¹ Udah nya aku tepedaka siku agi melikat nurun ari serega. Kuasa iya besai, lalu dunya nyau tampak terang laban mulia iya. ² Lalu iya ngangau enggau nyawa ti inggar, “Udah alah! Babilon ti besai udah alah! Iya udah nyadika endur alai antu diau, nyadika endur alai roh ti kamah, nyadika endur alai semua burung ti kamah sereta dipegedika, diau. ³ Laban semua bansa bela udah ngirup wain pengingin iya ti kamah, lalu sida raja dunya tu udah bambai enggau iya, lalu bala sedagar dunya nyadi kaya laban pengaya ti datai ari pengamah ulah iya.” ⁴ Udah nya aku ninga siti agi nyawa bejaku ari serega, “Pansut ari iya, kita ke nembiak Aku, enggai ke kita bedosa enggau iya, enggai ke kita sama enggau iya natka penusah ti besai; ⁵ laban dosa iya nyau betugung ngeninggi langit, lalu Allah Taala udah ngingatka penyai iya. Kereja ngagai iya baka ke udah dikereja iya ngagai kita. ⁶ Bayar iya dua kali lipat ke semua utai ti udah dikereja iya. Iri mangkuk iya enggau ai ti dua kali bisa agi ari ai ti udah disediaka iya ke kita. ⁷ Baka iya ti udah ngemuliaka diri empu sereta nyamai diau, baka nya meh beri ngagai iya pemerinsa enggau ati ti tusah. Laban iya udah bejaku dalam ati diri, ‘Aku duduk ditu nyadi kuin! Aku ukai indu ke balu. Aku enda tusah ati,’ ⁸ baka nya meh penusah ti besai deka nuntung iya dalam sehari aja, penyakit, ati ti tusah, enggau lapar pungkang, lalu iya deka ditunu ngena api, laban Tuhan Allah Taala, ke ngakim iya, endang bekuasa.” ⁹ Lalu bala raja dunya ti bambai enggau iya, lalu ngereja ulah ti kamah enggau iya, deka bekeduie nyabakka iya, lebuh sida meda asap pansut ari api ti nganguska iya. ¹⁰ Sida deka bediri ari jauh, laban sida takut meda pemerinsa iya. Ku sida, “Naka meh pemalat penusah nuan! Naka meh pemalat penusah nuan nengeri Babilon ti besai, nuan nengeri ti kering, Babilon! Dalam sejam aja ukum nuan datai.” ¹¹ Bala sedagar dunya mega nyabak sereta ngulitka iya, laban nadai orang agi meli barang sida, ¹² barang ti digaga ari emas, pirak, batu ti berega, batu mutiara, barang ti digaga ari linin, kain ungu, sutera, kain ti mirah-redam, semua macham kayu ti jarang dipeda, enggau semua macham utai ti digaga ari gading, enggau ari kayu ti berega, utai ti digaga ari temaga, ari besi enggau ari batu burak, ¹³ kulit kayu manis, rempah, menyan, mur, enggau minyak tata ti berega, wain enggau minyak, tepung enggau gandum, jelu sapi enggau jelu bedus, kuda enggau kerita kuda, enggau ulun, iya nya semengat mensia. ¹⁴ bala sedagar nya bejaku ngagai iya, “Semua utai ti manah ti dikinginka nuan, udah lesap magang, lalu semua pengaya enggau pemajik nuan udah lenyau magang, lalu nadai ditemu agi!” ¹⁵ Bala orang sedagar, ti nyadi kaya bedagang dalam nengeri nya, deka bediri ari jauh, laban sida takut meda pemerinsa iya, lalu sida deka bekeduie nyabak sereta ngulit. ¹⁶ Ku sida, “Naka meh pemalat penusah nya! Naka meh pemalat penusah nengeri ti besai nya ti ngena kain linin, kain ungu, kain ti mirah-redam, ti diias ngena perengka emas, batu ti berega enggau batu mutiara! ¹⁷ Lalu dalam sejam aja semua pengaya iya abis dirusak.” Lalu semua juragan kapal, orang tambang ke belayar ngena kapal, kelasi, enggau semua orang ke bedagang di tasik, bediri ari jauh, ¹⁸ lalu nyerauh lebuh sida meda asap ti pansut ari api ti nganguska iya. Ku sida, “Kati nengeri bukai bisi udah baka nengeri ti besai nya?” ¹⁹ Sida lalu ngerabu pala diri enggau amau, duie-duie nyabak sereta ngulit. Ku sida, “Naka meh pemalat penusah nya! Naka meh pemalat penusah nengeri ti besai nya, alai semua orang ke bisi kapal ti belayar di tasik, nyadi kaya laban pengaya iya! Lalu dalam sejam aja semua utai iya abis dirusak! ²⁰ Rami gaga ati meh nuan ke iya, O serega, kita nembiak Tuhan, enggau kita rasul enggau kita nabi, laban Allah Taala udah ngukum iya ke kita!” ²¹ Udah nya, siku melikat ti kering lalu ngambi sigi batu ti mesai batu kisar, lalu nikauka batu nya ngagai tasik. Ku iya, “Baka tu ku pemalat nengeri Babilon ti besai nya deka ditikau ke baruh, lalu nadai ditemu agi; ²² Munyi belikan enggau munyi nyawa orang ke belagu, munyi nyawa orang ke nebah kesuling enggau terumpit, nadai agi didinga dalam nuan; lalu orang ke landik begagaka utai nadai agi ditemu dalam nuan; Lalu munyi batu kisar nadai agi didinga dalam nuan; ²³ Penampak lampu nadai agi manchar dalam nuan; Lalu munyi nyawa indu enggau nyawa lelaki ke ditikah nadai agi didinga dalam nuan; Laban bala sedagar nuan endang orang ke pemadu bekuasa dalam dunya, lalu semua bansa udah ditipu kereja keramat nuan. ²⁴ Darah sida nabi, darah nembiak Tuhan, enggau darah semua orang ke udah dibunuh di dunya, ditemu magang dalam nengeri nya.”