¹ Jedilah urang-urang nyo menoroti teladanke, upa aku jugo terhadop Kristus. Tando Kekuasoon ² Kinie, ake memujime uleh kowe mengingotko delom segelo hal ngan bepogong tradisi-tradisi upa nyo kusampoiko kepodome. ³ Hambok, ake endok kowe mengereti bahwa kepalo setiap jenton-jenton adolah Kristus, kepalo betina adolah jenton-jenton, ngan kepalo Kristus adolah Allah. ⁴ Setiap jenton-jenton nyo bedoa ngan benubuat ngan kepalo nyo betodong, hopi menghormati kepalonye. ⁵ Hambok, setiap betina nyo bedoa apo bernubuat ngan kepalo nyo hopi betodong, mehino kepalonye, hal iye samo upa mnye kepalonye decokor. ⁶ Sabab, munye urang betina hopi menodongi kepalonye, biarlah ye jugo menoto segelo rambotnye. Hambok, munye memaluko bage seurang betina menotok rampot apo mencokor kepalonnye, biarlah ye menodongi kepalonye. ⁷ Jenton-jenton hopi pacok menodongi kepalonnye ulenyo ye adolah gambaron ngan kemuliaon Allah. Hambok, betina adolah kemuliaon jenton-jenton. ⁸ Jenton-jenton hopi berasal deri betina, cuma betina berasal deri jenton-jenton. ⁹ Ngan, jenton-jenton hopi deciptako untok betina, cuma betina untok jenton-jenton. ¹⁰ Iyelah sababnye, betina haros memeleki tando kekuasoon de kepalonye ulenyo para malaekat. ¹¹ Hambok, demikion, delom Tuhan hopi ado betina tanpo jenton-jenton, apo jenton-jenton tanpo betina. ¹² Sabab, betina berasal deri jenton-jenton, upaiyoy jugo jenton-jenton laher melalui betina. Ngan, segelo sesuatu berasal deri Allah. ¹³ Pertimbangkolah dewek, apolah pantas bage seurang betina untok bedoa kepodo Allah ngan kepalo nyo hopi betodong? ¹⁴ Bukonkah alam dewek mengajorko kepodome bahwa munye jenton-jenton memeleki rambot panjong, hal iye merupakoh kehinaon bagennye? ¹⁵ Hambok, munye betina memeleki rambot panjong, hal iye adolah kemuliaon bagennye: Sabab, rambotnyo iye deboriko kepodonye sebagai penodong. ¹⁶ Munye ado urang nyo lagi endok membantah, kami hopi memeleki kebiasoon iye, demikion jugo jemaat Tuhan. Hal-Hal nyo saloh delom Perjamuon Kudus ¹⁷ Delom memboriko perintah nie, ake hopi memujime uleh kowe bekompol bukon untok hal nyo lobeh beik, cuma untok hal nyo lobeh borok. ¹⁸ Pertamo, tekalo kowe bekompol sebagai jemaat, ake mendongor bahwa ado pepacahon de antaro kowe. Ngan, ake memercayoinye sebageon. ¹⁹ Sabab, haros ado pepacahon de antaro kowe empoknyo mike nyo tebukti tahan uji menjedi jelas de antaro kowe. ²⁰ Tekalo kowe bekompol de suatu tempat nyo samo, hal iye bukonlah untok makon perjamuon Tuhan. ²¹ Ulenyo tekaloh makon, setiap urang mengambek telobeh dehulu makononyo dewek empoknyo ado nyo kelaporon ngan nyo loennye mabok. ²² Apo kowe hopi ado rumah untok makon ngan minom? Apo, apokah kowe mehino jemaat Allah ngan mempermaluko rombongon nyo hopi ado apo-apo? Apo nyo haros kuboekko podome? Haroskah ake memujime? Tentu bae hopi! ²³ Ulenyo, ake menerimo deri Tuhan ape nyo jugo aku serahko kepodome, bahwa Tuhan Yesus, pado malom tekalo Ye dehianati, mengambek roti, ²⁴ ngan setelah mengucap syukor, Ye memacah-macahkonnye ngan boek, "Nielah badan-Ke, nyo adolah untokme; lakukolah menjedi peringoton akan ake." ²⁵ Demikion jugo, Ye mengambek cawan sesodah makon mengka boek, "cawan nie adolah perjenjion beheru nyo delom deroh-Ke. Perbuatlah nie, setiap kali kowe meminomnye, menjedi peringoton kan Ake." ²⁶ Sabab, setiap kali kowe makon roti nie ngan minom cawan nie, kowe memberitako kemation Tuhan sampoi Nye njongo. ²⁷ Ulenyo iye, siape nyo makon roti apo minom cawan Tuhan ngan caro nyo hopi layak, ye besalo terhadop badan ngan deroh Tuhan. ²⁸ Mendesio haros menguji dirinye dewek, ngan demikian biarlah ye makon roti ngan minom deri cawan iye. ²⁹ Sabab, urang nyo makon ngan minom tanpo mengakui badan Tuhan, ye menjongoko hokomon pocok dirinye. ³⁰ Iyelah sebebabnye, mengka lobot deantaro kowe nyo lamah ngan domom nyo teelek. ³¹ Hambok, munye kite menilai diri kite dewek ngan bonor, kite hopi nak dehokom. ³² Hambok, tekalo kite dehokom, kite dededek uleh Tuhan empoknyo kite hopi dehokom besamo-samo ngan dunia. ³³ Jedi, Dolor-dolorke, tekalo kowe bekompol untok makon, saleng menunggulah. ³⁴ Munye ado urang nyo kelaporon, beiklah nye makon dehulu de rumahnye empoknyo jengon kowe bekompol untok penghakemon. Ngan, hal-hal loen nak aku ator tekalo ake jongo.