(Injil tentang Yesus Kristus) ¹ Kinie, Dolor-dolorke, ake membori tahukoh kepodome Injil, nye ake beritahko kepodome, nyolah kou terimo, nyo dedelomnye kowe togok toguh. ² Uleh Injil iye jugo kowe deselamatko, asal kowe bepogong toguh podo firman nyo lah kuberitako kepodome, kecuali kowe pecayo ngan sia-sia. ³ Ake sodah menyampoiko kepodome, pertamo-tamo nyo tepenteng, nyo jugo aku terimo bahwa Kristus mati untok doso-doso kite sesuoi ngan Kitab Suci, ⁴ Ye sodah dekoborko, Ye debangketko podo hari ketiga sesuoi Kitab Suci, ⁵ ngan behwa Ye lah menampakko diri-Nye kepodo nyo kedua belas iye. ⁶ Sesodah iye, Nye menampakko diri-Nye kepodo lobeh deri lima ratos dolor-dolor sekaligus. Sebageon godong deri mike lagi hidop sampoi kini, cuma beberape lah mati. ⁷ Lalu, Ye menampakko diri-Nye kepodo Yakobus, kemudion kepodo segelo rasul. ⁸ Teakher, samo upa kepodo budak nyo laher sebolum waktunye, Nye jugo ngenanko diri kepodoke. ⁹ Sabab, akelah nye tekecik deantaro rasul-rasul-Nye ngan hopi layak desobut sebagai rasul ulenyo ake menganiaya jemaat Allah ¹⁰ Hambuk, ulenyo anugerah Allah, ake adolah ake nyo kinie. Ngan, anugerah-Nye kepodoke hopilah sio-sio. Ake begawe lobeh giat deripado mike segelo, cuma bukonnye ake, meloinko anugerah Allah nyo menyertaike. ¹¹ Ulehnyo iye, beik ulehku ataupun mika, demikianlah kami mengajorko ngan demikianlah kowe lah percayo. ¹² Munye Kristus deberitako bangkit deri kemation, mengka beberape deantaro kowe boek bahwa hopi ado kebangkiton deri kemation? ¹³ Munye hopi ado kebangkiton deri kemation, Kristus jugo hopi pernah debangketko. ¹⁴ Ngan, munye Kristus hopi debangkitkan, sio-siolah pemberitaon kami ngan sio-siolah jugo imanme. ¹⁵ Telobeh lagi, kami jugo dedepoti sebagai saksi dusta Allah ulenyo kami membori kesaksion bahwa Allah lah membangketko Kristus, nyo hopi nak debangketko-Nye, munye memang bonor urang mati hopi debangketko. ¹⁶ Sabab, munye urang mati hopi debangketko, Kristus jugo hopi debangketko. ¹⁷ Ngan, munye Kristus hopi debangketko, sio-siolah imanme, ngan kowe lagi maseh tepotek delom doso-dosome. ¹⁸ Demikian jugo, mike nyo sodah mati delom Kristus jugo lah binaso. ¹⁹ Munye pengharapon kite dedelom Kristus hanyo untuk hidop nie bae, kite adolah urang-urang nyo sajo malong deri segelo mendesio. ²⁰ Hambuk kinie, Kristus lah debangketko deri antaro urang mati, sebagai nyo buah sulung deri segelo urang pecayo nyo lah mati. ²¹ Sabab, samo upa kemation tejedi melewati sikok urang, menga melewati sikok urang jugolah kebangkiton deri antara urang mati tejedi. ²² Ulenyo delom Adam segelonye mati, demikion jugo delom Kristus segelonye nak dehidupko. ²³ Hambuk, tiap-tiap urang menorot urotonnye: Kristus sebagai buah sulung, setelah iye mike nyo adolah milik Kristus, podo kedetongon-Nye belek, ²⁴ kemudion sampoi kesodahannye, yaitu ketiko Nye menyerahko Kerajaon kepodo Allah Bepa, ketiko Nye lah membinasako segelo pemerintahon, segelo kekuasaon, ngan kekuaton. ²⁵ Sabab, Nye harus memerintah sampoi Allah motekko segelo musuh-Nye de bewoh kaki-Nye. ²⁶ Musuh teakher nyo nak debinasoko adolah kemation. ²⁷ Sabab, Allah lah motekko segelo sesuatu de bewoh kaki-Nye. Hambuk, ketiko deboekko bahwa segelo sesuatu lah dipotekko de bewoh-Nye, jelaslah bahwa hopi temasuk Allah dewek, nyo motekko segelo sesuatu de bewoh Kristus. ²⁸ Ketiko segelo sesuatu depotekko de bewoh Kristus, sesodah iye Anak dewek jugo nak menaklukko diri kepodo Nye, nyo menaklukko segelonye de bewoh Kristus sehingga Allah nak menjedi segelo-gelonye de delom segelonye. ²⁹ Munye hopi demikian, apekah nyo nak delakuko uileh mike nyo debaptis untuk urang yang mati? munye urang mati hopi debangketko samp sekali, lalu mengkah urang-urang membaptis bage mika? ³⁰ Ngan, mengkah kami ado delom behayo setiap waktu? ³¹ Dolor-dolor, setiap hari ake menghadopi kemation, demi kebanggaonke delom kowe, nyo ake meleki delom Yesus Kristus, Tuhan kite. ³² Secaro mendesio, apekah untungke belago ngan benatong-benatong buas de Efesus? Munye urang mati hopi debangketko, "Mayolah kite makon ngan minum ulenyo pepagie kite mati." ³³ Jengonlah tetipu: "Pergaulon nyo buruk menghancurko kebiasaon-kebiasaon nyo beik." ³⁴ Sadarlah belek ngan beik ngan jengon berbuat doso. Sabab, beberape urang hopi memiliki pengenalon akan Allah. Ake melabehko nie empuknyo kowe malu. ³⁵ Hambuk, seseurang nak betanyo, " Upamone urang mati debangketko? Ngan badan apekah mike nak njongok lagi?" ³⁶ Hai urang bodoh! Ape nyo kowe tabur hopi nak tumbuh hidup, kecuali nye mati lobeh dehulu. ³⁷ Ngan, ape nyo kowe tabur bukonlah badan tenaman nyo nak tumbuh iye, meloinko biji nyo hopi bekulet upa biji gandum apo biji-bijion loin. ³⁸ Hambuk, Allah memborinye tubuh sebagaimone Nye menghendaki-Nye ngan masing-masing biji deboriko badannye dewek-dewek. ³⁹ Bukon segelo degeng adalah degeng nyo samo, cuma hanyo sikok degeng mendesio, ngan loinnyo degeng benatong-benatong, ngan loinnye degeng burung-burung, ngan loinnye degeng ikan. ⁴⁰ Ado jugo badan sorgawi ngan badan duniawi, cuma kemuliaon nyo sorgawi iye bebeda ngan kemuliaon nyo duniawi iye pun bebeda. ⁴¹ Kemuliaon matohari bebeda, kemuliaon bulan bebeda, kemuliaon bintang -bintang jugo bebeda ulenyo sikok benato bebeda ngan benato nyo loin delom kemuliaon. ⁴² Upa iyela pula ngan kebangketon urang mati. Detaborko delom kebinasoon, debangketko delom kehopi binasaon. ⁴³ Detaboko delom kehinaon, debangketko delom kemuliaon. Detaboko delom kelamahan, debangketko delom kekuaton. ⁴⁴ Detaboko sebagai badan jasmani, debangketko sebagai badan rohani. ⁴⁵ Upa nyo tetules, ''mendesio pertamo, Adam, menjedi jiwo nyo hidop.'' Adam nyo terakher menjedi roh nyo membori hidop. ⁴⁶ Hambuk demikion, nyo rohani bukonlah nyo pertamo. Nyo pertamo adolah nyo jasmani, sesodah iye berulah nyo rohani. ⁴⁷ Mendesio pertamo berasal deri denia, yaitu deri debu tanoh. Mendesio kedua berasal deri sorga. ⁴⁸ Samo upah nyo berasal debu tanoh, demikion pula mika nyo berasal deri debu tanoh. Ngan, samo upa nyo surgawi, demikion pula mika nyo surgawi. ⁴⁹ Sebagaimone kite diciptako delom rupa mendesio berasal deri debu tanoh, kite jugo nak memakoi rupa mendesio nyo surgawi. ⁵⁰ Ake gerako nie kepodome, dolor-dolor, bahwa degeng ngan deroh hopi depot mewarisi kerajaon Allah. Demikion jugo nyo depot binaso, hopi depot mewarisi nyo hopi depot binaso. ⁵¹ Dongorlah! Ake melabe ko kepodo me seikuk resio, kite hopi nak mati segelonye, cuma kite segelo nak deubah, ⁵² seketiko iye, delom sekejap mato bae, saat terompet teaher: Ulenyo terompet nak buek, ngan urang mati nak debangkit ko tanpo kebinasaon, ngan kite nak deubahko. ⁵³ Sabab, nyo depot binaso nie harus menganako nyo hopi depot binaso. Ngan, nyo depot mati nie, harus menganako nyo hopi depot mati. ⁵⁴ Tekaloh nyo depot binaso nie menganako nyo hopi depot binaso, ngan nyo depot mati nie menganako nyo hopi depot mati, mengka genaplah firman nyo lah tetulis:''Kemation sodah detolon delom kemenangon.'' ⁵⁵ ''Hai kemation, demonekah kemenangonme? Hai maut, demonekah songotme?'' ⁵⁶ Songot maut adolah doso, ngan kuaso doso adolah Hukum Taurat. ⁵⁷ Hambuk, kite bersyukur ngan Allah nyo memboriko kite kemenangon melalui Tuhan kite, Yesus Kristus, ⁵⁸ Jedi, dulur-dulurke seiman nyo kekaseh, togoklah kuat, jengon goyah, melimpahlah selalu delom penggaweon Tuhan. Sabab, kowe tahuko bahwa jerih lelahme hopi sio-sio dedelom Tuhan.