¹ Aku adalah batakng anggur nang banar, lalu Apa'Ku adalah nang mihara iya. ² Ia muangi samua ranteng nang ina' babuah, lalu marasehatn samua ranteng nang mare' buah, biar buahe labih manyak agi'. ³ Kao udah baraseh sabab barita nang udah Aku kataatn ka kao. ⁴ Diapmlah ka daapmKu, Aku kadaapmnyu. Sarupa ranteng nang ina' bisa mare' buah dari dirie sandiri' kacoali koa tatap diapm ka batakng anggur koa. Ayakoa uga' kao kacoali kao diapm ka kadaapKu. ⁵ Aku adalah poko' anggor; kao adalah ranteng rantenge. Barangsae nang tatap badiapm ka daapmKu, Aku ada kadaapmnyu. ia mare' manyak buah, soale tanpa Aku kao ina' barbuat ahe - ahe. ⁶ Kade' urakng ina' diapm kadaapmKu, ia akan ditabakatn aya ranteng kayu nang udah mati, lalu di tunu. ⁷ Kade' kao diapm ka daapmKu, mao' make kataKu, minta ahepun kainginannyu , pasti koa tajaji ka kao. ⁸ Daapm hal nyian Apa' di Agungan, kade' kao babuah manyak lalu kao jaji murid - muridKu. ⁹ Ayamae Apa' ngasihi' Aku, Aku uga ngasihi' kao, diapmlah kadaapmKu. ¹⁰ Kade' kao mihara samua parentah - parentahKu nang udah Ku ngataatn, kao diapm daapm kasihKu ayamae Aku udah mihara parentah - parentah dari Apa' lalu diapm ka daapm kasihE. ¹¹ Aku udah ngataatn hal - hal nyian ka kao biar sukacitaKu bisa diapm ka kao jadi suka citaKu jaji bainsi'. ¹² Nyialah parentahKu, kade' kao arus saling mangasihi' ayamae Aku udah ngasihi' kita'. ¹³ Ina' seko'pun nang mao' labih aya' ngasihi' dari hal nyian, kade' ia mao' nyarahatn idupe untuk ayukng - ayuknge. ¹⁴ Kao adalah sahabat- sahabatKu kade' kao mao' nuruti' ka kata- kataKu. ¹⁵ Aku ina' agi' nyaru' kao amba, sabab ina' nahui' ahe nang tuanne ngarajaan. Aku udah nyaru' kita sahabat. Soale Aku udah nganalatn kao ka Apa'Ku hal - hal ahe nang udah Aku nangar. ¹⁶ Kao ina' milih Aku, tapi Aku nang milih kao lalu nojok kao untuk ampus lalu ngasilatn buah, lalu buah tatapnyu tatap batahan. nyianlah alasan kade' ahepun nang kao minta dari Apa' kadaapm damaKu, Ia mao' mareatn ka kao. ¹⁷ Hal - hal nyian Aku parentahatn ka kao, kade' kao bisa saling mangasihi' ¹⁸ Kade' dunia banci' ka kao, katahui'lah kade' dunia udah banci' Aku sanape' dunia banci' ka kao. ¹⁹ Kade' kao dari dunia, dunia akan mangasihi' kao sabagai milike; tapi sabab kao buke' dari dunia lalu sabab Aku udah milih kao dari dunia, sabab dunia banci' ka kao. ²⁰ Ingatlah samua pakataatnKu nang udah Aku kataatn ka kao, saorang amba ina'lah labih aya' daripada tuanne, 'Kade' kabatne nganiaya' Aku, kabatne uga mao' nganiaya' kao; Kade' kabatne mihara pakataatnKu, kabatne uga' mao' mihara pakataatn. ²¹ Kabatne mao' majaanan samua hal - hal nyian ka kao dari damaKu sabab kabatne ina' kanal ka Ia nang udah ngutus Aku. ²² Kade' Aku ina' atakng lalu bakata ka kabatne, kabatne ina' akan badosa, tapi angkitn kabatne inas' ada maaf untuk dosa kabatne. ²³ Ia nang banci' ka Aku, banci ka Apa' uga'. ²⁴ Kade' Aku nape' nyalasaiatn pakarajaan nang ina' seko'pun dari kabatne majaanan, kabatne bisa ina' badosa; tapi angkitn kabatne udah banci ka Aku ba Apa'Ku. ²⁵ Tapi hal nyian tajaji biar manuhi' pakataatn nang udah tatulis, daapm ukum kabatne; Kabatne banci ka Aku ina' ba alasan. ²⁶ Waktu pangibur atakng----ia nang Ku utus dari Apa', yakoa Roh kabanaran, nang langsung dari Apa', ia nang akan mare' kasaksian tentang Aku. ²⁷ Kao uga' akan mare' kasaksian soale kao udah basamaKu saja' dari awal.