demikion jugo, Tuhan memerentahko mika nyo memberitako Injil untok hidop deri Injil jugo. ¹⁵ Hambok, ake hopi pernah memakoi sikok pon deri hak-hak nie. Ngan ake hopi menolesko hal-hal nie empoknyo delakuko upa iye kepodoke. Sabab, lobeh beik ake teelek deripode seseurang mempiadoko kebanggaonke. ¹⁶ Ulenyo, munye ake memberitako Injil, ake hopi memiliki alason untok bemegah ulenyo kewajibon iye ado ataske. Celakolah ake, munye ake hopi memberitako Injil. ¹⁷ Munye ake memberitako Injil ulenyo kendokke dewek, ake mempunyoi upah. Hambok, munye nie bukon kendokke, nie adolah tugas nyo depecayoko kepodoke. ¹⁸ Munye upa iye, apekah upahke? Upahke adolah tekalo ake memberitako Injil, ake buleh memberitako Injil tanpo upah ngan hopi menyalohgunako hakke delom Injil ¹⁹ Hambok, bego ake bebas atos segelo urang, ake menjediko dirike dewek hambo bage segelo urang empoknyo ake buleh memenangko lobeh lobot lagi. ²⁰ Bage urang Yahudi, ake menjedi upa urang Yahudi empoknyo ake depot memenangko urang Yahudi. Bage urang nyo hidop de bewoh Hukom Torat, ake menjedi upa urang nyo hidop de bewoh Hukom Torat (meskipon ake dewek hopi de bewoh hukom Torat) empoknyo ake depot memenangko mika nyo ado de bewoh Hukom Torat ²¹ Bage mika nyo tanpo Hukom Torat, ake menjedi upa tanpo hukom Torat (bukonnye tanpo hukom Allah, hambok de bewoh hukom Kristus) empoknye ake depot memenangko mika nyo tanpo Hukom Torat. ²² Bage urang nyo lamah, ake menjedi lamah empoknye ake depot memenangko mika nyo lamah. Ake sodah menjedi segelo sesuatu bage segelo urang empoknyo ngan segelo caro ake depot menyelamatko beberape urang. ²³ Ake melakuko segelo nie demi Injil empoknyo ake buleh mendepot bageon de delomnye. ²⁴ Hopi tahuko kou behwo mika nyo belari delom suatu pertandengon segelonye belari, cuma hanyo sikok nyo nerimo hadiah? Jedi belarilah sedemikion empoknyo kou mendepotkonye! ²⁵ Setiap urang nyo betandeng belateh menguasoi diri delom segelo hal. Mika melakukonye untok nerimo mahkota nyo fana, hambok kite untok mendepotko nyo abadi. ²⁶ Sabab iye, ake hopi belari upa iye tanpo tujuon. Ake hopi meninju upa urang nyo meninju angen. ²⁷ Hambok, ake melateh badanke ngan karas ngan menguasoinye empoknyo sesodah ake memberitako Injil kepodo urang loin, ake dewek hopi detolak.